Yesu okwe̱le̱ bato ná ba be̱ musango. Nde buńa bō̱, a langwedi bokwedi bao ná: “Lo s’o̱nge̱le̱ ná na po̱i nde o wana musango o wase; na si po̱i o wana musango, nde po̱. Ebanja na po̱i o wana jabane̱ oteten a moto na sango ao, mun’a muto na ńango ao, mukoa na ńango ńa diba. (Mat. 10:34, 35) Nje Yesu a tano̱ a pula kwala e?

Yesu a si ta a pula wana diwanje oteten a belongi ba mbia, nde a ta a bia ná belēdi bao be mende̱ wana diwanje o mbia mō̱. Ońola nika nde ba bena ba mapule̱ be̱ bokwedi ba Kristo, ba dubisabe̱ pe̱ bangame̱nno̱ bia ná belongi babu ba mbia be si me̱nde̱ bwane̱ bedomsedi babu muńe̱nge̱. Ponda iwo̱, mome abu to̱ munj’abu nu titi o mbale̱, to̱ belongi ba mbia mabu bepe̱pe̱ be ná be te̱nge̱ne̱ babo̱ na nik’e bola ná e be̱ babo̱ ndutu o bupe̱ belēdi ba Kristo na jemea.

Bibe̱l e mo̱me̱le̱ kriste̱n ná i “be̱ musango na bato be̱se̱.” (Rom. 12:18) Nde belēdi ba Yesu be ná be be̱ ka “po̱” o mbia mō̱. Nika e mapo̱ nde ponda ńena elong’a mbia ewo̱ e makasano̱ belēdi ba Yesu nde bane̱ ba banga mo̱. Nik’e bolan te̱, be belongi ba mbia, be matimbise̱le̱ nde babo̱me̱ne̱ “basingedi” ba nu ńena ńe o jokwe̱ mbale̱.—Mat. 10:36

Kriste̱n yena i maje̱ na belongi ba mbia bena be titi mboṅ a Yehova ye ná i so̱be̱ o bete̱medi bena be mawe̱le̱ ndolo ba be̱nedino̱ Yehova na Yesu o kekise. K’eyembilan, belongi babu ba mbia bena be titi mboṅ a Yehova be ná be tute̱le̱ babo̱ ná ba bolise̱ ngando ni mate̱nge̱ne̱ bete̱sedi ba Bibe̱l. E me̱nde̱ so̱ pula ná ba po̱se nja ba mapulano̱ do̱lisane̱. Yesu mo̱ ná: “To̱ nja nu to̱ndi sango to̱ ńango buka mba a s’angame̱n mba.” (Mat. 10:37) Nde Yesu a si a pula kwala ná moto a mapula te̱ be̱ mokwedi dao, a s’angame̱n pe̱ to̱ndo̱ bayedi babu. O diwengisan a ta nde a bonde̱ mweńa ma po̱so̱ nje ye mweńa o longe̱. Yete̱na belongi basu ba mbia be te̱nge̱ne̱ biso̱ ná di si bolea pe̱ Yehova, di mabenga te̱ nde o to̱ndo̱ babo̱, nde di memba ná ndolo di be̱nedino̱ Yehova nde e be̱n epol’a boso.

Esibe̱ penda, belongi basu ba mbia be mate̱nge̱ne̱ te̱ biso̱, nik’e masengise̱ biso̱ sese jita. Nde bokwedi ba Yesu ba si madimbea ben byala bao ná: ‘To̱ nja nu si mano̱nge̱ ebongo ao ya konjo, nde a bupe̱ mba, a s’angame̱n mba.”(Mat. 10:38) Nika e mapula so̱ nde kwala ná, kriste̱n e me̱ne̱ nde̱ mitakisan ma mbia mao ka dongo diwo̱ la mitakisan bokwedi ba Yesu beno̱ be̱be̱ o lembe̱. O mulemlem ma ponda, ba pite̱ ná bedangwedi babu ba bwam be me̱nde̱ tute̱le̱ belongi babu ba mbia o tukwa mo̱nge̱le̱ na wasa pe̱ jokwa Bibe̱l.—1 Pet. 3:1, 2.