Sa Dis Komannman i bann lalwa ki Bondye ti donn nasyon Izrael dan lepase. Sa bann lalwa i osi ganny apele sa Dis Parol, ki ganny tradwir literalman sorti dan sa lekspresyon Ebre ʽaseʹreth had·deva·rimʹ. Sa lekspresyon i ganny mansyonnen trwa fwa dan Pantatek (Pentateuch oubyen Torah), sa premye senk liv Labib. (Egzod 34:28; Deterononm 4:13; 10:4) Son lekspresyon ekivalan an Grek i deʹka (dis) loʹgous (parol), ki’n donn sa term “Decalogue” an Angle.

 Bondye ti met sa dis komannman lo de plak ros e i ti donn Moiz ki ti son profet, lo Montanny Sinai. (Egzod 24:12-18) Sa Dis Komannman i trouve dan Egzod 20:1-17 e dan Deterononm 5:6-21.

•  Sa Dis Komannman

•  Akoz sa Dis Komannman pa toultan dan menm lord?

•  Ki bi sa Dis Komannman?

•  Eski bann Kretyen i bezwen obzerv sa Dis Komannman?

•  Eski sa Dis Komannman i ankor valab ozordi?

•  Bann prensip ki sorti dan sa dis Komannman i trouve dan Nouvo Testaman

1.   Ador zis Zeova.​—Egzod 20:3.

2.   Pa servi oubyen ador zidol.​—Egzod 20:4-6.

3.   Pa mank respe anver non Bondye.​—Egzod 20:7.

4.   Rapel zour saba.​—Egzod 20:8-11.

5.   Respekte ou paran.​—Egzod 20:12.

6.   Pa komet mert.​—Egzod 20:13.

7.   Pa komet adilter.​—Egzod 20:14.

8.   Pa vole.​—Egzod 20:15.

9.   Pa donn fo temwannyaz.​—Egzod 20:16.

10.   Pa annan lanvi pour keksoz lezot.​—Egzod 20:17.

 Dan Labib, napa en nimero pour sak komannman. Anfet, i annan diferan lopinyon dan ki lord bann komannman i devret ganny plase. Sa fason ki sa Dis Komannman in ganny plase pli anler i sa laranzman ki nou pli abitye avek. Par kont, serten i plas sa Dis Komannman dan en lord diferan. Sa diferans dan lafason ki sa Dis Komannman i ganny plase i enkli premye, dezyenm ek dernyen komannman. a

 Sa Dis Komannman ti form parti Lalwa Moiz. Sa lalwa ti enkli plis ki 600 komannman e i ti form parti en lagreman ouswa lalyans ant Bondye ek ansyen nasyon Izrael. (Egzod 34:27) Bondye ti promet pep Izrael ki zot ti pou prospere si zot ti obei lalwa Moiz. (Deterononm 28:1-14) Par kont, bi prensipal lalwa ti pou prepar bann Izraelit pour sa Mesi ouswa Kris ki ti’n ganny promet.​—Galat 3:24.

 Non. Bondye ti donn son lalwa enkli sa dis komannman espesyalman avek ansyen nasyon Izrael. (Deterononm 5:2, 3; Psonm 147:19, 20) Bann Kretyen pa oblize swiv Lalwa Moiz e menm bann Kretyen Zwif ti ganny “libere avek Lalwa.” (Romen 7:6) b Lalwa Moiz ti ganny ranplase par “lalwa Kris,” ki enkli tou sa ki Zezi ti dir son bann disip pour fer.​—Galat 6:2; Matye 28:19, 20.

 Wi. Parski sa dis komannman i revel panse Zeova, ki kapab benefisye nou si nou etidye zot. (2 Timote 3:16, 17) Sa dis komannman i baze lo bann prensip ki pou toultan azour. (Psonm 111:7, 8) Anfet, Plizyer sa bann prensip i baz lansennyman ki trouve dan Nouvo Testaman. Vwar “ Bann prensip ki sorti dan sa dis komannman i trouve dan Nouvo Testaman.”

 Zezi ti montre ki Lalwa Moiz an antye ki enkli sa Dis Komannman i baze lo de komannman fondamantal. I ti dir: “Ou devret kontan Zeova ou Bondye avek tou ou leker, avek tou ou nanm e avek tou ou lespri.’ Sa i premye komannman e sa enn pli enportan. Sa dezyenm, parey sa premye, i koumsa: ‘Ou devret kontan ou prosen parey ou kontan ou prop lekor.’ Lalwa antye ek lansennyman bann Profet i baze lo sa de komannman.” (Matye 22:34-40) Alor menm si bann Kretyen pa oblize obzerv Lalwa Moiz, zot swiv sa komannman pour kontan Bondye ek zot prosen.​—Zan 13:34; 1 Zan 4:20, 21.