Premye let pour bann Korentyen 4:1-21
4 Dimoun i devret vwar nou konman bann serviter* Kris ek administrater sen sekre Bondye.
2 Deplis, bann met i ekspekte ki zot bann administrater i fidel.
3 I pa vreman enportan pour mwan si zot ouswa en tribinal* imen i ziz mwan. Anfet, mon pa ni menm ziz mon lekor.
4 Parski mon konsyans i kler, me sa pa neseserman vedir ki mon en dimoun drwat, Zeova* i sa enn ki ziz mwan.
5 Alor, pa bezwen ziz personn avan letan i arive, plito espere ziska ki Senyer i vini. I pou met o kler keksoz ki kasyet dan fernwanr e i pou fer konnen sa ki dan leker dimoun. Apre Bondye pou felisit sakenn dapre sa ki i merite.
6 Aprezan mon bann frer, mon’n aplik sa bann keksoz lo mwan ek Apolos pour zot prop dibyen, ki atraver nou legzanp zot kapab aprann sa lareg: “Pa bezwen al pli lwen ki sa ki’n ganny ekrir,” pour ki zot pa vin orgeye* e fer lapreferans pour enn plis ki lot.
7 Parski lekel ki fer ou diferan avek ou kanmarad? Anfet, ki ou annan ki ou pa’n gannyen? Si ou’n ganny li, akoz ou bezwen fer vantar dan zar konmsi ou pa’n gannyen?
8 Eski zot in fini ganny tou sa ki zot bezwen? Eski zot in fini vin ris? Eski zot in fini vin lerwa e konmans dirize san nou? Mon ti a prefere si i ti leka pour ki nou osi nou vin lerwa e nou dirize avek zot.
9 Parski i paret mwan ki Bondye pou fer nou, bann zapot, pas dernyen dan sa legzibisyon konman bann zonm ki’n ganny kondannen amor, parski nou’n vin en spektak pour lemonn, bann lanz ek dimoun.
10 Nou parey bann enbesil akoz Kris, me zot zot krwar zot saz akoz Kris. Nou pa for me zot zot krwar zot for, zot ganny onore me nou nou ganny dezonore.
11 Ziska la konmela, nou kontinyen lafen, swaf, napa lenz,* ganny bate, napa landrwa reste e
12 nou travay dir avek nou de lanmen. Kan nou ganny ensilte, nou beni, ler nou ganny persekite, nou andire avek pasyans,
13 kan dimoun i kalonmnyen nou, nou reponn zantiman e ziska konmela, nou’n ganny konsidere konman salte ek depouy sa lemonn.
14 Mon pa pe ekri sa bann keksoz pour fer zot onte, me pour konsey zot konman mon bann zanfan ki mon kontan.
15 Parski menm si zot annan 10,000 dimoun* pour ansenny zot lo Kris, zot napa bokou papa, parski an sa ki konsern Kris, mon’n vin zot papa parski mon ti anons zot sa bon nouvel.
16 Alor, mon sipliy zot, swiv mon legzanp.
17 Sanmenm rezon mon pe anvoy Timote kot zot, parski i mon garson ki mon kontan e ki fidel dan Senyer. I pou rapel zot mon bann metod an rapor avek Kris Zezi, zis parey mon pe ansennyen partou dan bann kongregasyon.
18 Serten in vin orgeye* parski zot krwar ki mon pa pou vin kot zot.
19 Me si Zeova* i permet, mon pou vin kot zot byento e mon pa pou anvi konn sa ki sa bann dimoun orgeye* i annan pour dir me plito si zot annan pwisans Bondye.
20 Parski Rwayonm Bondye napa nanryen pour fer avek sa ki en dimoun i dir me i plito annan pour fer avek pwisans Bondye.
21 Ki zot prefere? Eski mon devret vin kot zot avek en roten ouswa avek lanmour ek ladouser?
Bann not
^ Oubyen “asistan.”
^ Oubyen “lakour.”
^ Vwar Leksplikasyon bann mo.
^ Oubyen “anfle avek lorgey.”
^ Oubyen “touni.”
^ Oubyen “gardyen.”
^ Oubyen “anfle avek lorgey.”
^ Vwar Leksplikasyon bann mo.
^ Oubyen “anfle avek lorgey.”
