ANG pipila moingon nga sayop ang pagpangutana sa Diyos. Ilang gibati nga kawalay-pagtahod ang pagpangutana kon nganong iyang gitugot o wala itugot nga mahitabo ang pipila ka butang. Mao ba usab kanay imong panglantaw?

Kon mao, matingala ka tingali sa pagkasayod nga daghang maayong tawo ang nangutana sa Diyos. Matikdi ang mosunod nga mga pananglitan sa ilang pangutana:

Ang matinumanong si Job: “Ngano man nga ang mga daotan nagpadayong buhi, natigulang, milabaw usab kon bahin sa bahandi?”—Job 21:7.

Ang maunongong propeta nga si Habacuc: “Ngano man nga ikaw nagtan-aw sa mga maluibon, nga ikaw nagpakahilom sa dihang ang daotan naglamoy sa usa nga matarong pa kay kaniya?”—Habacuc 1:13.

Si Jesu-Kristo: “Diyos ko, Diyos ko, nganong gitalikdan mo ako?”—Mateo 27:46.

Kon imong basahon ang palibot nga mga teksto, wala kay makitang timailhan nga nasuko si Jehova * nga Diyos sa dihang sinserong gipangutana niana. Sa pagkatinuod, dili ikatingala ang iyang pagkamapailobon. Pananglitan, ang Diyos dili mainsulto kon kita mohangyo nga tagbawon ang pisikal nga mga panginahanglan aron kita magpabiling himsog. Malipay siyang motagana niana. (Mateo 6:11, 33) Sa susama, andam siyang mohatag ug impormasyon aron magpabilin kitang himsog sa mental ug emosyonal. (Filipos 4:6, 7) Gani, giingnan ni Jesus ang iyang mga tinun-an: “Padayon sa pagpangayo, ug igahatag kini kaninyo.” (Mateo 7:7) Ang palibot nga mga teksto niini nga saad ni Jesus nagpakita nga siya naghisgot dili lang sa pagdawat ug materyal nga mga butang kondili sa mga tubag usab sa hinungdanong mga pangutana.

Kon hatagan kag higayon, hain sa mosunod ang buot nimong ipangutana sa Diyos?

• May katuyoan ba ang akong kinabuhi?

• Unsay mahitabo inigkamatay nako?

• Nganong gitugot man nimo nga mag-antos ko?

Sanglit “ang tibuok Kasulatan inspirado sa Diyos,” imong makita ang tubag sa Diyos sa maong mga pangutana diha sa iyang Pulong, ang Bibliya. (2 Timoteo 3:16) Tagda kon nganong nakapangutana niana ang pipila ug kon unsay tubag sa Bibliya.