Touzour eksprim lapresyasyon
Sekre 3
Touzour eksprim lapresyasyon
KI LABIB I DIR? “Dan tou sirkonstans remersi Bondye.”—1 Tesalonisyen 5:18.
KI SA DEFI? Nou antoure avek bann dimoun ki arogan e engra e nou kapab konmans fer parey zot. (2 Timote 3:1, 2) An plis ki sa, nou kapab santi nou oblize pour azout bokou plis aktivite dan nou progranm byen sarze. Nou bann problenm i kapab sitan fatig nou oubyen nou telman pe konsantre lo ki mannyer nou kapab benefisye personnelman ki fer nou napa ase letan pour apresye sa ki nou deza annan oubyen pour eksprim lapresyasyon pour sa ki lezot i fer pour nou.
KI OU KAPAB FER? Pran letan pour medit lo bann bon keksoz ki ou kontan fer la konmela. I vre, ou kapab santi ki ou sarze avek problenm, me konsider legzanp Lerwa David. Parfwa i ti santi li deprimen e konpletman dekouraze akoz problenm. Me kantmenm sa, dan son lapriyer avek Bondye i ti dir: “Mon’n medit lo tou ou bann aktivite; mon’n volonterman kontinyen montre mwan konsernen avek travay ou lanmen.” (Psonm 143:3-5) Malgre son bann problenm, David ti touzour rekonesan e i ti toultan kontant li avek sa ki i ti annan.
Mazin tou sa ki lezot in fer pour ed ou e demontre lapresyasyon pour zot zefor. Zezi in kit en legzanp remarkab dan sa domenn. Par egzanp, kan son zanmi Mari ti vid en lesans ki ti kout ser lo son latet ek son lipye, serten dimoun ti demande: “Akoz gaspiy sa lesans koumsa?” * Sa bann dimoun ki ti pe kritik Mari ti santi ki sa lesans ti’n merit ganny vann e donn sa larzan avek bann dimoun pov. Zezi ti reponn: “Les li trankil, akoz zot pe trakas li?” Apre i ti azoute: “I’n fer sa ki i ti kapab.” (Mark 14:3-8; Zan 12:3) Dan plas port latansyon lo sa ki Mari pa ti fer, Zezi ti eksprim son lapresyasyon pour sa ki i ti fer.
Serten dimoun i apresye zot fanmir, zanmi oubyen lezot benediksyon selman apre ki zot i nepli la. Ou kapab evite pas dan en tel sityasyon tris par reflesir lo bann bon keksoz ki fer ou kontan la konmela! Akoz ou pa mazin lo bann keksoz ki ou apresye oubyen fer en lalis sa bann keksoz lo papye?
Vi ki tou “don ekselan” i sorti kot Bondye, i pou byen si nou eksprim nou lapresyasyon anver li dan lapriyer. (Zak 1:17) Si nou fer sa regilyerman, sa pou ed nou aprann konman pour touzour demontre lapresyasyon e pour kontant nou avek sa ki nou annan.—Filipyen 4:6, 7.
[Not anba lo paz]
^ par. 6 Dan premye syek, vid lesans lo latet en envite ti en aksyon ki ti demontre lospitalite; e vid lesans lo lipye ti demontre limilite.
[Portre lo paz 6]
Eski ou eksprim lapresyasyon pour sa ki lezot i fer pour ou?