Sinserong Magtutuo ug Responsableng Lungsoranon—Sa Unsang Paagi?

UNSAY duha ka butang nga nakapalahi sa ministeryo ni Jesus? Una, si Jesus naningkamot sa pag-usab sa mga kasingkasing sa matag indibiduwal, dili sa politikal nga mga institusyon. Pananglitan, matikdi kon unsay gipasiugda ni Jesus sa iyang Wali sa Bukid. Sa wala pa siya maghisgot bahin sa panginahanglan nga mahimong samag asin ug kahayag, iyang giingnan ang iyang mamiminaw nga ang tinuod nga kalipay mabatonan niadtong “mahunahunaon sa ilang espirituwal nga panginahanglan.” Siya midugang: “Malipayon ang mga malumog-buot, . . . mga putli sa kasingkasing, . . . mga makigdaiton.” (Mateo 5:1-11) Gitabangan ni Jesus ang iyang mga sumusunod sa pagkasabot sa kahinungdanon nga ipasibo ang ilang panghunahuna ug pagbati sa sukdanan sa Diyos sa kon unsay maayo ug daotan ug sa importansiya sa pag-alagad sa Diyos sa bug-os nga kasingkasing.

Ikaduha, sa dihang nakita ni Jesus ang pag-antos sa mga tawo, ang iyang kaluoy nagtukmod niya sa paghupay kanila. Apan niadtong panahona, dili niya tumong nga wagtangon ang tanang pag-antos. (Mateo 20:30-34) Iyang giayo ang mga masakiton, apan ang sakit anaa gihapon. (Lucas 6:17-19) Iyang gihupay ang mga dinaogdaog, apan ang inhustisya nagpahinabo gihapog pag-antos. Iyang gitagan-ag pagkaon ang mga gigutom, apan ang kagutom padayong nag-apektar sa katawhan.—Marcos 6:41-44.

Pag-usab sa mga Kasingkasing ug Paghupay sa Pag-antos

Nganong ang tumong ni Jesus mao man ang pag-usab sa mga kasingkasing ug paghupay sa pag-antos, dili ang pag-usab sa mga institusyon o pagwagtang sa kagul-anan? Siya nahibalo nga katuyoan sa Diyos nga gamiton ang Iyang Gingharian sa umaabot aron taposon ang tanang tawhanong gobyerno ug wagtangon ang hinungdan sa tanang pag-antos. (Lucas 4:43; 8:1) Busa, sa dihang kas-a giawhag si Jesus sa iyang mga tinun-an nga mogugol ug dugang panahon sa pagpang-ayo sa masakiton, siya miingon kanila: “Mangadto kita sa laing dapit, sa kasikbit nga mga lungsod, aron makawali usab ako didto, kay alang niini nga katuyoan nga ako mianhi.” (Marcos 1:32-38) Gihupay ni Jesus ang pisikal nga pag-antos sa daghan, apan mas hinungdanon kaniya ang pagsangyaw ug pagtudlo sa pulong sa Diyos.

Sa ilang buluhatong pagsangyaw karon, ang mga Saksi ni Jehova naningkamot sa pagsundog kang Jesus. Sila natukmod sa paghupay sa pag-antos pinaagi sa paghatag ug praktikal nga tabang sa mga nanginahanglan. Apan ang mga Saksi wala maningkamot sa pagwagtang sa inhustisya. Sila nagtuo nga ang Gingharian sa Diyos magwagtang sa hinungdan sa tanang pag-antos. (Mateo 6:10) Sama kang Jesus, sila naningkamot sa pag-usab sa mga kasingkasing, dili sa politikal nga mga institusyon. Kana nga paagi makataronganon kay ang pangunang problema sa tawo dili bahin sa politika, kondili bahin sa moralidad.

Responsableng mga Lungsoranon

Sa samang higayon, ang mga Saksi ni Jehova nagtuo nga ilang responsabilidad ingong mga Kristohanon nga mahimong maayong mga lungsoranon. Busa, sila nagtahod sa awtoridad sa gobyerno. Pinaagi sa ilang mga publikasyon ug sa ilang pagsangyaw, ilang gidasig ang ilang mga silingan nga mahimong masinundanon sa balaod. Apan, kon ang gobyerno magbaod ug butang nga supak sa sugo sa Diyos, ang mga Saksi dili motuman niana. Ilang “sugton ang Diyos ingong magmamando inay ang mga tawo.”—Buhat 5:29; Roma 13:1-7.

 Ang mga Saksi ni Jehova moduaw sa tanan diha sa ilang komunidad aron magtanyag ug libreng pagtuon sa Bibliya. Tungod niini nga edukasyon, milyonmilyong kasingkasing ang nausab. Kada tuig, gatosan ka libo ang natabangan sa pagbuntog sa makadaot nga mga buhat sama sa pagpanigarilyo, paghuboghubog, pagdroga, pagsugal, ug seksuwal nga kahilayan. Sila nahimong responsableng mga lungsoranon kay sila nakakat-on sa pagpadapat sa prinsipyo sa Bibliya sa ilang kinabuhi.—Tan-awa ang artikulong “Ang Bibliya Makabag-o sa Kinabuhi,” sa panid 18 niining magasina.

Dugang pa, ang edukasyon sa Bibliya makatabang sa mga pamilya sa pagpalalom sa ilang pagtahod sa usag usa ug sa pagpauswag sa ilang komunikasyon—tali sa magtiayon maingon man tali sa ginikanan ug mga anak ug taliwala sa mga anak mismo. Kini makapalig-on sa relasyon sa pamilya. Busa kon lig-on ang pamilya, lig-on sab ang komunidad.

Human mahisgoti ang mga punto niining artikuloha, unsay imong hunahuna: Giuyonan ba sa Bibliya kadtong nagpaluyo sa panagsagol sa relihiyon ug politika? Tin-aw ang tubag: wala gayod. Apan angay bang mahimong responsableng mga lungsoranon ang tinuod nga mga Kristohanon? Oo. Sa unsang paagi nila kana mahimo? Pinaagi sa pagsunod sa sugo ni Jesus nga mahisamag asin ug kahayag sa kalibotan.

Kadtong naningkamot sa pagpadapat niining praktikal nga giya ni Kristo makabenepisyo niini lakip na ang ilang pamilya—maingon man ang komunidad diin sila nagpuyo. Ang mga Saksi ni Jehova sa inyong dapit malipayng mopaambit kanimo ug dugang impormasyon bahin sa programa sa pagtuon ug Bibliya nga ginahimo karon sa inyong komunidad. *

[Footnote]

[Blurb sa panid 10]

Si Jesus naningkamot sa pag-usab sa mga kasingkasing, dili sa politikal nga mga institusyon

[Blurb sa panid 11]

Ang mga Saksi ni Jehova nagtuo gayod nga ilang responsabilidad nga mahimong maayong mga lungsoranon