1, 2. a) Kabi wagatijan a ka di Jehova sagokɛlaw ye ka mun lo kɛ? b) Mun lo kɔrɔtanin lo kosɔbɛ Jehova fɛ?

 KABI wagatijan, a ka di Jehova sagokɛla kantigiw ye ka batolikɛyɔrɔw lɔ minw be nɔɔrɔ la a tɔgɔ kan. Misali la, a diyara Israɛldenw ye kosɔbɛ ka dɛmɛ don fanibugu lɔli baara la ani u ye u tɛgɛ labila k’u bololafɛnw di o baara kama.—Ɛkiz. 35:30-35; 36:1, 4-7.

² Jehova fɛ, bonlɔminanw dama lo tɛ nɔɔrɔ la ale tɔgɔ kan. Ani, olu lo kɔrɔtanin tɛ a ɲɛɛ kɔrɔ ka tɛmɛ (Mat. 23:16, 17). Jehova sagokɛlaw be batoli min lase a ma ani u be u yɛrɛ di ka baara kɛ ni kisɛya ye minkɛ, o lo kɔrɔtanin lo a fɛ kosɔbɛ. O fana lo be nɔɔrɔ la a kan ka tɛmɛ fɛɛn bɛɛ kan (Ɛkiz. 35:21; Mariki 12:41-44; 1 Tim. 6:17-19). Mun na o lo kɔrɔtanin lo kosɔbɛ? Sabu boon be laban ka tiɲɛ. Misali la, fanibugu ni Alabatosoba tɛ yen tugun. O boonw tiɲɛna. Nka, Jehova sagokɛla kantigiw ye u tɛgɛ labila ka nili minw kɛ ani u ye jijali minw kɛ ka dɛmɛ don o bonlɔbaara la, Jehova tɛ ɲinɛ o kɔ abada!—1 Korɛntikaw 15:58; Eburuw 6:10 kalan.

3. An bena mun lo lajɛ sapitiri nin na?

³ Bi fana, Jehova sagokɛlaw ye baaraba kɛ ka batolikɛyɔrɔw lɔ. An sera ka min kɛ an ka Masacɛ Yezu Krista ka ɲɛminɛli barika la, o b’an kabakoya yɛrɛ le! A gwɛnin lo ko Jehova y’an duga an ka jijaliw kosɔn (Zab. 127:1). An ye baara minw kɛ ani o baaraw be nɔɔrɔ la Jehova kan cogo min na, an bena o damanin dɔrɔn lo lajɛ sapitiri nin na. Mɔgɔ minw ye dɛmɛ don o baaraw la, an bena u damanin ka lakalitaw lamɛn fana.

4. a) Mun na an mako be batolikɛyɔrɔ caaman na? b) Mun na an ye tɔnbolo dɔw fara fara ɲɔgɔn kan? (Koorilen nin lajɛ: “ Tɔnbolow lɔli: Yɛlɛmani minw kɛra ka kɛɲɛ n’an makoyakow ye.”)

⁴ I ko an y’a ye sapitiri 16nan na cogo min na, Jehova b’a ɲini an fɛ an ka ɲɔgɔn lajɛn batoli kama (Eburuw 10:25). An ka lajɛnw b’an ka limaniya barika bonya ani u be dɔ fara an ka ninsɔndiya kan waajuli la. Laban loonw be janfara minkɛ, Jehova b’o baara teliyara. O kama, mɔgɔ waa kɛmɛ kɛmɛ caaman be fara an kan saan o saan (Ezayi 60:22). O  kɔrɔ ko an mako be ɛnprimɛri caaman na walisa ka to k’an ka sɛbɛw dilan. An mako be batolikɛyɔrɔ caaman na fana.

5. Mun na a bɛnnin lo an k’an ka batolikɛyɔrɔw weele ko Masaya Boonw? (Koorilen nin lajɛ fana: “ Yeelen kura legilizi.”)

⁵ Kabi Bibulu Kalandenw ka koow daminɛ na, u y’a faamu ko a kɔrɔtanin lo u ka kɛ ni u yɛrɛ ka batolikɛyɔrɔw ye. A be komi an ye an ka batolikɛyɔrɔ fɔlɔ lɔ saan 1890 le, Virizini mara tileben fan fɛ, Etazini. Saan 1930 kɔ, Jehova sagokɛlaw tun ye boon caaman lɔ wala k’u lakuraya k’u kɛ batolikɛyɔrɔw ye. Nka, u tun ma tɔgɔ tigitigi dɔ la u kan fɔlɔ. Saan 1935, balimacɛ Rutherford tagara Hawayi guun kan. Balimaw tun be lajɛn kɛyɔrɔ dɔ lɔra yen, Betɛli kura dɔ kɔrɔ. Tuma min na u y’a ɲininga o boon bena weele cogo min na, balimacɛ Rutherford ko: “Mun na an t’a weele ko ‘Masaya Boon’? Sabu kabi wagatijan, an be kibaro diiman fɔra Ala ka Masaya lo koo la.” (Mat. 24:14). O tɔgɔ lara o lajɛn kɛyɔrɔ kan ani a bɛnnin lo. Nka, a ma dan ale dɔrɔn ma. O tɔgɔ  lara fana an ka batolikɛyɔrɔw fanba kan duniɲa kuru bɛɛ kɔnɔ.

6, 7. An sera ka Masaya Boonw lɔ joona joona minkɛ, nafa jumanw lo sɔrɔla o la?

⁶ Saan 1970 kɔ, an mako tun be Masaya Boon caaman na. O kama, Etazini balimaw ye fɛɛrɛ ɲuman dɔ sigi sen kan walisa balimaw ka se ka Masaya Boon cɛɲumaninw lɔ tile damanin dɔrɔn kɔnɔ. Saan 1983, o Masaya Boon 200 ɲɔgɔn sera ka lɔ Etazini ani Kanada. Walisa o baara ka se ka kɛ, balimaw y’a daminɛ ka lɔlibaara jɛnkuluw sigi mara ni maraw la. O jɛnkuluw tun be baara ɲuman kɛra yɛrɛ le, fɔɔ saan 1986 Koow Ɲɛnabɔla Jɛnkulu ye sira di k’o labɛn ka bila sen kan yɔrɔ tɔɔw la. Ani saan 1987, o jɛnkulu 60 tun sigira Etazini. a Saan 1992, o jɛnkuluw sigira sen kan Arzantini, Ɔsitarali, Faransi, Alemaɲi, Zapɔn, Mɛkisiki, Afirikidisidi ani Ɛsipaɲi. Masaya Boonw ni lajɛnba kɛyɔrɔw lɔli baara ye an ka batoli faan dɔ lo ye. O kama, balima minw b’o baara gwɛlɛ kɛ, u ka kan n’an ka dɛmɛ ye.

⁷ An sera ka Masaya Boon minw lɔ joona joona, u kɛra seereya ɲuman ye yɔrɔ minw na u lɔra. Misali la, barokun dɔ tun bɔra Ɛsipaɲi zurunali dɔ kɔnɔ ko: “Limaniya be kuluw bɔ u nɔɔ na.” A tun fɔra yen Martɔs dugu ka Masaya Boon lɔli koo la ko: “Duniɲa nin kɔnɔ, mɔgɔw ka teli ka miiri u yɛrɛ nafa dɔrɔn lo la. An b’a faamu cogo di ko o bɛɛ n’a ta, dɔw sɔnna ka bɔ Ɛsipaɲi mara faan caaman na walisa  ka na boon dɔ lɔ Martɔs dugu la? U teliyara k’o boon lɔ, a lɔra ka ɲɛ, ani o baara tun labɛnnin lo koɲuman.” O zurunali y’o ɲiningali jaabi a kɛtɔ ka basigi balimacɛ dɔ ka kumaw kan min tun y’a yɛrɛ di o baara kama. O balimacɛ ko: “An sera k’o kɛ sabu Jehova lo b’an kalan.”

8. Saan 1999, Koow Ɲɛnabɔla Jɛnkulu sɔnna labɛn kura juman lo ma ani mun na do?

⁸ Saan kɛmɛkulu 20nan laban fan fɛ, Jehova sagokɛlaw hakɛ cayara jamana minw na balimaw ka sɔrɔ tɛ bɛrɛ ye. O yɔrɔ balimaw ye u seko kɛ ka batolikɛyɔrɔw lɔ. Nka jamana dɔw la, mɔgɔw tun tɛ ni miiriya ɲuman ye balimaw koo la ani u tun be u lɔgɔbɔ sabu u ka Masaya Boonw tun filɛ man di ka se diinan tɔɔw ka batolikɛyɔrɔw ma. K’a ta saan 1999, Koow Ɲɛnabɔla Jɛnkulu sɔnna ko labɛn dɔ ka sigi sen kan walisa Masaya Boonw ka se ka lɔ joona joona jamana minw na balimaw ka sɔrɔ man ca. Balima minw be jamana yiriwaninw na, olu ka wari tara ka balimaw dɛmɛ minw ka sɔrɔ man ca walisa “bɛɛ ka koo be kɛ kelen ye.” (2 Korɛntikaw 8:13-15 kalan). Jamana wɛrɛw balimaw fana nana dɛmɛ don o lɔli baara la.

9. A daminɛ na, a tun be komi baara juman lo ka gwɛlɛ kojugu? Nka mun lo sera ka kɛ?

⁹ A daminɛ na, a tun be komi o baara ka gwɛlɛ kojugu. Saan 2001, rapɔɔri dɔ y’a yira ko an mako be Masaya Boon 18 300 la, jamana 88 la, yɔrɔ minw na balimaw ka sɔrɔ man ca. Nka, Ala ka hakili senu ani an ka Masacɛ Yezu Krista ka dɛmɛ barika la, baara si tɛ yen min tɛ se ka kɛ (Mat. 19:26).  Saan 15 ɲɔgɔn kɔnɔ, o kɔrɔ k’a ta saan 1999 ka taga se saan 2013, Ala ka jama sera ka Masaya Boon 26 849 lɔ o labɛn sababu fɛ. b Halibi, Jehova b’an dugara waajuli baara la. O kama saan 2013, an mako bele tun be Masaya Boon 6 500 ɲɔgɔn na o jamanaw na. Ani sisan, an mako be caaman wɛrɛw la saan o saan.

10-12. Masaya Boonw lɔli baara be nɔrɔ la Jehova tɔgɔ kan cogo di?

¹⁰ O Masaya Boon kuraw lɔli baara be nɔɔrɔ la Jehova tɔgɔ kan cogo di? Zimbabuwe tɔnbolo ka rapɔɔri dɔ kɔnɔ, a fɔra ko: “Kalo kelen Masaya Boon kura dɔ lɔnin kɔ, mɔgɔ minw tun be to ka na lajɛnw na, tuma caaman na u hakɛ be caya ka se sigiyɔrɔma fila ma.” Jamana caaman na, a be komi mɔgɔw be sigasiga ka na lajɛnw na ni batolikɛyɔrɔ ɲuman t’an fɛ. Masaya Boon dɔ mana lɔ ka ban dɔrɔn, a be fa ani an mako be kɛ dɔ wɛrɛ la tugun. Nka, o Masaya Boonw cɛɲi dɔrɔn lo tɛ mɔgɔw sama ka na tiɲɛn diinan na. Minw be o Masaya Boonw lɔ, kanuya sɔbɛ min be u ni ɲɔgɔn cɛ, o fana be nɔɔ to mɔgɔw kan. An ka misali dɔw lajɛ.

¹¹ Ɛndonezi. Cɛɛ dɔ tun be Masaya Boon dɔ lɔli baara filɛra. Tuma min na a y’a lɔn ko minw b’o baara kɛra, u bɛɛ ye u yɛrɛ di le k’o kɛ gwansan, a ko: “Aw kɔni, aw ɲɔgɔn tɛ yen! N’ y’a ye ko aw kelen kelen bɛɛ b’o baara kɛra n’aw dusu bɛɛ ye ani aw ninsɔn ka di hali k’a sɔrɔ u tɛ aw sarala o kosɔn. Ne fɛ, aw ka diinan jɛnkulu ɲɔgɔn tɛ yen!”

¹² Ikrɛni. Muso dɔ tun be to ka tɛmɛ loon o loon Masaya Boon dɔ lɔyɔrɔ gɛrɛfɛ. A y’a faamu ko baarakɛlaw ye Jehova Seerew lo ye ani k’o boon bena kɛ Masaya Boon lo ye. A ko: “N’ ye Jehova Seerew koo mɛn n’ dɔgɔmuso lo fɛ ale min kɛra u dɔ ye. N’ tora k’o lɔli baara filɛ minkɛ, n’ y’a latigɛ ko ne fana bena kɛ Jehova Seere dɔ ye. O lɔli baara sen fɛ, n’ y’a ye ko u be ɲɔgɔn kanu yɛrɛ le.” O muso sɔnna ka bibulukalan kɛ ani a batizera saan 2010.

13, 14. a) Cɛɛ dɔ n’a muso ye min fɔ Masaya Boon dɔ lɔli baara kɛnin kɔ, o be mun lo yira i la? b) I be se ka mun lo kɛ walisa i ka batolikɛyɔrɔ ka nɔɔrɔ la Jehova tɔgɔ kan?

¹³ Arzantini. Cɛɛ dɔ n’a muso nana kuma balimacɛ dɔ fɛ min tun ye Masaya Boon dɔ lɔli baara kɔrɔsibaga ye. Cɛman ko: “An be aw ka lɔli baara kɔrɔsira koɲuman ani . . . an y’a latigɛ ko an b’a fɛ ka Ala lɔn yan le.” O kɔ, a ye ɲiningali kɛ ko: “An ka ɲi ka mun lo kɛ walisa ka to ka lajɛnw kɛ n’aw ye yan.” O cɛɛ n’a muso sɔnna bibulukalan na, nka u ko fɔɔ o kalan ka kɛ n’u ka denbayamɔgɔw bɛɛ lo ye. A diyara balimaw ye k’o kalan kɛ n’u ye i ko u y’a fɔ cogo min na.

¹⁴ I be lajɛnw kɛ Masaya Boon min kɔnɔ, n’a sɔrɔ i ma nɛɛma sɔrɔ ka dɛmɛ don a lɔli baara la. Nka, koo caaman be yen i bele be se ka minw kɛ walisa i ka batolikɛyɔrɔ ka  nɔɔrɔ la Jehova tɔgɔ kan. Misali la, i be se ka i ka Bibulu kalandenw, viziti kuraw ani mɔgɔ wɛrɛw weele ni dusudiya ye u ka na lajɛnw na Masaya Boon na. I be se fana ka dɛmɛ don k’i ka batolikɛyɔrɔ saniya ani k’a ladon. N’i ye labɛn ɲuman kɛ, i bena se ka nili kɛ aw ka Masaya Boon ladonko kama wala ka nili kɛ walisa Masaya Boonw ka se ka lɔ duniɲa yɔrɔ wɛrɛw la (1 Korɛntikaw 16:2 kalan). O baaraw bɛɛ be bonya la Jehova tɔgɔ kan.

15-17. a) Jɔnw lo be lɔli baaraw fanba kɛra? b) I be kalan juman lo sɔrɔ furuɲɔgɔnma dɔw ka lakalitaw la minw be taga jamana ni jamanaw na lɔli baara kama?

¹⁵ Masaya Boonw, lajɛnba kɛyɔrɔw ani tɔnbolow be lɔ yɔrɔ minw na, balima minw be o yɔrɔw la, olu lo b’o baara fanba kɛ. Nka tuma caaman na, balima minw be jamana wɛrɛw la ani u be se lɔli baara la koɲuman, olu be na u dɛmɛ. O balima dɔw be labɛnw kɛ walisa ka na dɛmɛ don lɔgɔkun damanin kɔnɔ o lɔli baara la. Dɔ wɛrɛw ye u yɛrɛ labila walisa ka dɛmɛ don lɔli baara la saan caaman kɔnɔ. U be taga yɔrɔ ni yɔrɔw la, o baara kama.

¹⁶ Balima minw be taga jamana ni jamanaw na lɔli baara kama, u be gwɛlɛya dɔw sɔrɔ. Nka, u be dugabaw sɔrɔ fana. Misali la, Timo ni Lina tagara jamana ni jamanaw na Azi, Erɔpu ani Ameriki worodugu fan fɛ walisa ka dɛmɛ don Masaya Boonw, lajɛnba kɛyɔrɔw ani tɔnbolow lɔli baara la. Timo ko: “Saan 30 tɛmɛninw na, u tora ka n’ ci ka taga jamana wɛrɛw la ani n’ tun be saan fila ɲɔgɔn lo kɛ jamana kelen kelen bɛɛ la.” Lina furunin lo Timo ma kabi saan 25, ani a ko: “U ye ne ni Timo ci ka taga jamana 10 na. An tun ka ɲi ka deli o yɔrɔw ka dumuni, yɔrɔ cogoya, kaan kura,  waajuli kɛyɔrɔ kura la ani k’a ɲini ka teri kuraw sɔrɔ. O koow tɛ ɲɛ jijalibaw ni wagati caaman kɔ.” c Yala kuun tun b’a la u k’o jijaliw kɛ wa? Lina ko: “Gwɛlɛyabaw wagati yɛrɛ lo la an ye dugabaw sɔrɔ. An y’a ye ko an kerecɛnɲɔgɔnw b’an kanu, u b’an ladon koɲuman ani ko Jehova b’a janto an na kosɔbɛ ni kanuya ye. Yezu ye layidu min ta a ka kalandenw ye Mariki 10:29, 30 kɔnɔ, an y’a ye fana k’o dafara an koo la. An ye dɔgɔw ni kɔrɔw ani bamusow kɛmɛ kɛmɛ caaman sɔrɔ.” Timo ko: “K’an ka setigiya kɛ ka dɛmɛ don walisa Masacɛ bololafɛnw ka yiriwa, o ɲɔgɔn tɛ yen, ani o b’an wasa kosɔbɛ.”

¹⁷ Darren ni Sarah ye dɛmɛ don lɔli baara la Afiriki, Azi, Ameriki cɛmancɛ yɔrɔ la, Erɔpu, Ameriki worodugu fan fɛ ani Pasifiki worodugu fan fɛ. U b’a jati ko u karila fɛɛn minw kɔ, u ye duga minw sɔrɔ, o ka ca n’o ye. Hali n’u ye gwɛlɛyaw sɔrɔ, Darren ko: “Nɛɛma tun lo an fɛ ka baara kɛ ni balimaw ye duniɲa faan caaman na. N’ y’a ye ko an be Jehova kanu cogo min na, o be i ko juru min b’an bɛɛ siri ɲɔgɔn na duniɲa kuru bɛɛ kɔnɔ.” Sarah ko: “N’ ye kalan caaman sɔrɔ balimaw fɛ minw be bɔ jamana caaman na! K’a ye u be kari fɛɛn minw kɔ Jehova ka baara kama, o be n’ lasun n’ ka to ka n’ seko fisaman kɛ fana.”

18. Kiraya kuma min be Zaburuw 110:1-3 kɔnɔ, o be dafara cogo di?

¹⁸ Masacɛ Dawuda tun ye kiraya kɛ ko hali ni Ala ka Masaya marakɔnɔmɔgɔw tun bena gwɛlɛyaw sɔrɔ, u tun bena Masaya ka baaraw kɛ (Zaburuw 110:1, 2 kalan). U tun “bena u yɛrɛ di ni diyanye ye” o baaraw kama (Zab. 110:3, NW ). Minw bɛɛ be dɛmɛ don o baaraw la, u be kɛra sababu ye o kiraya kuma ka dafa (1 Kor. 3:9). Betɛli caaman, lajɛnba kɛyɔrɔ kɛmɛ kɛmɛ caaman ani Masaya Boon waa caaman be duniɲa kuru bɛɛ kɔnɔ. O b’a yira ka gwɛ ko Ala ka Masaya ye tiɲɛnko lo ye ani ko a be sen kan le. An be baara min kɛra, o be nɔɔrɔ la Jehova kan ani a ka kan n’o ye kosɔbɛ. Nɛɛma lo an fɛ ka baara kɛ Masacɛ Yezu Krista ye o cogo la!