Bepasi ba eloko a weya ya bodun ba 3 000 la mimbu bena be so̱be̱ o mbu má 2012 bubise̱ bamuwaso ba mawase̱ longe̱ la bato ba kwaṅ tongwea na jokwa la belongisan na bewa, na mambo mape̱pe̱ ba tano̱ be̱ ba bolane̱. Nje e ta tobotobo o ben beso̱yedi e? Seto̱ bepasi ba weya mo̱me̱ne̱, nde nje e tilabe̱ oten.

Ponda bamuwaso ba tongwe̱le̱no̱ o lata be bepasi ba weya, ba we̱li o langa oten tila la Bonakanaan la kwaṅ. Di ta nde ná: “Esbaal Ben [mun’a] Beda.” Nged’a boso nin bamuwaso ba maso̱no̱ din dina di tilabe̱ o ewa ya kwaṅ.

Nde, Bibe̱l e makwalea ońola Esbaal nupe̱pe̱​—nu ta nde mun’a Kiṅe̱ Saul mō̱. (1 Myan. 8:33; 9:39) Yosef Garfinkel ńadibie̱ la nin wase mō̱, ńena nu no̱ngi dongo o to̱to̱be̱ la yen ewa o wase, mo̱ ná: “Nika ńe mweńa o bia ná din dina la Esbaal di maso̱be̱ o Bibe̱l, tatan pe̱ o muso̱ngi ma mambo maso̱be̱ na bamuwaso nde o pambo ponda me̱ne̱ ńa janea la Kiṅe̱ David.” Bō̱ ba mo̱nge̱le̱ ná di dina di ta nde dina la tobotobo la ni pambo a ponda. Ben beso̱yedi be nde eyembilan epe̱pe̱ e malee̱ ne̱ni muwaso mu mabamse̱no̱ nje e tilabe̱ o Bibe̱l!

O Bibe̱l, mun’a Saul Esbaal a mabelabe̱ pe̱ ná Isboset. Ońola nje ba sumono̱ “baal” nde ba we̱le̱ “boset” e? (2 Sam. 2:10) Bamuwaso ba makwala ná: “Mutiled’a kalat’a Samuel ńambusa a bangi bolane̱ dina la Esbaal ońolana di ta jo̱nge̱le̱ Bonaisrael Baal, loba la mùdi lena Bonakanaan ba tano̱ bowe̱. Nde dina la bosoboso . . . di kombabe̱ o Bibe̱l o Kalat’a Myango.”