Yala Ala tun b’a fɛ nin lo ka kɛ wa?
ZURUNALI o zurunali kalan ka filɛ. Telewisɔn filɛ wala arajo lamɛn. Kojugukɛ ni marifakɛlɛ ani benkannikow ka ca kojugu! Miiri k’a filɛ kunko minw be e yɛrɛ kan. N’a sɔrɔ bana wala i ka mɔgɔ sɔbɛ dɔ ka saya b’i dusu kasira. N’a sɔrɔ i be miiri komi mɔgɔ ɲuman Zɔbu min y’a fɔ ko: “Tɔɔrɔ ye ne labɔ.”—Zɔbu 10:15.
I k’i yɛrɛ ɲininga:
Yala Ala tun b’a fɛ nin lo ka kɛ ne ni mɔgɔ tɔɔw la wa?
Ne be se ka dɛmɛ sɔrɔ min ka n’ ka kunkow ɲɛnabɔ?
Yala hɛɛrɛ bena na kɛ dugukolo kan loon dɔ wa?
Bibulu b’o ɲiningaliw jaabi. O jaabiliw be mɔgɔ wasa.
BIBULU B’A FƆ KO ALA BENA YƐLƐMANI NUNU KƐ DUGUKOLO KAN.
“A bena u ɲaji bɛɛ cɛ. Saya kɔni, o tɛ yen tugu. Mɔgɔ tena sa, mɔgɔ tena kasi, mɔgɔ tena tɔɔrɔ tugu. Bari, diɲɛkura lo, kɔrɔman n’a kɔnɔnafɛnw bɛɛ tununa bugubugu.”—Yirali 21:4
“Senkelenninw bena pan i ko mankalanin.”—Ezayi 35:6
“Fiɲɛntɔw ɲaa bena yɛlɛ.” —Ezayi 35:5
“Mɔgɔ salen minnu bɛ kaburuw kɔnɔ . . . u na bɔ yen.”—Zan 5:28, 29, ABM
“Dugumɔgɔ si tɛna a fɔ ko: ‘Ne man kɛnɛ.’ ”—Ezayi 33:24, NW
“Sɛnɛfɛnw bena caya dugukolo kan.”—Zaburuw 72:16, NW
A ƝINI KA NAFA SƆRƆ BIBULU KA KALAN NA
Koo minw yirala ka tɛmɛ, kana a miiri k’o ye siko gwansan dama ye. Ala ye layidu ta ko a bena o koow dafa ani Bibulu b’a ɲɛfɔ a bena o kɛ cogo min na.
Nka Bibulu tɛ dan o dɔrɔn ma. A b’a yira i la cogo min na i be se ka ɲɛnamaya kɛ hɛɛrɛ la kabini sisan yɛrɛ. Miiri dɔɔni i yɛrɛ ka haminankow n’i kunkow la. O be se ka kɛ wariko, denbayako, kɛnɛyako wala i ka mɔgɔ sɔbɛ dɔ saya koo ye. Bibulu be se k’i dɛmɛ k’i ka kunkow ɲɛnabɔ. A fana be se ka ɲiningali nunu jaabi k’i dusu saalo:
Mun na tɔɔrɔ b’an kan?
An be se k’an ka haminankow ɲɛnabɔ cogo di?
An be se ka mun lo kɛ walisa dɔ ka fara an ka denbaya ka hɛɛrɛ kan?
Mun lo be kɛ saya kɔ?
Yala an bena an ka mɔgɔ salenw ye tugun wa?
Mun na an be se ka la a la ko Ala bena a ka layiduw dafa?
Komi i be gafe nin kalanna, o b’a yira ko i b’a fɛ k’a lɔn Bibulu be min fɔ. A bena i dɛmɛ. I k’a kɔrɔsi ko ɲiningali dɔw be sɔrɔ gafe ɲɛɛw jukɔrɔ. U ɲɛsinna dakunw ma. A diyara mɔgɔ miliyɔn caaman ye ka baro kɛ ni Jehova Seerew ye Bibulu kan: Ɲiningaliw be kɛ u ye ani olu be jaabili di. An jigi b’a la ko a bena diya e fana ye. I ye koo diiman, koo nafaman min daminɛ ten, an be Ala deli a k’i duga o la: O min ye k’a ɲini k’a lɔn kalan tigitigi min be Bibulu kɔnɔ!
Découvrez aussi…
AN YE JƆN LO YE?
An be bibulukalan kɛ ni mɔgɔw ye cogo di?
Duniɲa kuru bɛɛ kɔnɔ, a lɔnnin lo ko Jehova Seerew be bibulukalan kɛ ni mɔgɔw ye gwansan. A filɛ o be kɛ cogo min na.
