Nsu: Mme Ntiense Jehovah isidiaha Easter sia mmọ idịghe mme Christian.

 Akpanikọ: Nnyịn imenịm ke Jesus Christ edi Andinyan̄a nnyịn, imesinyụn̄ idomo ukeme ‘nditiene nde ikpat esie ketket.’—1 Peter 2:21; Luke 2:11.

 Nsu: Mbufo inịmke ke ẹma ẹnam Jesus eset.

 Akpanikọ: Nnyịn imenịm ke ẹma ẹnam Jesus eset; imọfiọk ke se inamde mme Christian ẹnyene mbuọtidem edi oro imesinyụn̄ ikwọrọ iban̄a oro.—1 Corinth 15:3, 4, 12-15.

 Nsu: Mbufo iyakke nditọ mbufo ẹtiene ẹkop inemesịt oro nditọwọn̄ eken ẹsikopde ke ini Easter.

 Akpanikọ: Nnyịn imama nditọ nnyịn—imesisịn ukeme ikpep mmọ n̄kpọ inyụn̄ inam mmọ ẹkop inemesịt.—Titus 2:4.

•   Bible idọhọke ẹsidia Easter.

•   Jesus ọkọdọhọ isiti n̄kpa imọ, idịghe ediset ke n̄kpa imọ. Nnyịn imesiti n̄kpa esie kpukpru isua ke nnennen usen emi enye akakpade nte ekemde ye n̄wed usenọfiọn̄ Bible.—Luke 22:19, 20.

•   Nnyịn inịm ke Abasi inyịmeke usọrọ Easter sia ẹdade enye ẹto usọrọ mbun̄wụm eset. Abasi oyom nnyịn inọ imọ “san̄san̄a utuakibuot,” enye isinyụn̄ ikopke inemesịt ke ini idade mme n̄kpọ emi enye asuade idisịn ke utuakibuot nnyịn.—Exodus 20:5; 1 Ndidem 18:21.

 Nnyịn inịm ke ubiere nnyịn nditre ndidia Easter oto Bible, ndien Bible esịn udọn̄ ọnọ nnyịn ete inam n̄kpọ ye “ata ọniọn̄ ye ukeme ukere n̄kpọ,” utu ke nditiene ido eset. (Mme N̄ke 3:21; Matthew 15:3) Kpa ye oro isisiande mme owo se inịmde iban̄a Easter ke ini ẹbụpde nnyịn, imesikpono se owo kiet kiet ebierede ọnọ idemesie aban̄a n̄kpọ emi.—1 Peter 3:15.