PWÓRÓUS LÚKÚNPÉÉN | MI WOR LAMOTEN IÓTEK?
Mi Wor Emén mi Aúseling?
Ekkóch aramas ra meefi pwe iótek a chék olusaaló ach fansoun pún ese wor emén mi aúseling. Ekkóch ra iótek nge ra meefi pwe ese pélú ar iótek. Fán eú, emén mi lúkú pwe ese wor Kot, a pwisin ekiekietá napanapen Kot me iótek: “Kopwe chék ekis mwéngúnúngún ngeniei.” Nge a erá pwe Kot a chék chúen “fanafaneló.”
Iwe nge, Paipel a alúkúlúkú ngenikich pwe a wor emén Kot me i a aúseling iótek. Iei met alon Paipel ngeni eú mwichen aramas mi manaw lóóm lóóm: “Kot epwe fokun ümöümöch ngenikemi, lupwen a rong ämi siö. Iwe, lupwen a rongorong, epwe pälüenikemi.” (Aisea 30:19) Pwal eú wokisin lón Paipel a erá pwe Kot “a pwapwa ren än ekewe chon wenechar iotek.”—Än Salomon Fos 15:8.
Jesus a iótek ngeni Seman we, me Kot a pwapwa le “aüselinga i.”—Ipru 5:7
A pwal mak lón ewe Paipel pwóróusen chókkewe Kot mi aúselinga ar iótek. Eú wokisin a apasa pwe Jesus a “tüngor . . . ngeni Kot, ewe mi tongeni amanaua i seni mäla” me Kot a pwapwa le “aüselinga i.” (Ipru 5:7) Sia tongeni kúna pwóróusen pwal ekkóch iótek me lón Taniel 9:21 me 2 Kronika 7:1.
Iwe, pwata ekkóch aramas ra meefi pwe ese pélú ar iótek? Ren an epwe pélú ach iótek, a lamot sipwe chék iótek ngeni Jiowa, * ewe Kot Paipel a fós usun, nge esap ngeni ekkóch kot are pwal ach kewe lewo. Kot a pwal mochen ach sipwe “tüngor och mine a fich ngeni letipan,” weween minne mi pwapwaiti. Kot a alúkúlúkú ngenikich pwe ika a ina usun ach iótek, epwe “aüselingakich.” (1 Johannes 5:14) Iwe ren an epwe wor chón aúselinga ach iótek, mi lamot sipwe sileeló ewe Kot Paipel a fós usun me káé ika ifa letipan.
Chómmóng aramas ra lúkú pwe iótek esap chék ina eú kinikinin mwékútúkútún lamalam nge Kot a fen wesewesen aúselinga iótek me pélúweniir. Emén mwán seni Kenya itan Isaac, a apasa: “Ua iótek me tingor álillis pwe upwe weweiti Paipel. Ekiseló mwirin, a wor emén a chuuriei me awora ewe álillis ua osupwangan.” Emén fefin seni Philippines itan Hilda a mochen úkútiw le ún suupwa. A sótuni fán chómmóng nge ese sópwéch, iwe pwúlúwan we a ereni, “Pwata kese sótun iótek ngeni Kot pwe epwe álisuk?” A féri ena me apasa: “Ua fókkun ingeló ren ifa usun A álisiei. Usun itá ai mochen ún suupwa a poputá le sú seniei. Iwe ua tufichin úkútiw.”
Kot a itá mochen álisuk ren ekkewe mettóch ka mochen lón manawom nge mi tipeeú ngeni letipan?
^ Jiowa, ina iten Kot we me ren ewe Paipel.
