Än Aramas Fosfengen me Chokkewe Rese Tongeni Küner

EWE KOT MI UNUSEN TEKIA a ewisa ngeni chonläng ekkoch wis. Äwewe chök, a ewisa ngeni Jises Kraist nemenemen fönüfan me a seikatä ekkoch chonläng mi tuppwöl le ekkemmweni ewe angangen afalafal. (Pwarata 14:6) Nge ach kewe iotek repwe weneiti Jiowa chök.

Jiowa i ewe Chon “aüselinga iotek.” (Kölfel 65:2) A kan akkaüseling ngeni me pöppölüweni ach kewe iotek. Iei makkeien ewe aposel Jon ngeni nöün Jiowa kewe chon angang usun iotek: “Are sia tüngor och mine a fich ngeni letipan, a aüselingakich. Are sia silei pwe a aüselingakich, ese lifilifil met sia eäni tüngor, sia pwal silei pwe sia angei met sia tüngor ngeni.”—1 Jon 5:14, 15.

Ekkewe chonläng mi tuppwöl rese mochen sipwe fos are iotek ngeniir. Ra weweiti me älisatä än Kot kokkotun iotek, me fän ekkoch ra kapachelong lon ach kewe iotek. Ifa usun? Iwe, äwewe chök, atun ewe soufos Taniel a iotek ngeni Jiowa usun taloon Jerusalem, Kot a pölüweni ren an  tinalo ewe chonläng Kapriel pwe epwe apöchökküla.—Taniel 9:3, 20-22.

Ekkewe mi Mälo Ra Tongeni Fos Ngenikich?

Itä sipwe sotun fos ngeni ekkewe mi mälo? A wor chommong pworaus usun än aramas itä fosfengen me ekkewe mi mälo. Äwewe chök, emön fin Ireland a chuuri emön sou awarawar mi ereni pwe a fos ngeni pwülüwan we itan Fred pwinin nänew. Nge Fred a mälo fitu wiik ra lo. Ei sou awarawar a ereni alon Fred, nge pwülüwan we a lükü pwe i chök a silei ekkena pworaus. Epwe mecheres än neminna epwe lükü pwe a wor ngünün Fred a chüen manau, iwe, a sotun fos ngeni me ren ewe sou awarawar. Iwe nge, ena pworaus ese tipeeü ngeni met Paipel a apasa usun napanapen ekkewe mi mälo.—Nengeni ewe pwoor fan.

Iwe mwo, epwe ifa usun sipwe äweweei ena sokkun pworaus? Iwe, ekkewe chonläng mi ngaw ra ewiliirelo ngeni ekkewe mi mälo, äwewe chök, usun Fred, pwe repwe otupu aramas. Met popun? Pun ra mochen okullu aramas seni met Paipel a apasa me apwangapwangaalo ar lükü me lükülük woon Jiowa. Esor tipemwaramwar pwe Setan me ekkewe chonläng mi ngaw ra okkotupu aramas ren “sokkun manaman meinisin, pwal esisin me minen aweitifengen mi chofona, o pwal sokkun minen otupu mi ingau meinisin ren ir ekkewe repwe poutmwalilo.”​—2 Tesalonika 2:9, 10, TF.

 Pwüngün, ekkewe sou awarawar me chiener kewe ra wesewesen lükü pwe ra fosfengen me ekkewe mi mälo. Nge ren enletin, ra wesewesen fos ngeni chonläng mi ü ngeni Jiowa. Mi pwal wor chokkewe mi lükü pwe ra fel ngeni Kot, nge ese pwüng. Iei än ewe aposel Paul öüröür, a makkeei: “Mine chon lükün ra eäni asor won ekewe rongen asor ra asor ngeni ekewe anün rochopwak, nge sap ngeni Kot.”​—1 Korint 10:20, 21.

Sia tongeni iotek ngeni Ewe mi Unusen Tekia, ewe mi tongekich me tümünükich, iwe, itä pwata sipwe iotek ngeni emön lükün i? Paipel a alükülükükich pwe Jiowa “a nenengeni unusen fanüfan, pwe epwe apöchöküla chokewe mi fang ngeni unusen letiper.”​—2 Kronika 16:9.

[Ekis Pwóróus lón pekin taropwe 9]

Sia tongeni iotek ngeni Ewe mi Unusen Tekia, ewe mi tongekich me tümünükich, iwe, itä pwata sipwe iotek ngeni emön lükün i?

[Pwóór/Sasing lón pekin taropwe 8, 9]

Pworaus mi Pwüng me Pworaus mi Mwääl

PWORAUS MI PWÜNG: SETAN WESEWESEN EMÖN

“Satan a püsin siwili lapalapan usun itä nge i eman chon längin saram!”​—2 Korint 11:14.

“Oupwe amolakemi o mamasa, pun Tefil, ewe chon oputakemi, a fetalfeil usun eman laion mi wörüwör, nge a kütta iö epwe oromala.”​—1 Piter 5:8.

“Are eman a sopwela le föri tipis, i nöün Tefil, pun Tefil a tipis seni lepoputän.”​—1 Jon 3:8.

“Iei mine oupwe aleasochisi Kot. Oupwe ü ngeni Tefil, iwe, epwe sü senikemi.”​—Jemes 4:7.

“Ewe Tefil . . . i eman chon niela aramas seni lepoputän, esap fokun nom won pekin let, pun esap wor let ren. Lupwen a kapas chofona, a chök fos lon örünian, pun i eman chon chofona me semen chon chofona”​—Jon 8:44.

PWORAUS MI MWÄÄL: ATUN ARAMAS MEINISIN RA MÄLO, A TOWU SENIIR OCH NGÜN ESE TONGENI MÄLO

“Kopwe mongö anom fän molonom tori om kopwe wiliti pwül ka för seni. Pun pwül en, iei popun om kopwe wiliti pwül.”​—Keneses 3:19.

“Pun ekewe chon manau ra silei pwe repwe mäla. Nge ekewe sotup resap silei och mettoch.”​—Än Salomon Afalafal 9:5.

“Kopwe achocho le angang lon mettoch meinisin ka föri, pun esap wor och angang, ekiek, silelap ika tipachem lon lenien sotup ewe ia kopwe feila ie.”​—Än Salomon Afalafal 9:10.

“Lupwen ra mäla, ra liwiniti pwül. Lon ewe chök rän ar kewe akot meinisin ra tala.”​—Kölfel 146:4.

PWORAUS MI PWÜNG: NÖÜN JIOWA KEWE CHONLÄNG MI TÜPPWÖL RA TÜMÜNÜKICH

“Nöün ewe Samol mi Lapalap chon läng a nom pwelin ünükün chokewe mi niueiti i o angaseer seni feiengau.”​—Kölfel 34:7; 91:11.

“Iwe, nge met ren ekewe chon läng? Ir meinisin ngün mi angang ngeni Kot. Kot a tiniirela pwe repwe alisi chokewe repwe küna manau.”​—Ipru 1:14.

“Mürin üa küna pwal emon chon läng mi äkkäs fän läng, a uwei ewe Pworausen Manau esemüch pwe epwe arongafeili ngeni chon fonüfan, ngeni sokun mwich me ainang, kapas me mwü meinisin. A apasa ren mwelian mi leüömong, ‘Oupwe asamolu Kot o mwareiti an tekia!’”​—Pwarata 14:6, 7.

PWORAUS MI MWÄÄL: JISES A LÖLLÖ NGENI KOT

“Üa mochen oupwe weweiti pwe Kraist möküren mwän meinisin, nge mwän möküren fefin, nge Kot möküren Kraist.”​—1 Korint 11:3.

“Lupwen ekewe mettoch meinisin ra nom fän nemenien Kraist, mürin ewe Nau epwe püsin anomu i fän nemenien Kot, i ewe mi anomu mettoch meinisin fän nemenian. Iwe, Kot epwe unusen nemeni mettoch meinisin.”​—1 Korint 15:28.

“Enlet, üpwe wesewesen ürenikemi: Ewe Nau esap tongeni föri och ren püsin i, a chök föri met a küna pwe Saman a föri.”​—Jon 5:19.