Sa sayong bahin sa katuigan sa 1930, ang Indonesia, Malaysia, ug ang gitawag karon nga Papua New Guinea wala pa gyod masangyawi sa mga Saksi ni Jehova. Sa unsang paagi makaabot ang maayong balita niining mga lugara? Aron matagan-an ni nga panginahanglan, ang sangang buhatan sa Australia (karon, Australasia) mipalit ug 16 metros nga demotor nga lansa nga may duha ka palo. Ginganlan nig Lightbearer kay gamiton ni sa mga tripulante niini, nga tanan mga payunir, a sa paghatod ug espirituwal nga kahayag sa lagyong lugar.—Mateo 5:14-16.

 Pagka-Pebrero 1935, ang pito ka tripulante milawig paamihanan gikan sa Sydney, sa sidlakang bahin sa Australia, paingon sa Port Moresby, New Guinea. Samtang naglawig, nangisda sab sila ug mihunong sa pipila ka pantalan para sa gasolina, dugang nga pagkaon, ug pagpaayo sa lansa. Pagka-Abril 10, 1935, milawig sila gikan sa Cooktown, Queensland. Gigamit nila ang makina sa lansa sa pagtabok sa peligrosong Great Barrier Reef. Pero ang makina misugod pagkagalkal ug kinahanglang palongon. Mobalik ba sila o mopadayog lawig paingon sa New Guinea? Ang kapitan, si Eric Ewins, miingon nga dili nila gustong mobalik. Busa ang Lightbearer mipadayon paglawig ug luwas nga nakaabot sa Port Moresby niadtong Abril 28, 1935.

 Samtang ang makina giayo sa mekaniko, ang mga tripulante nagsangyaw sa Port Moresby, gawas kang Frank Dewar. Si Frank, kinsa gitawag sa usa niya ka kauban ingong kugihang payunir, miingon: ‘Nagdala kog daghang libro ug mibaktas ug mga 32 kilometros o kapin pa gikan sa baybayon, nga nagsangyaw sa namuyo niadtong dapita.’ Sa iyang pagbalik, miagi siyag laing ruta ug kinahanglang motabok sa gamayng suba nga gipuy-ag mga buaya. Pero nag-amping siya ug luwas nga nakabalik sa lungsod. Nagmalamposon ang paningkamot sa mga tripulante sa pagsangyaw. Ang pipila nga midawat ug mga literatura sa Bibliya niadtong panahona sa ulahi nahimong mga Saksi ni Jehova.

 Dihang naayo na ang makina, mibiya ang Lightbearer sa Port Moresby ug mipaingon sa isla sa Java sa Dutch East Indies (ang dakong bahin niini gitawag karon ug Indonesia). Human mohapit sa pipila ka lugar aron mokuhag mga suplay, ang mga tripulante midunggo sa Batavia (karon, Jakarta) niadtong Hulyo 15, 1935.

 Pag-abot nila, ang usa sa mga tripulante, si Charles Harris, mibiya sa Lightbearer ug nagpabilin sa Java, diin padayon siyang nagsangyaw nga madasigon. b Siya miingon: “Niadtong panahona, igo lang ming magpahimutang ug mga literatura unya moadto na sa sunod nga lungsod. Magdala kog mga publikasyon nga Arabic, Ininsek, Dutch, Iningles, ug Indonesian. Ang mga tawo ganahang modawat sa atong mga literatura maong makapahimutang kog 17,000 ka publikasyon kada tuig.”

 Tungod sa kadasig ni Charles, namatikdan siya sa Dutch nga awtoridad. Kas-a, gipangutana sa usa ka polis ang laing Saksi nga nagsangyaw sa Java kon unsa ka daghan ang Saksi sa East Java, diin tua si Charles. “Usa ra,” mitubag ang brader. Gisingkahan siya sa polis, “Patuohon ko nimo ana?” “Seguradong daghan mong nagsangyaw didto, base sa kadaghan sa literatura nga inyong naapod-apod.”

 Gikan sa Indonesia, ang Lightbearer milawig paingon sa Singapore ug nakaabot didto pagka-Agosto 7. Sa matag dunggoanan, ang mga brader magpatokar ug girekord nga mga pakigpulong gamit ang kusog kaayong amplifier ug mga trompa sa lansa. Kini nga paagi sa pagmantala sa maayong balita sagad makakuhag dakong atensiyon. Gani, ang Singapore Free Press nagreport nga “ang mga tawo makadungog ug kusog kaayo nga tingog latas sa tubig . . . sa Miyerkoles sa gabii,” ug kini midugang: “Talagsaon to nga pakigpulong . . . nga naggikan . . . sa lansa nga ‘Lightbearer,’ nga nagpatokar dinhi sa Singapore sa girekord nga mga pakigpulong sa Watch Tower sukad sa pag-abot [sa lansa] gikan sa Australia.” Ang report nag-ingon sab nga “kon maayo ang panahon, ang maong mga pakigpulong klarong madungog latas sa tubig sa . . . tulo hangtod upat ka kilometro.”

 Samtang didto sa Singapore ang Lightbearer, si Frank Dewar mibiya para sa bag-ong asaynment. Iyang giestorya ang nahitabo: “Nagsugod mi pagpayunir sa Singapore samtang nagpuyo sa lansa. Dihang kinahanglan nang mopadayon sa paglawig ang Lightbearer, dihay gisulti si Eric Ewins nga nakapakurat kaayo nako. Iya kong giingnan: ‘Frank, miingon ka nga gusto nimong mosangyaw sa Siam (karon, Thailand). Diri ra ka taman namo mahatod. Sige, lakaw na!’ Morag dili ko katuo sa iyang gisulti. Miingon ko: ‘Pero kon dinhi manukad, dili ko katultol sa Siam!’” Gisultihan ni Eric si Frank nga makaabot siya didto kon mosakay siyag tren sa Kuala Lumpur, nga karon sakop sa Malaysia. Si Frank misunod ug mibiyahe paingon sa Kuala Lumpur ug nakaabot sa Thailand pipila ka bulan sa ulahi. c

 Samtang gilawig sa Lightbearer ang kasadpang baybayon sa Malaysia, kini midunggo sa Johore Bahru, Muar, Malacca, Klang, Port Swettenham (karon, Port Klang), ug Penang. Sa matag pantalan, ang mga tripulante magpatokar ug girekord nga mga pakigpulong bahin sa Bibliya gamit ang mga trompa sa lansa. “Bisag duna pay motugpang flying saucer, ang mga tawo mas interesado gihapon sa lansa,” miingon si Jean Deschamp, usa ka Saksi nga niadtong panahona nag-alagad sa Indonesia. Human magpatokar ug mga pakigpulong, ang mga tripulante manaog sa lansa ug magpahimutang ug mga literatura sa mga interesado.

 Gikan sa Penang, ang mga tripulante milawig latas sa Malacca Strait paingon sa Medan, Sumatra (karon, bahin sa Indonesia). Si Eric Ewins nahinumdom: “Nindot ang among pag-estar sa distrito sa Medan, ug daghan ang naminaw sa maayong balita.” Ang mga igsoon nakapahimutang ug mga 3,000 ka literatura nianang dapita.

 Samtang ang Lightbearer mipadayon sa paglawig pahabagatan, ang mga tripulante misangyaw sa dagkong pantalan sa sidlakang bahin sa Sumatra. Pagka-Nobyembre 1936, ang lansa mibalik sa Singapore, diin si Eric Ewins mibiya. Pipila ka semana sa ulahi, naminyo siya kang Irene Struys, usa ka Saksi nga nagpuyo sa Singapore. Si Eric ug Irene mipadayon pagpayunir sa Sumatra. Siyempre, ang Lightbearer nagkinahanglan nag bag-ong kapitan.

 Ang bag-ong kapitan mao si Norman Senior, nga nabansay sa pagnabigar. Miabot siya gikan sa Sydney niadtong Enero 1937. Dayon ang mga tripulante milawig gikan sa Singapore paingon sa Borneo ug Celebes (karon, Sulawesi), diin sila nagsangyaw sa daghang lugar ug nakaabot ug mga 480 kilometros gikan sa baybayon.

 Dihang ang Lightbearer miabot sa pantalan sa Samarinda sa Borneo, ang tigdumala sa pantalan wala motugot nga sangyawan sa mga tripulante ang mga tawo didto. Pero dihang gipatin-aw ni Norman ang atong buluhatong pagsangyaw, siya mikooperar ug mikuha pa ganig literatura.

 Sa laing higayon, si Norman gidapit sa usa ka lokal nga ministro sa paghatag ug pakigpulong sa ilang simbahan. Pero nagpatokar hinuon si Norman ug lima ka girekord nga pakigpulong bahin sa Bibliya gamit ang ponograpo, ug nainteres ang ministro. Mikuha pa gani siyag mga literatura para sa iyang mga higala. Pero kini lang nga ministro ang nainteres sa maayong balita. Ang ubang lider sa relihiyon wala malipay sa buluhaton sa mga Saksi ni Jehova. Nasuko sila sa walay kahadlok nga pagsangyaw sa mga tripulante ug ila pa ganing gipresyur ang mga awtoridad nga did-an ang Lightbearer sa pagdunggo sa ubang pantalan.

 Kay gipresyur sa mga lider sa relihiyon ang mga awtoridad nga did-an ang Lightbearer sa pagdunggo, kini milawig balik sa Australia niadtong Disyembre 1937. Ang mga tripulante nakaabot sa Sydney Harbor sa saktong panahon para sa kombensiyon sa mga Saksi ni Jehova niadtong Abril 1938. Kana maoy kapig tulo ka tuig sukad mibiya ang Lightbearer sa Sydney. Ang lansa gibaligya sa sayong bahin sa katuigan sa 1940 dihang gidili na ang buluhaton sa mga Saksi sa Australia. “Ang lansa dakog nalampos,” matod ni Brader Ewins, kinsa naghisgot sa iyang pag-alagad diha sa Lightbearer ingong usa sa “labing malipayong mga tuig sa akong kinabuhi.”

 Ang mga tripulante sa Lightbearer nagpugas ug binhi sa Gingharian sa lapad nga rehiyon nga dakog populasyon. Ug bisan pa sa pagsupak, ang ilang buluhaton anam-anam nga namunga. (Lucas 8:11, 15) Karon, duna nay kapig 40,000 ka magmamantala sa Gingharian sa mga lugar nga gisangyawan sa maong mga payunir. Kining pipila ka brader ug ang ilang lansa nakahimo gyod ug talagsaong buluhaton ug naghatag kanato ug maayo kaayong ehemplo!