Tinuod Bang ang mga Tawo Kaniadto Tag-as Kaayog Kinabuhi?

NIADTONG Agosto 4, 1997, si Jeanne Louise Calment namatay sa iyang lungsod nga natawhan sa habagatan-sidlakang France, sa edad nga 122!

Ang pag-uswag sa siyensiya, pag-atiman sa panglawas, ug sa uban pang natad nakapataas sa kinabuhi sa mga tawo karon. Apan diyutay ra gihapon ang makaabot o molapas sa edad nga 100. Tingali mao kanay rason nga kon taas silag edad, sila mabalita sama kang Madame Calment.

Gihisgotan sa Bibliya nga sa karaang panahon ang mga tawo tag-as kaayog kinabuhi, nga ang uban miabot ug halos 1,000 ka tuig. Tinuod ba kini? Ingon ba gayod niana kataas ang ilang kinabuhi? Hinungdanon ba kini kanato karon?

Mga Tawo nga Tag-as ug Kinabuhi

Ang basahon sa Genesis naghisgot ug pito ka tawo nga nabuhig kapin sa 900 ka tuig, ug silang tanan natawo sa wala pa ang Lunop sa adlaw ni Noe. Sila mao si Adan, Set, Enos, Kenan, Jared, Matusalem, ug si Noe. (Genesis 5:5-27; 9:29) Tingali daghan ang wala makaila kanila, apan kini sila maoy lakip sa unang napulo ka kaliwatan sa tawhanong kasaysayan. Si Matusalem nailhan nga maoy kinatas-ag edad—969 ka tuig!

May laing gihisgotan sa Bibliya nga 25 ka tawo nga mas taas pag kinabuhi kay sa mga tawo karon. Ang uban kanila nabuhi ug 300, 400, ug gani 700 ka tuig o kapin pa. (Genesis 5:28-31; 11:10-25) Apan alang sa daghan, kini nga mga asoy sa Bibliya maoy tumotumo lamang. Tinuod bang tumotumo lang kini?

Tumotumo ba o Katuohan?

Sumala sa usa ka dokumento gikan sa Max Planck Institute for Demographic Research sa Germany, gikuwenta sa mga tigdukiduki ang edad ni Madame Calment, nga gihisgotan ganina, pinasukad sa kon unsay iyang gipanulti. May kalabotan kini sa pipila ka panghitabo bahin kaniya ug sa iyang mga paryente. Unya ang iyang gisulti gitandi sa iyang rekord sa pagkalungsoranon,  sa notaryo publiko, ug sa simbahan, ingon man sa mga artikulo sa mga mantalaan ug listahan sa senso. Bisan tuod imposibleng makompirmar ang matag detalye, mahimong matino ang gitas-on sa iyang edad pinaagi sa mabatonang mga ebidensiya.

Komosta ang mga asoy sa Bibliya? Kasaligan ba kini? Tino gayod! Bisan tuod dili makompirmar ang tanang detalye diha sa mga sekular nga reperensiya, ang ebidensiya sublisubling nagpamatuod nga ang gibutyag sa Bibliya maoy kasaligan kon itandi sa kasaysayan, siyensiya, ug sa kronolohiya. a Dili gayod kini ikatingala kay ang Bibliya mismo nag-ingon: “Ang Diyos maminatud-on, bisan ang tanan bakakon.” (Roma 3:4, Contemporary English Version) Oo, ingong “inspirado sa Diyos,” ang Bibliya wala gayoy asoy nga tumotumo.—2 Timoteo 3:16.

Si Moises nga gigiyahan ni Jehova nga Diyos sa pagsulat sa Pentateuko, o sa unang lima ka basahon sa Bibliya, maoy usa sa labing ilado ug tinahod nga mga tawo sa kasaysayan. Alang sa mga Hudiyo siya ang labing bantogan sa tanan nilang magtutudlo. Giisip siya sa mga Muslim ingong usa sa ilang labing bantogang mga manalagna. Alang sa mga Kristohanon, si Moises maoy representasyon kang Jesu-Kristo nga miabot sa ulahi. Makataronganon bang moingon nga ang mga sinulat sa maong ilado nga tawo sa kasaysayan dili kasaligan?

Lahi ba ang Kuwentada sa Panahon Kaniadto?

Giingon sa uban nga lahi ug kuwentada ang panahon kaniadto, nga ang usa ka tuig maoy usa lamang ka bulan. Apan kon susihon ang asoy sa Genesis, dayag nga ang mga tawo kaniadto ug karon pareho rag konsepto bahin sa panahon. Tagda ang duha ka pananglitan. Diha sa asoy bahin sa Lunop, atong mabasa nga kini nagsugod sa dihang si Noe nag-edad ug 600, “sa ikaduha nga bulan, sa ikanapulog-pito ka adlaw sa bulan.” Ug unya kini nag-ingon nga ang mga tubig misanap sa tibuok yuta sulod sa 150 ka adlaw ug nga “sa ikapitong bulan, sa ikanapulog-pito ka adlaw sa bulan, ang arka nahiluna diha sa kabukiran sa Ararat.” (Genesis 7:11, 24; 8:4) Busa ang lima ka bulan giingon nga 150 ka adlaw, gikan sa ika-17 ka adlaw sa ikaduhang bulan hangtod sa ika-17 ka adlaw sa ikapitong bulan nianang tuiga. Tataw nga wala gayoy basehanan ang ilang giingon nga ang usa ka tuig maoy usa lamang ka bulan.

Karon tagda kining ikaduhang pananglitan. Sumala sa Genesis 5:15-18, si Mahalalel nanganak sa dihang siya nag-edad ug 65, nabuhi sulod sa 830 ka tuig, ug namatay sa edad nga 895. Ang iyang apong si Enoc nanganak usab sa dihang siya nag-edad ug 65. (Genesis 5:21) Kon ang usa ka tuig tinuod gayod nga usa ka bulan, nan silang duha nahimo nang mga ginikanan sa dihang sila 5-anyos pa lamang! Makataronganon ba kana?

Hinungdanon usab ang ebidensiya sa arkeolohiya, kay kini kaharmonya sa giingon sa Bibliya bahin sa mga tawong tag-as ug kinabuhi. Ang Bibliya nag-ingon nga ang patriarkang si Abraham naggikan sa siyudad sa Ur, ug nga siya nagpuyo sa ulahi didto sa siyudad sa Haran ug dayon sa rehiyon sa Canaan, ug nga siya nakig-away ug nagpildi kang Kedorlaomer nga hari sa Elam. (Genesis 11:31; 12:5; 14:13-17) Gipamatud-an sa mga diskobre nga naglungtad gayod kini nga mga dapit ug mga tawo. Nakatabang usab ang arkeolohiya aron masabtan ang matang sa mga dapit ug kostumbre sa katawhan nga gihisgotan sa panahon ni Abraham. Sanglit husto man kining mga giingon sa Bibliya bahin kang Abraham, nganong magduhaduha pa man kita sa giingon niini nga siya nag-edad ug 175?—Genesis 25:7.

Busa dili gayod angayng kaduhaduhaan ang giingon sa Bibliya nga ang mga tawo kaniadto tag-as kaayog kinabuhi. Apan ikaw tingali mangutana, ‘Nganong hinungdanon kanako kon sila ba tag-as ug kinabuhi o dili?’

Ikaw Mabuhi Gayod ug Dugay!

Ang pagkataas ug kinabuhi sa mga tawo sa wala pa ang Lunop nagpamatuod nga ang tawo  mahimong mabuhi sa taas nga panahon. Ang modernong teknolohiya nakatabang sa mga siyentipiko nga masusi pag-ayo ang lawas sa tawo ug ang katingalahang disenyo niini, lakip na ang kahibulongang katakos niini sa pagbag-obag-o ug pag-ayo sa kaugalingon. Unsay ilang konklusyon? Kini mahimong mabuhi hangtod sa hangtod. “[Ang pagkatigulang],” matod sa Propesor sa Medisina nga si Tom Kirkwood, “maoy usa gihapon sa dakong mga misteryo sa medikal nga siyensiya.”

Apan alang kang Jehova, ang pagkatigulang dili usa ka misteryo o problema nga dili masulbad. Iyang gilalang ang unang tawong si Adan nga hingpit, ug maoy iyang katuyoan nga ang mga tawo mabuhi sa walay kataposan. Apan ikasubo nga si Adan mitalikod sa Diyos. Tungod niini, siya nakasala ug nahimong dili hingpit. Mao kini ang tubag sa gikalibgan sa mga siyentipiko: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” (Roma 5:12) Kita masakit, matigulang, ug mamatay tungod sa sala ug pagkadili-hingpit.

Bisan pa niana, ang katuyoan sa atong mahigugmaong Maglalalang wala gayod mausab. Ingong dakong pamatuod niana, iyang gihalad ang iyang Anak, si Jesu-Kristo, nga pinaagi niini kita mahimong hingpit ug mabuhing walay kataposan. Ang Bibliya nag-ingon: “Kay ingon nga diha kang Adan ang tanan nangamatay, sa ingon usab diha kang Kristo ang tanan pagabuhion.” (1 Corinto 15:22) Ang mga tawo sa wala pa ang Lunop mas duol sa kahingpitan kay kanato, ug mao kanay hinungdan nga sila mas taas kaayo ug kinabuhi kay kanato karon. Apan kita karon duol na sa panahon nga tumanon sa Diyos ang iyang saad. Sa dili madugay ang tanang lama sa sala ug pagkadili-hingpit mahanaw na, ug ang mga tawo dili na masakit ug mamatay.—Isaias 33:24; Tito 1:2.

Unsaon nimo pagbaton sa maong mga panalangin? Ayaw paghunahunang damgo lamang ang saad sa Diyos. Si Jesus miingon: “Siya nga magapatalinghog sa akong pulong ug magatuo kaniya nga nagpadala kanako adunay kinabuhing walay kataposan.” (Juan 5:24) Busa tun-i ang Bibliya ug ipadapat kini. Nianang paagiha, imong gisundog kadtong gihisgotan ni Pablo nga ‘maampingong nagtipig alang sa ilang kaugalingon ug usa ka maayong patukoranan alang sa umalabot, aron sila makapangupot pag-ayo sa tinuod nga kinabuhi.’ (1 Timoteo 6:19) Ikaw makatino nga ang Diyos kinsa naghatag ug taas kaayong kinabuhi sa mga tawo kaniadto makahatag usab kanimo ug kinabuhing walay kataposan!

[Footnote]

[Graph sa panid 12]

(Alang sa aktuwal nga pagkahan-ay, tan-awa ang publikasyon)

1000

969 MATUSALEM

950 NOE

930 ADAN

900

 

 

 

800

 

 

 

700

 

 

 

600

 

 

 

500

 

 

 

400

 

 

 

300

 

 

 

200

 

 

 

100 MODERNONG TAWO

 

 

 

EDAD