Niadtong 2016, ang mga Saksi ni Jehova nakapribilehiyo sa pagpakita sa kaayohan sa mga video ug artikulo gikan sa website nga jw.org ngadto sa usa ka grupo sa magtutudlo sa Probinsiya sa Zamboanga del Norte, Pilipinas. Una pa niana, gibisita sa mga Saksi ang Departamento sa Edukasyon sa kaulohan niini, ang Dipolog City. Ang mga administrador nakadayeg pag-ayo sa jw.org maong ilang giimbitar ang mga Saksi nga mohatag ug 30 minutos nga presentasyon panahon sa tulo ka nagsingabot nga seminar sa mga magtutudlo gikan sa pipila ka lungsod sa Zamboanga del Norte.

Gipakita sa mga Saksi ang pipila ka video ug artikulo sa website ngadto sa mga 300 ka magtutudlo nga presente sa maong mga seminar. Ang mga magtutudlo giganahan ilabina sa topikong “Unsay Buhaton kon Dunay Utang?” Daghan kanila ang mibati nga makatabang ang maong presentasyon dili lang sa ilang mga estudyante kondili kanila usab nga mga magtutudlo. Silang tanan midawat sa tract nga Asa Makita ang Tubag sa Importanteng mga Pangutana sa Kinabuhi? nga nagpasiugda sa daghang makapainteres ug mapuslanong impormasyon diha sa jw.org. Ang ubang magtutudlo nag-download sab ug mga video.

Malamposon kaayo ang tulo ka presentasyon nga ang Departamento sa Edukasyon sa maong probinsiya nag-organisar ug dugang mga presentasyon aron tabangan ang mga 600 ka guidance counselor ug magtutudlo. Sa makausa pa, daghan ang nakaapresyar niini.

Sa ulahi, gipatin-aw sa ubang nanambong kon sa unsang paagi nakatabang nila ang presentasyon ug ang website. “Mapasalamaton kaayo ko,” miingon ang usa ka maestra. “Mapuslanon kaayo ang website sa pagtudlo sa akong mga estudyante.” Laing maestra ang miangkon: “Daghan kaayo kog nakat-onan, ilabina bahin sa pag-atubang sa stress. Dako kaayog tabang ang website, dili lang sa mga batan-on kondili sa mga edaran usab.”

Kapig 350 ka magtutudlo nga mitambong sa presentasyon bahin sa jw.org ang nangayog dugang impormasyon. Busa, gihatagan sila sa mga Saksi ug dugang mga publikasyon ug praktikal nga mga tambag gikan sa Bibliya.

Nalipay ang mga Saksi ni Jehova nga kapig 1,000 ka magtutudlo ang nakatambong sa presentasyon bahin sa jw.org didto Zamboanga del Norte ug nakakat-on kon unsa ka epektibong tabang ang website nga jw.org sa pagpanudlo. Kining hinungdanong tool sa pagpanudlo makatabang sa mga magtutudlo sa tibuok kalibotan kay nagtagana nig daghang giya bahin sa pamatasan, moralidad, ug espirituwalidad. *