Ia sinakok a pop me ie?

EWE kapas “sinakok” a popu seni ewe kapasen Krik mi wewe ngeni “mwichelap” are “mwichfengen.” A mmen fich ena it pokiten seni chék me lóóm ekkewe chón Jus ra kan mwichfengen lón ekkewe sinakok fán iten ar repwe angei emmwen are fán iten fel. Ewe Tesin Ipru ese fós usun eú sinakok, nge a mmen ffat seni néún Chón Kraist we Tesin Krik pwe aramas ra fen ákkáeá ena sókkun leeni fán iten ar repwe mwichfengen lón fansoun ekkewe aposel.

Chómmóng soukáé ra lúkú pwe ewe sinakok a poputá atunen án ekkewe chón Jus eoló lón Papilon. Ewe puk itan Encyclopaedia Judaica a erá: “Ekkewe chón eoló ra mwichfengen fán ekkóch, neman lón ewe ránin Sapat pwe repwe álleafengen án Kot we Kapas le oururufengeniir pokiten ese wor ewe imwenfel ikena, me ra nóm lón eú fénú esap pwúkútáán fénúer.” Atun ekkewe chón Jus ra ngase seni ar eoló Papilon, ra sópweló le chufengen fán iten ar repwe iótek me álleani án Kot we Kapas, iwe ra poputááni eú sinakok ewe ia ra nóm ie.

Leatun ekkewe aposel, ewe sinakok a wiliti eú mettóch mi fókkun lamot lón manawen ekkewe chón Jus me lón ar lamalam lón ekkewe leeni lón ewe Mediterranean, lón unusen Middle East, me pwal lón Israel. Professor Lee Levine seni The Hebrew University of Jerusalem, a erá: “Ewe sinakok a wiliti eú leeni fán iten káé, fán iten mwéngéén mwéngé mi pin, fán iten kapwúng, iseisen moni fán iten ekkewe mi wéúngaw, me leeni fán iten mwich me fán iten politics.” A pwal erá: “Nge met mi kon lamot, pwe minne a fis lón eú sinakok, ina fán iten fel.” Iwe sia tongeni weweiti popun Jesus a feffeiló ngeni ekkewe sinakok are imwen felikkis. (Mark. 1:21; 6:2; Luk. 4:16) Me ikenan a asukula, pesei, me pwal apéchékkúla aramas. Mwirin poputáán ewe mwichefelin Chón Kraist, ewe aposel Paulus a pwal soun afalafal lón ekkewe sinakok. Chókkewe mi sani mettóchun lúkú ra chék feiló ngeni ewe sinakok, iwe atun Paulus a tolong lón eú telinimw, lape ngeni a akkomw feiló ngeni ewe sinakok an epwe afalafal ikena.​—Föf. 17:1, 2; 18:4.