En mi Silei?
Ifa ussun ekkewe féún plak mi pwá lerásin Papilon lóóm me napanapen fférúr ra pwáári pwúngún masouen Paipel?
LÓN ewe leeni Papilon lóóm, ekkóch soukáéén pisekin chón lóóm ra kúna chómmóng chómmóng ekkewe plak mi umw ra áeá le aúetá ena telinimw. Me ren emén soukáéén pisekin lóóm itan Robert Koldewey pwe ekkena plak ra ffér lón ekkewe leenien umw mi nóm “lúkún ewe telinimw ikewe a éch pwúlún me a wor chómmóng irá ie repwe eáni émwúch.”
Makkeien chón Papilon lóóm ra pwáári pwe ekkewe souemmwenin Papilon ra pwal áeá ar kana leenien umw ren féfférún akkachofesá. Iei alon Paul-Alain Beaulieu emén sense me soukáéén uruwoon Asiria lón ewe University lón Toronto: “Chómmóng makkeien chón Papilon ra pwáári pwe ewe king a allúkú pwe chókkewe ra ú ngeni me ésúfélúngawa an kewe pisek mi pin repwe kekiló lón ewe leenien umw.” Áwewe chék, iei met eú me lein ekkena mak lemwúún King Nepukatnesar a erá: “Nireló, keniireló, apwichiir, . . . lón án ewe chón kuk leenien umw . . . féri pwe étúétúr epwe étútá, nireló me otururelong lón ewe ekkei.”
Ena pwóróus a áchema ngeni ekkewe chón állea Paipel minne a mak lón Taniel sópwun 3. Me ren ena pwóróus, King Nepukatnesar a féri eú watteen uluulun aramas seni kolt a nóm lón ewe masiesin Tura lúkún ewe telinimwen Papilon. Nepukatnesar a lingeringeriiti ekkewe úlúmén alúwél re Ipru iter Satrak, Mesak, me Apetneko ren ar rese mochen chapetiw ngeni ena uluulun, me a allúkú ar repwe “atururolong lon ewe lenien ekkei mi fokun sarara” me repwe féri pwe “pwichikaran epwe tori fän fisu seni me mwan.” Emén chónláng mi manaman a amanawer seni máló.—Tan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Eféú plak mi umw mi mak iten Nepukatnesar wóón
Ekkewe plak ra kúner lón Papilon ra pwal pwáári pwe ewe Paipel mi pwúng lón met a fósun. Chómmóng me lein ekkena plak a mak wóór ar mwareiti ewe king. Eú me lein makkan a erá: “Nepukatnesar Kingen Papilon . . . Ngang ewe king mi lapalap úa aúetá imwei imwen king mi tekia . . . Amwo mwirimwiri kewe repwe nemenem lón tori feilfeiló.” Ei a léllé ngeni ewe pwóróus a mak lón Taniel 4:30, ussun án Nepukatnesar lamalamtekia le erá: “Sap iei Papilon ewe telinimw mi lapalap üa aüetä fän ai tufich me pöchökül pwe ai lenien king, epwe pwal alinga lingen ai nemenem?”
