KAPAS EIS 3
Ifa Usun Upwe Tongeni Fós Ngeni Semei me Inei?
MET KOPWE FÉRI?
Anchangei mwo ei: Geoffrey, ierin 17 a kerán chék wes le féri an kewe angangen lón imw leolowasen Aúlúngát, me a ekieki pwe a fich an epwe asésé pún a fen angang weires! A onnei ewe TV me únnoló wóón an we sea a mmen sani.
Nge lón ena atun seman we a tolong lón ewe ruumw me a song.
“Geoffrey! Ka pwal chék asolapa fansoun le katol TV, nge itá kopwe álisi pwiim nan kúkkún ren an kenan lesen? Kese fókkun féfféri met ú kan erenuk!”
Geoffrey a erá: “A pwal ló.” Nge seman we a rong.
Seman we a chimwe ngeni me erá: “Met ena mwa ke erá átenan?”
Geoffrey a olupaatá mesan me erá fán ngasallap: “Ese ii wor, Papa.”
Iwe seman we a fókkun song. A erá fán lingeringer: “Woi kete kan wato ngiingiumw!”
Ika en Geoffrey, itá met kopwe féri pwe esap wor ánini?
KAÚLÓ ME EKIEKI!
Óm fóffós ngeni semom kewe me inom a usun óm uwei efóch tarakú. Ika ka sereni efóch al mi eppetiló, ka pwal tongeni kútta efóch al kopwe ssá wóón.
ÁWEWE CHÉK:
Emén nengngin itan Leah a apasa: “A weires ai upwe fóffós ngeni semei we. Fán ekkóch a ttam ai fós ngeni nge mwirin a ké ngeniei: ‘Woi, omusaaló, ke fósoto?’”
A WOR ÚLÚNGÁT METTÓCH LEAH A TONGENI FÉRI.
-
Epwe chúwérúwér ngeni seman we.
Me erá: “Mwa komwan rongorong pwe a mmen lamot!”
-
Esap chúen fós ngeni seman we.
Fangetá le fós ngeni seman we usun an we osukosuk.
-
Epwe eppiietásefál atun mi fich.
Leah epwap fós ngeni seman we, are epwe tongeni makke ngeni an kewe osukosuk lón taropwe.
Menni leir kopwe pese ngeni Leah an epwe féri?
EKIEKI MWO: Semen Leah we a mwo túmúnúngawoló ina popun ese áteneki án Leah kewe fós. Ina minne ika Leah a filatá Nampa 1, neman seman we epwe máirú ika pwata a chúwérúwér ngeni. Neman seman we esap fen mochen rongorong alon. Pwal och, ese pwáraatá súfél. (Efisos 6:2) Ren enletin, esap ina met epwe asopwéchú.
Kútta pwal eú alen óm kopwe tongeni fós ngeni semom kewe me inom fán kinamwe, usun chék lamoten óm kútta pwal efóch al ika ka sereni efóch mi eppetiló
Inaamwo ika a mecheres Nampa 2, nge esap ina eú alen tipachem. Pwe ren an epwe tawe án Leah we osukosuk, a lamot epwe fós ngeni seman we. Nge ika seman we epwe álisi, a lamot epwe silei met a fiffis lón manawan. Esap tongeni pwák ika a chék fanafaneló.
Me ren Nampa 3, Leah ese fangetá inaamwo ika a wor eppetin ar fósfengen. A chúen kútta alen an epwe fós ngeni seman we. Nge ika Leah a filatá le makke ngeni seman we neman epwe mwittir ekinamwei letipan.
Ika Leah a mak taropwe epwe ffat met a mochen pwári. Atun seman we epwe álleani, epwe silei met néún na a mochen ereni me epwe álisi i le weweiti an na osukosuk. Ina popun Nampa 3 a álilliséch ngeni Leah me seman we. Ese lifilifil ika Leah a makke ngeni seman we are neféúféú ngeni, nge ei mettóch a tipeeú ngeni án Paipel kapasen fén pwe “sipwe fokun achocho ngeni mine epwe afisätä kinamwe.”—Rom 14:19.
Met Leah a pwal tongeni féri?
Ekieki pwal eú mettóch me mwirilóón óm na pesepes.
TÚMÚNÚ PWE RETE WEWENGAWEITI ALOM
Chemeni pwe esap taitap iteitan met ka apasa me met semom kewe me inom ra ekieki usun alom.
ÁWEWE CHÉK:
Semom kewe me inom ra eisinuk ika pwata ka otumwutumw. Ka erá: “Use pwal mochen erá.”
Nge neman me ren semom kewe me inom ka erá: “Use lúkúlúk wóómi ai upwe pwár ngenikemi. E fen éch upwe ereni chienei kewe lap senikemi.”
Anchangei pwe ka kúna eú watteen osukosuk nge semom kewe me inom ra mochen álisuk. Nge ka ereniir: “Oute pwal ii lólilen. Ngang mi tongeni pwisin pwákini.”
-
Neman met semom kewe me inom ra rong?
-
Eli met mi kon múrinné kopwe erá?
