6 Makatabang ba Gayod ang Pag-ampo?

DUNA bay ikatabang kanato ang pag-ampo? Oo. Ang Bibliya nagpakita nga ang pag-ampo sa matinumanong mga alagad sa Diyos nakabenepisyo kanila. (Lucas 22:40; Santiago 5:13) Sa pagkatinuod, kini makaayo kanato sa espirituwal, emosyonal, ug bisan sa pisikal. Sa unsang paagi?

Ibutang ta nga ang imong anak nakadawat ug regalo. Tudloan ba nimo siya nga igo na nga mobati siyang mapasalamaton? O tudloan nimo siya nga isulti kana? Kon isulti nato ang atong gibati, mas puwersado kini. Ingon ba usab niana ang epekto kon kita makigsulti sa Diyos? Oo! Aniay pipila ka pananglitan.

Pagpasalamat sa Diyos. Kon kita magpasalamat sa Amahan alang sa maayong mga butang nga atong madawat, mas maapresyar nato ang atong mga panalangin. Ingong resulta, kita mahimong mas mapasalamaton, mas malipayon, ug mas positibo.—Filipos 4:6.

Pananglitan: Gipasalamatan ni Jesus ang iyang Amahan tungod kay gidungog ang iyang pag-ampo.—Juan 11:41.

Pagpangayog pasaylo. Kon kita mangayog pasaylo sa Diyos, ang atong konsensiya mahimong mas sensitibo, ang atong paghinulsol mas tiunay, ug mas maila nato ang kaseryoso sa sala. Mahupayan usab kita kay dili na kita hasolon sa atong konsensiya.

Pananglitan: Si David miampo aron ipahayag ang iyang paghinulsol ug kaguol.—Salmo 51.

Pagpangayog giya ug kaalam. Ang paghangyo kang Jehova nga giyahan kita o hatagag kaalam aron makahimog maayong desisyon motabang kanato nga mahimong mapaubsanon. Magpahinumdom usab kini kanato sa atong mga limitasyon ug magpalig-on sa atong pagsalig sa atong langitnong Amahan.—Proverbio 3:5, 6.

Pananglitan: Si Solomon mapaubsanong nag-ampo alang sa giya ug kaalam sa pagmando sa Israel.—1 Hari 3:5-12.

Pagpahayag sa atong mga problema. Kon atong ipahungaw ang atong mga kaguol ngadto sa Diyos sa dihang kita dunay problema, mahupay ang atong kasingkasing ug mosalig kita kang Jehova inay sa atong kaugalingon.—Salmo 62:8.

Pananglitan: Si Haring Asa miampo sa dihang siya nakaatubang ug makahahadlok nga kaaway.—2 Cronicas 14:11.

Paghangyo alang sa kaayohan sa uban. Kini nga pag-ampo makatabang kanato nga mahimong mas mahunahunaon, maluluy-on, ug mabination sa uban.

Pananglitan: Si Jesus nag-ampo alang sa iyang mga tinun-an.—Juan 17:9-17.

Pagdayeg sa Diyos. Kon dayegon nato si Jehova tungod sa iyang kahibulongang mga buhat ug hiyas, molalom ang atong pagtahod ug pagpabili kaniya. Mas masuod usab kita kaniya ingong atong Diyos ug Amahan.

Pananglitan: Si David kinasingkasing nga nagdayeg sa Diyos tungod sa iyang kalalangan.—Salmo 8.

Ang laing panalangin nga ikahatag sa pag-ampo mao “ang kalinaw sa Diyos nga labaw sa tanang panghunahuna.” (Filipos 4:7) Ang pagbaton ug kalinaw sa hunahuna niining gubot nga kalibotan maoy talagsaon gayod nga panalangin. Kini makahatag pa ganig kaayohan sa atong panglawas. (Proverbio 14:30) Apan resulta ba lamang kini sa atong kaugalingong mga paningkamot? Dili kaha aduna pay labaw nga nalangkit?

[Blurb sa panid 10]

Ang pag-ampo daghag kaayohan—pisikal, emosyonal ug, labaw sa tanan, espirituwal