Ecclesiastes 4;1-16
4 Ndien ami mfiak ntie n̄kere man n̄kụt kpukpru ufịk+ oro ẹnamde ke idak utịn, ndien, sese! mmọn̄eyet mmọ emi ẹfịkde,+ inyụn̄ idụhe owo eke ọdọn̄de mmọ esịt;+ ndien mme andifịk mmọ ẹnyene odudu, mmọ inyụn̄ inyeneke owo eke ọdọn̄de mmọ esịt.
2 Ndien ami ntoro mme akpan̄kpa emi ẹma ẹkekpan̄a utu ke mme odu-uwem emi ẹsụk ẹdude uwem.+
3 Ntre owo emi mîmanake kan̄a,+ mînyụn̄ ikwe utom afanikọn̄ emi ẹnamde ke idak utịn, ọfọn akan mmọ mbiba.+
4 Ndien ami mmokụt kpukpru ọkpọsọn̄ utom ye kpukpru usọ emi ẹsịnde ke utom,+ nte ke ọwọrọ edidomo idem ye kiet eken;+ emi n̄ko edi ikpîkpu ye edifehe mbịne ofụm.
5 Ndisịme owo akpan̄ ubọk etie+ onyụn̄ ata obụkidem esie.+
6 Esisịt nduọkodudu* ọfọn akan ekese ọkpọsọn̄ utom* ye edifehe mbịne ofụm.+
7 Ami mfiak ntie n̄kere man n̄kụt ikpîkpu n̄kpọ ke idak utịn:
8 Owo kiet odu, edi enye inyeneke udiana;+ inyụn̄ inyeneke eyen m̀mê eyeneka,+ edi utịt idụhe ke kpukpru ọkpọsọn̄ utom emi enye anamde. N̄ko, inyene iyụhọke enyịn esie:+ “Ndien anie ke ami nsịn idem nnam utom nnọ nnyụn̄ nnam ukpọn̄ mi ataba nti n̄kpọ?”+ Emi n̄ko edi ikpîkpu, onyụn̄ edi utom afanikọn̄.+
9 Owo iba ẹfọn ẹkan owo kiet,+ koro mmọ ẹnyenede eti utịp ke ọkpọsọn̄ utom mmọ.+
10 Koro edieke owo mmọ kiet ọduọde, enye eken ekeme ndimenede nsan̄a esie.+ Edi editie didie ye owo kiet emi ọduọde ke ini owo mîdụhe ndimenede enye?+
11 Akan oro, edieke owo iba ẹnade ọtọkiet, mmọ ẹyekop ufiop; edi owo kiet ekeme didie ndikop ufiop?+
12 Ndien edieke owo akande ikpọn̄ owo, owo iba ẹkeme ndidiana kiet n̄n̄wana ye enye.+ Ndien urụk emi ẹfiakde ita ita ikemeke ndisọp n̄kịbe.
13 Ubuene akparawa emi edide ọniọn̄ ọfọn+ akan akani eren emi edide ndisịme edidem,+ emi mîfiọkke aba nte ẹyomde item.+
14 Koro enye otode ufọk-n̄kpọkọbi ọwọrọ edidi edidem,+ okposụkedi odude ke itie ubọn̄, enye akamana nte eyen ubuene.+
15 Ami mmokụt kpukpru mme odu-uwem oro ẹsan̄ade ke idak utịn, nte n̄kpọ etiede ye eyen emi edide udiana, oro adade itie enye eken.+
16 Kpukpru mbio obio inyeneke utịt, kpa kpukpru mbon emi enye akarade;+ mbon emi ẹtienede enye ke edem idinyụn̄ idarake enye,+ koro emi n̄ko edide ikpîkpu ye edifehe mbịne ofụm.+
Mme Ikọ Idakisọn̄
^ At. Ed., “nduọkodudu eke ọyọhọde ubọk kiet.”
^ At. Ed., “ọkpọsọn̄ utom eke ọyọhọde ubọk iba.”