Owo Ifan̄ Idi Ntiense Jehovah ke Ofụri Ererimbot?

BRE

Isua 2023

Ibat Mme Ntiense Jehovah ke ofụri ererimbot	8,816,562
Esop	118,177
Ibat idụt emi Mme Ntiense Jehovah ẹkwọrọde ikọ	239

Ofụri Ibatutom 2023

Se Ikanamde ke Nsio Nsio Idụt ye Obio ke 2023

Mmanie ke mbufo ẹsibat nte Mme Ntiense Jehovah?

Mbon emi ẹsikwọrọde eti mbụk Obio Ubọn̄ Abasi kpukpru ọfiọn̄ ke isibat nte Mme Ntiense Jehovah. (Matthew 24:14) Mbon itetịn̄ mi ẹsịne mbon emi ẹma ẹkena baptism ye mbon emi ẹsitienede ẹkwọrọ ikọ kpa ye oro mînaha kan̄a baptism.

Ndi owo esikpekpe okụk mbemiso edi Ntiense Jehovah?

Ihih. Okụk isan̄ake n̄kpọ ndomokiet ye owo ndidi Ntiense Jehovah m̀mê ndimek owo n̄kpọ ke esop nnyịn. (Utom 8:18-20) Ata ediwak ini, owo isidiọn̄ọke m̀mê anie isịn okụk m̀mê anie mîsịnke. Ntiense Jehovah kiet kiet esibiere ke idemesie ndida ini, odudu, ye inyene esie nsịn ke utom Abasi oro inamde ke ofụri ererimbot. Owo esinam emi etiene nte n̄kpọ etiede ye enye.—2 Corinth 9:7.

Ẹsisan̄a didie ẹfiọk mbon emi ẹsikwọrọde ikọ kpukpru ọfiọn̄?

Kpukpru ọfiọn̄, Mme Ntiense Jehovah ẹsiwet ibat hour emi mmọ ẹkwọrọde ikọ, ẹkpọn̄ ẹnọ esop mmọ. Owo isidọhọke amama ye mûmaha-ma ke ana ọnọ.

Esop kiet kiet ẹsidian ibat owo emi ẹkwọrọde ikọ ke ọfiọn̄, ẹnọ ẹsọk ọfis nnyịn emi ẹsede ẹban̄a idụt mmọ. Kpukpru ọfis nnyịn ẹsinọ ibat oro ẹsọk ibuot itieutom nnyịn.

Ke utịt isua utom a kiet kiet, ke ẹsidiọn̄ọ n̄wakn̄kan ibat Mme Ntiense Jehovah ke idụt kiet kiet. Ẹsitọ ibat emi ẹdian ẹda ẹdiọn̄ọ ibat Mme Ntiense Jehovah ke ofụri ererimbot. Ke ikpehe Intanet nnyịn, oyokụt ediwak n̄kpọ emi aban̄ade nnyịn ke idụt kiet kiet—edikụt mmọ ke itie emi ẹkotde “Ke Ofụri Ererimbot.” Mbụk utom ukwọrọikọ esisọn̄ọ nnyịn idem ukem nte ọkọsọn̄ọde mme Christian ke eset idem.—Utom 2:41; 4:4; 15:3.

Ndi ẹmesibat mbon emi ẹdụkde ikọ Abasi mbufo, edi emi mîsitienke ika ukwọrọikọ?

Kpa ye nnyịn mîsibatke mmọ isịn ke ibat Mme Ntiense Jehovah, esinenem nnyịn ndikụt mmọ ẹdide ikọ Abasi nnyịn. Ediwak mmọ ẹsidụk Editi N̄kpa Christ ye nnyịn kpukpru isua. Isidiọn̄ọ ibat mmọ ima imen ibat Mme Ntiense Jehovah ikosio ke ibat owo emi ẹdụkde Editi N̄kpa Christ. Ke 2023, owo 20,461,767 ẹkedụk Editi.

Ediwak owo isitieneke idi ikọ Abasi nnyịn, edi mmọ ẹsinyịme idi ufọk mmimọ idikpep mmimọ Bible ke mfọn. Ke 2023, ima ikpep owo 7,281,212 Bible kpukpru ọfiọn̄. Ndusụk ini, ẹsikpep ẹbe owo kiet, ini kiet.

Ntak emi ibat mbon emi ukara ẹdọhọde ke ẹdi Ntiense Jehovah esiwakde akan eke mbufo?

Ukara ẹsibụp mme owo m̀mê ewe ufọkabasi ke mmọ esika, ndien eke ọdọdọhọ ke idi Ntiense Jehovah mmọ ẹbat ẹsịn. Ke uwụtn̄kpọ, itieutom ubatowo ke U.S. ẹdọhọ ke “isiyom ndidiọn̄ọ m̀mê owo abat idemesie esịn ke otu mme aka ufọkabasi.” Mmọ ẹnyụn̄ ẹdọhọ ke ibat mmimọ “inen̄ekede inen.” Edi mbon emi ẹsikade ukwọrọikọ ẹnyụn̄ ẹnọde ibat hour mmọ ẹkwọrọde ke nnyịn isibatde nte Mme Ntiense Jehovah, idịghe mbon ẹtịn̄de ke inua kpọt ke idi Mme Ntiense Jehovah.

a Isua utom esitọn̄ọ ke September 1 esịm August 31 obufa isua. Ke uwụtn̄kpọ, isua utom 2015 ọkọtọn̄ọ ke September 1, 2014, esịm August 31, 2015.