JOKWA 15
Nja ńe Yesu e?
Yesu e nde moto mō̱ nu biane̱ buka be̱se̱ o myango ma mbel’a moto. Nde o sumo te̱ dina lao, bato jita ba si bi nja eno̱, jita pe̱ ba be̱n mo̱nge̱le̱ me diwengisan jombwea nja Yesu eno̱ na mbale̱. Nje Bibe̱l e makwalano̱ jombwea mo̱ e?
1. Nja ńe Yesu e?
Yesu e nde eweked’a mudī ya ngińa e maje̱ o mo̱ń. A wekabe̱ nde na Yehova Loba oboso ba mane̱ mambo me̱se̱. Ońola nika nde a mabelabe̱no̱ ná “mun’a boso o bewekedi be̱se̱.” (Kolose 1:15) Bibe̱l e mabele̱ Yesu ná ‘mpo̱m ma Mun’a’ Loba ebanja Yesu mo̱me̱ne̱ mō̱ nde Yehova a wekino̱ esibe̱ jongwane̱ la moto nupe̱pe̱. (Yohane 3:16) Yesu a boli ebolo na Sango ao Yehova, ongwane̱ mo̱ o weka mane̱ mambo me̱se̱. (Langa Minia 8:30.) Yesu a dia a mabola ebolo mwemba na Yehova. E nde mutombe̱le̱ eyal’a Loba ńa jemea ebanja a matombe̱le̱ mye̱ndi mao na bediedi bao; ońola nika nde a mabelabe̱no̱ ná “Eyala.”—Yohane 1:14.
2. Ońola nje Yesu a po̱ino̱ o wase e?
Ye lambo ka 2 000 la mbu we̱nge̱, Yehova a po̱ngi betańsedi. A bolane̱ mudī mao musangi o tombe̱le̱ longe̱ la Yesu, jasumwe̱ o mo̱ń po̱ o dibum la ngo̱nded’a muto po̱ ni belabe̱ ná Maria. Tongwea na nika nde Yesu a yabe̱no̱ ka mot’a benama. (Langa Lukas 1:34, 35.) Yesu a po̱i nde o wase o be̱ Mesia ńa dikaki to̱ Kristo, na o sunga mbel’a moto. a Bedinge̱ ba Bibe̱l be̱se̱ jombwea Mesia be londedi mo̱, na nika e bola ná bato ba we̱le̱ jemba Yesu ka “Kristo, Mun’a Loba la longe̱.”—Mateo 16:16.
3. Owe̱ni Yesu eno̱ we̱nge̱ e?
Ombusa kwed’ao, Yesu a pumbwabe̱le̱ ka eweked’a mudī na mo̱ a timba o mo̱ń. A po̱ino̱ owo, “Loba pe̱ ase̱ mo̱ ka ni peti.” (Filipi 2:9) We̱nge̱, Yesu e nde eweked’a mudī e be̱n doi la byanedi dinde̱ne̱; Yehova buka te̱ nde a buki mo̱.
ALA O NJIBA
Bata bia nja Yesu eno̱ na mbale̱ na ońola nje yeno̱ mweńa jita ná di bie mo̱.
4. Yesu a titi Loba la Ngum
Bibe̱l e malee̱ ná to̱ná Yesu eno̱ eweked’a mudī ya ngińa ye o mo̱ń, e nde owas’a Yehova, ńe Loba lao na Sango ao. Ońola nje di makwalano̱ nika e? Ombwa SINIMA ná we̱ne̱ nje Bibe̱l e malee̱no̱ jombwea diwengisan le oteten a Yesu na Loba la Ngum.
Bepasi ba Bibe̱l be mabupe̱ be mongwane̱ biso̱ o so̱ṅtane̱ diwengisan le oteten a Yehova na Yesu. Langa epasi te̱ nde lo kwaleye pe̱ ońola myuedi mi mabupe̱.
Langa Lukas 1:30-32.
-
Nje ange̱l e kwalino̱, yena e malee̱ diwengisan le oteten a Yesu na Yehova Loba, “Ńasam” e?
Langa Mateo 3:16, 17.
-
O pond’a dubise̱ la Yesu, nje doi di wu o mo̱ń di kwalino̱ e?
-
O mo̱nge̱le̱ ná di doi di ta nde la nja e?
Langa Yohane 14:28.
-
Oteten a sango na muna, nja nu petane̱ nune̱ mimbu na doi la byanedi e?
-
Nje Yesu a tano̱ a pula kwala ponda a bele̱no̱ Yehova ná Tete̱ ńao e?
Langa Yohane 12:49.
-
Mo̱ Yesu a ta o̱nge̱le̱ ná e nde kapo̱ ka Sango ao e? Nje wa o mo̱nge̱le̱no̱ jombwea nika e?
5. Mambo ma lee̱ ná Yesu nde a ta Mesia
Bibe̱l e be̱n bedinge̱ jita bena bongwane̱ bato o jemba Mesia, nika ńe nde nu ńena Loba a po̱sino̱ o sunga mbel’a moto. Ombwa SINIMA ná we̱ne̱ bedinge̱ bō̱ Yesu a londise̱no̱ ponda a po̱ino̱ o wase.
Langa ben bedinge̱ ba Bibe̱l, nde lo kwaleye pe̱ ońola myuedi mi mabupe̱:
Langa Mika 5:1 ná o bie owe̱ni Mesia a tano̱ angame̱n yabe̱. b
-
Mo̱ yabe̱ la Yesu di londise̱ y’edinge̱ e?—Mateo 2:1.
Langa Myenge 34:21 na Sakaria 12:10 ná o bie mambo mō̱ Bibe̱l e tano̱ e bīse̱ jombwea kwed’a Mesia.
-
Mo̱ be bedinge̱ be londi e?—Yohane 19:33-37.
-
Mo̱ o mo̱nge̱le̱ ná Yesu nde a boli ná be bedinge̱ be londe e?
-
Nje nika e malee̱no̱ wa jombwea nja Yesu a tano̱ e?
6. Di matombwane̱ yete̱na joko o bia Yesu
Bibe̱l e malee̱ ná ye mweńa jita ná di bie Yesu na ebolo a be̱nno̱. Langa Yohane 14:6 na 17:3, nde lo kwaleye pe̱ ońola min myuedi:
-
Ońola nje yeno̱ mweńa jita ná di bie Yesu e?
Yesu a tele̱ ngea ná bato ba timbe mako̱m ma Loba. A lee̱ mbale̱ jombwea Yehova, tongwea na mo̱ pe̱ nde jeno̱ ná di kusa longe̱ la bwindea
BATO BA MAKWALA NÁ: “Mboṅ a Yehova i si dube̱ Yesu.”
-
Ne̱ni weno̱ ná walabe̱ babo̱ e?
EBONGOLO
Yesu e nde eweked’a mudī ya ngińa. E nde Mun’a Loba, na Mesia.
Ndimbisedi
-
Ońola nje Yesu a mabelabe̱no̱ ná “mun’a boso o bewekedi be̱se̱” e?
-
Nje Yesu a bolino̱ obiana a mapo̱ o wase e?
-
Ne̱ni di bino̱ ná Yesu nde e Mesia e?
BATA WASA
Bata jokwa ne̱ni di bino̱ ná Yesu nde e Mesia.
“Mo̱ bedinge̱ jombwea Mesia be malee̱ ná Yesu nde a ta Mesia e?” (Tema o mulomba)
E̱ne̱ nga Bibe̱l e malee̱ ná Loba a yai nde Yesu ka ne̱ni bato ba benama ba mayano̱ bana.
“Ońola nje Yesu a mabelabe̱no̱ ná Mun’a Loba e?” (Tema o mulomba)
Ombwea ońola nje belēdi ba maloba malalo ma lati o diwo̱ be titino̱ belēdi be se̱medi o Bibe̱l.
“Mo̱ Yesu nde e Loba e?” (Njongo a Betatedi, Dibaba 1, 2009)
Langa ne̱ni longe̱ la muto mō̱ di tukono̱ ombusa mo̱ wasa nje Bibe̱l e makwalano̱ jombwea Yesu.
