Eski tou Kretyen i vreman Kretyen?

KI KANTITE Kretyen i annan dan lemonn? Dapre sa liv Atlas of Global Christianity, i ti annan apepre 2.3 bilyon Kretyen dan lemonn antye an 2010. Me sa menm liv i osi dir ki sa bann dimoun ki dir zot Kretyen zot dan 41,000 diferan lorganizasyon relizye e sak sa bann lorganizasyon i annan zot prop krwayans ek lareg lo konportman. I pa drol alor ki dimoun an zeneral i konfize e menm dezapwente avek sa sitan kantite larelizyon Kretyen. Tre probab zot demann zot lekor: “Eski tou sa ki dir zot Kretyen i vreman Kretyen?”

Annou get keksoz dan en lot fason. Meton en dimoun pe vwayaz dan en lot pei, i normal pour en zofisye sa pei demann li ki son nasyonalite. Sa dimoun pou osi bezwen montre serten dokiman par egzanp en paspor pour prouv son lidantite. Pareyman, i pa sifi pour en vre Kretyen zis dir ki i annan lafwa dan Zezi Kri. I bezwen annan lezot laprev ki pou idantifye li konman en vre Kretyen. Me kwa sa sa bann lezot laprev?

Premye fwa ki sa term “Kretyen” ti ganny servi, sa ti apre lannen 44 N.L. Lik, en istoryen ki ti osi en ekriven Labib ti dir: “Se la Antyos ki pour premye fwa bann krwaryan ti ganny apel[e] Kretyen.” (Akt 11:26) Remarke, bann ki ti apel Kretyen ti son bann disip e zot ti krwar dan Zezi. Kwa ki fer en dimoun en disip Zezi Kri? The New International Dictionary of New Testament Theology i eksplike: “Swiv Zezi konman enn son disip i vedir sakrifye son lavi san okenn kondisyon . . . pour tou son lavi.” Alor, en vre Kretyen i enn ki swiv antyerman e san okenn kondisyon lansennyman ek lenstriksyon ki Zezi, Fondater larelizyon Kretyen ti donnen.

Eski i posib pour idantifye bann vre disip Zezi ozordi parmi tou sa kantite dimoun ki dir zot Kretyen? Ki mannyer Zezi li menm ti dir nou pou kapab idantifye son bann vre disip? Nou envit ou pour egzamin larepons sa bann kestyon ki Labib i donnen. Dan sa bann lartik ki swiv, nou pou diskit lo senk keksoz ki Zezi ti dir ki montre ki savedir en Kretyen e ki bann karakteristik ki pou ed nou idantifye zot. Nou pou vwar ki mannyer bann Kretyen dan premye syek ti demontre sa bann karakteristik. Nou pou osi egzaminen lekel parmi sa kantite dimoun ki dir zot Kretyen ozordi ki pe vreman demontre sa bann karakteristik vre Kretyen.