Longe̱ la ndabo a mbia na mako̱m
Bato jita ba si mawe̱le̱ kombe̱ mulatako ma bwam na bane̱. Jombweye so̱ te̱ bete̱sedi ba Bibe̱l bō̱ be ná bongwane̱ wa o bata be̱ne̱ mulatako ma bwam na bane̱.
OMBWEA PE̱ BANE̱
BETE̱SEDI BA BIBE̱L: “To̱ mō̱ a s’ombwea mambo mao mo̱me̱ne̱, nde mambo ma bane̱ bape̱pe̱ pe̱.”—Filipi 2:4.
NJE NIKA E MAPULANO̱ O KWALA: Mulatako ma bwam na bane̱ mu se̱medi nde o nje di mawaneano̱ babo̱, seto̱ o nje di makusane̱no̱ babo̱. We ná o ńamse̱ mulatako mo̱ngo̱ na bane̱ yete̱na o mombwea nde wa mo̱me̱ne̱. K’eyembilan moto nu mombweye̱ nde bwam ba mo̱me̱ne̱ o ndabo a diba, e ná a wite̱ musonje. O mbat’a nika, to̱ moto a si mapula o be̱ diko̱m na moto nu masese̱ ponda ye̱se̱ jombwea nje a bino̱ to̱ nje a be̱nno̱. Kalati po̱ e makwala ná “bato ba mombweye̱ nde babo̱me̱ne̱ esibe̱ jombwea bane̱ to̱ buńa ba mabe̱ne̱ mitakisan jita.”
NJE WENO̱ NÁ O BOLA:
-
Ongwane̱ bane̱. Mako̱m ma mbale̱ ma be̱nedi mō̱ na nune̱ lakisane̱, me pe̱ be̱be̱ o jongwane̱le̱. Miwaso mō̱ mi malee̱ ná bato bena ba mongwane̱ bane̱ ba si mataka jita na maboa ma mo̱nge̱le̱, ba mabata pe̱ o be̱ne̱ye̱ babo̱me̱ne̱ edube.
-
Lee̱le̱ nded’a mulema. Yen ede̱mo e mapula nde kwala we̱le̱ ndut’a moto nupe̱pe̱ o mulema mo̱ngo̱. O be̱n te̱ nded’a mulema, e me̱nde̱ be̱ wa ndutu o bolane̱ byala ba make̱ko o bwam ba sengise̱ bato bape̱pe̱ sese.
Yen ede̱mo e me̱nde̱ pe̱ bola ná o we̱lisane̱ bane̱ na bo̱bise̱ la ńolo. Nded’a mulema ńe so̱ ná e bola ná o si be̱ ndando, o be̱ne̱ pe̱ ka mako̱m bato bena ba mawe̱ o bepasi be̱se̱.
-
Tombise̱ ponda na bato. O mabata bia bato bwam yete̱na o matombise̱ ponda na babo̱. Ná o be̱ne̱ mako̱m ma bwam, wangame̱n kwalea mambo me babo̱ mweńa. Bia so̱ lambe̱ye̱ bane̱ toi. Lee̱ ná o mombwea nje ye mweńa ońola mako̱m mo̱ngo̱. Muwaso mō̱ mu lee̱ ná “bato ba makwalea te̱ mambo ba to̱ndino̱, nika e mabola ná ba be̱ bonam.”
PO̱SO̱ MAKO̱M NA DIBIE̱
BETE̱SEDI BA BIBE̱L: “Ko̱lo̱ngo̱ne̱ la bobe di mańamse̱ bede̱mo ba bwam.”—1 Korinto 15:33.
NJE NIKA E MAPULANO̱ O KWALA: O matombise̱ te̱ ponda na bato, be ná ba tute̱le̱ wa o bola bwam to̱ bobe. Bamabie̱ ba mombweye̱ bede̱mo ba bato ba makwala ná mindenge mo̱ngo̱ me ná mi be̱ne̱ ngińa omo̱ń ango̱. Ba makwala k’eyembilan ná, o ko̱lo̱ngo̱n te̱ dangwa na bańo̱ sika to̱ bato ba bo diba labu, wa pe̱ we ná o sukane̱ bola mulemlem.
NJE WENO̱ NÁ O BOLA: Wasa o be̱ diko̱m na bato ba be̱n bede̱mo ba bwam weno̱ ná o to̱ndo̱ jembilane̱. K’eyembilan, wasa ka mako̱m bato be muyao, ba mabole̱ bane̱ edube, ba sangi mulema, na ba bi kase̱ bato.
BETE̱SEDI BA BIBE̱L BEPE̱PE̱
Ombwa sinima i se̱medi o Bibe̱l i mongwane̱ babaedi, bekoke̱le̱ na beso̱mbe̱ o be̱ne̱ longe̱ la ndabo a mbia le bonam
O SI BOLANE̱ BYALA BA BOBE.
“Eto̱pe̱to̱pe̱ ye bowoli ka po̱.”—MINIA 12:18.
SANGA MULEMA.
“Musange̱ mulema a mulisabe̱.”—MINIA 11:25.
BOLEA BANE̱ NJE O MAPULANO̱ NÁ BA BOLEYE WA.
“Mambo me̱se̱ . . . bińo̱ lo mapulano̱ ná bato ba boleye bińo̱, bińo̱ pe̱ bolea babo̱ nikame̱ne̱.”—MATEO 7:12.
