Sa Australia, sama sa daghang nasod, nagkadaghan ang mga tigulang. Ang pipila sa mga tigulang nagpuyo sa mga nursing home, diin ginaatiman ang ilang panglawas ug adlaw-adlaw nga mga panginahanglan.

Siyempre, dili lang kay pisikal nga tabang ang gikinahanglan sa daghang tigulang diha sa mga nursing home. Usahay sila laayon, maguol, o mobati nga wala nay mahimo. Aron magdalag paglaom ug paghupay, ang mga Saksi ni Jehova nagabisita kada semana sa duha ka pasilidad alang sa pag-atiman sa mga tigulang didto sa Portland, lungsod sa Victoria, Australia.

Ang mga Saksi didto nagabisita sa usa ka grupo sa mga tigulang ug nakighisgot kanilag mga topiko sa Bibliya, sama sa importanteng mga hitabo sa kinabuhi ni Jesus. “Basahon namo ang mga teksto sa Bibliya ngadto sa mga tigulang,” miingon si Jason, “ug unya hisgotan namo kanila ang maong asoy.” Kay daghan sa mga manambong may sakit sa panglawas, ang mga Saksi maghatag usab ug paglaom ug pagdasig pinaagi sa paghisgot sa saad sa Diyos nga wad-on na ang sakit ug kamatayon.

“Sa primero, tagtunga sa oras lang ang among mga pagbisita, pero gusto nilang patas-an kini,” miingon si Tony, usa ka Saksi didto. “Maong karon moabot nag mga usa ka oras ang mga panaghisgot, bisag dihay tigulang nga gustog duha ka oras!” Kay ang pipila sa mga tigulang dili makakita, makabangon, o makagunit ug mga butang, ginatabangan sila sa mga Saksi panahon sa mga panaghisgot ug ginadasig nga moapil sa panaghisgot kon posible.

Sa maong mga pagbisita, ang mga Saksi ug mga tigulang manganta ug pipila ka awit sa pagdayeg sa Diyos, ug sagad ang mga tigulang mohangyog dugang pa. Usa kanila, si John, * miingon: “Ganahan mi sa inyong mga musika. Nakatabang ni namo sa pag-ila ug pagtahod sa Diyos.” Si Judith, usa ka tigulang nga dili makakita, nakasag-ulo sa tanang liriko sa iyang paboritong mga awit!

Interesado ang mga Saksi sa kaayohan sa matag tigulang. Usa ka boluntaryo nga ginganlag Brian miingon nga kon may mga tigulang nga nagsakit, ginabisita sila sa mga Saksi sa ilang kuwarto. “Makig-estorya mi nila ug komostahon namo sila. Usahay mobalik mi pagkasunod adlaw aron mahibaloan kon komosta na sila.”

Naapresyar sa daghang tigulang sa nursing home ang maong mga pagbisita. Si Peter, nga nagatambong sa panaghisgot kada semana, miingon: “Eksayted kaayo kong motambong.” Giingnan ni Judith ang iyang caregiver: “Miyerkoles na! Palihog tabangi kong mangareglar para sa pagtuon sa Bibliya. Dili ko gustong maulahi!”

Ganahan ang mga tigulang sa ilang nakat-onan, ug gibati nilang mas nasuod sila sa Diyos. Human mahisgoti ang usa sa mga pagtulon-an ni Jesus, si Robert miingon: “Wala gyod nako masabti kining tekstoha kaniadto. Karon nakasabot na ko!” Nakat-onan ni David ang kahinungdanon sa pag-ampo, ug siya miingon: “Kini nakatabang nako nga makabaton ug relasyon sa Diyos ug pinaagi niini, tinuod na siya kanako.”

Ang mga tigulang eksayted nga makakat-on sa paglaom nga gihatag sa Bibliya alang sa umaabot. “Salamat sa paghatag ninyo kanamog paghupay gikan sa Bibliya,” giingnan sa tigulang nga si Lynette ang mga Saksi. Usa pa ka tigulang ang miingon: “Gipadala mo sa Diyos nganhi kanamo!”

Ganahan kaayo si Margaret sa mga pagbisita mao nga regular na siya karong nagatambong sa mga tigom sa mga Saksi ni Jehova diha sa Kingdom Hall sa ilang lugar. Dili kini lalim para niya tungod sa iyang panglawas ug tungod kay limitado na ang iyang lihok. Miingon siya sa mga Saksi: “Gihatagan mi ninyog rason nga mabuhi pa.”

Naapresyar usab sa mga nagtrabaho didto ang mga pagbisita sa mga Saksi. Si Anna, usa ka Saksi didto, miingon: “Gidasig sa mga nagtrabaho didto ang mga tigulang nga motambong sa mga panaghisgot kay namatikdan nila nga mas malipayon ang mga tigulang inigkahuman.” Si Brian, nga gihisgotan ganiha, midugang: “Ang mga nagtrabaho didto mahigalaon ug nagakooperar. Gibuhat nila ang ilang maarangan aron makatabang.”

Ang mga pamilya sa mga tigulang nalipay sa pagkakita nga ang ilang minahal giganahan sa mga panaghisgot. Gikomendahan sa anak sa usa ka tigulang ang mga Saksi ug miingon: “Maayo kaayo ang inyong ginabuhat sa akong mama.”