DAWUDA tun ye Israɛlden ye ani a y’o kumaw fɔ muso dɔ ma, a tun ye min kunbɛn. O muso tɔgɔ ko Abigayɛli. Mun lo ye Dawuda lasun k’a tando? An be se ka Abigayɛli ladegi cogo di?

Dawuda y’o muso kunbɛn tuma min na a tun be bolila masacɛ Sayuli ɲɛ. Abigayɛli tun furula Nabali ma. Nabali tun ye nafolotigi ye. Saga caaman tun b’a fɛ. A ka sagadɛndɛlaw tun b’a ka sagaw dɛndɛ Zuda worodugu fan fɛ, kuluyɔrɔw la. Dawuda n’a ka sɔrɔdasiw tun be “i n’a fɔ kogo” min be Nabali ka sagadɛndɛlaw ani a ka sagaw “lamini.” Kɔfɛ, Dawuda ye mɔgɔw ci Nabali fɛ k’a deli ko dumuni fɛɛn o fɛɛn “be sɔrɔ a bolo kɔrɔ,” a k’o di olu ma (1 Sam. 25:8, 15, 16). Dawuda n’a ka sɔrɔdasiw y’u seko kɛ ka Nabali ka bololafɛnw tanga. O kama, an be se k’a fɔ ko Dawuda ye min deli, o tun tɛ fɛɛnba ye.

Nabali tɔgɔ kɔrɔ ko “naloman” wala hakilintan. O tɔgɔ tun ka kan n’a ye. A ye Dawuda nɛni ani ka kuma gwɛlɛw fɔ a ye. Dawuda ye min deli a fɛ a banna k’o di a ma. O kama, Dawuda tun y’a yɛrɛ labɛn walisa k’a ɲangi sabu a y’ale nɛni. Nabali ka nalomanya kosɔn, Dawuda tun bena ale n’a somɔgɔw faga.—1 Sam. 25:2-13, 21, 22.

Abigayɛli y’a faamu ko Dawuda tun be teliyara ka kojuguba lo kɛ! O kama, a y’a jaa gwɛlɛya ka dɔ kɛ dɔ ye. Dawuda be jɛnɲɔgɔnya ɲuman min kɛra ni Ala ye, a y’a lasun ka miiri o la. A y’o kɛ ni bonya ye. Ka fara o kan, a ye dumuni fɛɛn caaman di Dawuda n’a ka sɔrɔdasiw ma, ale min tun bena kɛ Israɛl masacɛ ye. Dawuda y’a faamu ko Abigayɛli sababu fɛ, Jehova y’ale bali ka koo jugu kɛ. Dawuda y’a fɔ Abigayɛli ye ko: “Ne be ele fo fana i ka hakilitigiya kosɔn, e min kɛra sababu ye bii ne ma se ka mɔgɔ faga.”—1 Sam. 25:18, 19, 23-35.

Nabali tun tɛ ni waleɲumanlɔn ye. An t’a fɛ abada ka kɛ i n’a fɔ ale. Ka fara o kan, n’an y’a kɔrɔsi ko mɔgɔ dɔ bena koo jugu kɛ, an k’an seko kɛ k’a dɛmɛ ni ɲumanya ye walisa a kana o kɛ. Tiɲɛn na, an k’a ɲini ka kɛ ni zaburu sɛbɛbaga ka miiriya ɲɔgɔn ye. Ale y’a fɔ ko: “Ne kalan ne ka kɛ kolɔnbaga ye, ne ka se ka fɛɛnw bɔ ɲɔgɔn na.”—Zab. 119:66.

N’a sɔrɔ mɔgɔw bena a kɔrɔsi ko an be koow kɛ ni hakilitigiya ye. U y’o fɔ wo, u m’o fɔ wo, n’a sɔrɔ u be ni Dawuda ka miiriya ɲɔgɔn ye. Ale ko: “Ne be ele fo fana i ka hakilitigiya kosɔn.”