Luke 20;1-47
20 Usen kiet, ke adan̄aemi enye osụk ekpepde mbio obio n̄kpọ ke temple onyụn̄ atan̄ade eti mbụk, mbọn̄ oku ye mme scribe* ye mbiowo ẹsan̄a ẹkpere,+
2 ẹnyụn̄ ẹdidọhọ enye ẹte: “Sian nnyịn m̀mê ewe odudu ke afo ada anam mme n̄kpọ emi, mîdịghe, anie ọkọnọ fi odudu emi.”+
3 Enye ọbọrọ mmọ ete: “Ami nde nyobụp mbufo mbụme kiet, ndien mbufo ẹbọrọ mi:+
4 Nte baptism John okoto heaven m̀mê okoto owo?”+
5 Edi mmọ ẹkere ke otu idemmọ, ẹte: “Edieke nnyịn idọhọde, ‘Okoto heaven,’ enye ọyọdọhọ ete, ‘Ntak emi mbufo mîkenịmke enye ke akpanikọ?’+
6 Edi edieke nnyịn idọhọde, ‘Okoto owo,’ kpukpru mbio obio ẹyetọn̄ọ nnyịn ke itiat,+ koro mmọ ẹnịmde ke akpanikọ ẹte John+ ekedi prọfet.”+
7 Ntre mmọ ẹbọrọ ẹte mmimọ ifiọkke ebiet okotode.
8 Ndien Jesus ọdọhọ mmọ ete: “Ami nde ndisianke mbufo odudu eke ndade nnam mme n̄kpọ emi.”+
9 Ekem enye ọtọn̄ọ ndinọ mme owo uwụtn̄kpọ emi: “Owo kiet ọkọtọ in̄wan̄ vine+ onyụn̄ ayak enye esịn mme ọtọin̄wan̄ ke ubọk, ndien adaha aka esenidụt okodu ebịghi.+
10 Edi ke edikem ini enye osio ofụn+ kiet ọdọn̄ aka ebịne mme ọtọin̄wan̄,+ man mmọ ẹkpenọ enye ndusụk mfri in̄wan̄ vine.+ Edi mme ọtọin̄wan̄ ẹmia enye, ẹnyụn̄ ẹnọ enye ọnyọn̄ ubọk ubọk.+
11 Edi enye afiak osio ofụn en̄wen ọdọn̄. Mmọ ẹmia enye oro n̄ko, ẹnyụn̄ ẹsuene enye ẹnyụn̄ ẹnọ enye ọnyọn̄ ubọk ubọk.+
12 Enye ọtọn̄ọ ntak osio ọyọhọ ofụn ita ọdọn̄;+ edi mmọ ẹnọ enye emi unan ẹnyụn̄ ẹbịn enye ọnyọn̄.
13 Ndien enyene in̄wan̄ vine oro ọdọhọ ete, ‘Nso ke ndinam? Nyọdọn̄ edima eyen+ mi aka. Eyedi mmọ ẹyekpono enye emi.’
14 Ke ini mme ọtọin̄wan̄ ẹkụtde enye, mmọ ẹdọhọ kiet eken, ẹte, ‘Emi edi adiakpa; ẹyak iwot enye, man n̄kpọ-akpa ekpenyene nnyịn.’+
15 Ndien mmọ ẹsio enye+ ke in̄wan̄ vine ẹduọk ẹnyụn̄ ẹwot+ enye. Nso, ndien, ke enyene in̄wan̄ vine edinam mmọ?+
16 Enye eyedi edisobo mme ọtọin̄wan̄ oro, onyụn̄ ayak in̄wan̄ vine oro ọnọ mbon en̄wen.”+
Ke ini mmọ ẹkopde emi, mmọ ẹdọhọ ẹte: “Idiọkn̄kpọ aka nsannsan!”
17 Edi enye owụk enyịn ese mmọ onyụn̄ ọdọhọ ete: “Nso, ndien, ke se ẹwetde emi ọwọrọ, ‘Itiat emi mme ọbọpufọk ẹkesịnde,+ emi amakabade edi etubom itiat inụk’?+
18 Owo ekededi eke ediduọde ke itiat emi ayanuaha.+ Edi owo ekededi eke itiat emi ediduọde ọtọ,+ ayanuak enye.”+
19 Ndien mme scribe ye mbọn̄ oku ẹyom ndimụm enye kpa ke hour oro, edi mmọ ẹfehe otuowo; koro mmọ ẹfiọkde ẹte enye ọnọ uwụtn̄kpọ emi aban̄a mmimọ.+
20 Ndien, ke mmọ ẹma ẹketịm ẹse enye, mmọ ẹkpe mme owo ke ndịbe ẹte ẹka ẹkenam nte mmimọ idi ndinen owo, man mmọ ẹkpemụm+ enye ke ikọ inua, ẹnyụn̄ ẹyak enye ẹnọ ukara ye andikara.+
21 Ndien mmọ ẹdọhọ enye, ẹte: “Andikpep, nnyịn imọfiọk ite afo etịn̄ onyụn̄ ekpep owo n̄kpọ nte enende, unyụn̄ uten̄eke owo enyịn, edi afo ekpep usụn̄ Abasi nte ekemde ye akpanikọ:+
22 Nte ibet enyịme nnyịn ikpe tax inọ Caesar m̀mê inyịmeke?”+
23 Edi enye ọfiọk n̄kari mmọ onyụn̄ ọdọhọ mmọ ete:+
24 “Ẹwụt mi denarius kiet. Mbiet ye enyịn̄ emi ẹdi eke anie?” Mmọ ẹte: “Eke Caesar.”+
25 Enye ọdọhọ mmọ ete: “Mmọdo, ndien, ẹnọ Caesar se inyenede Caesar,+ ẹnyụn̄ ẹnọ Abasi se inyenede Abasi.”+
26 Ndien, mmọ ikemeke ndimụm enye ke ikọ emi ke iso mme owo, edi, sia idem akpade mmọ aban̄a ibọrọ esie, mmọ isioroke uyo.+
27 Edi, ndusụk mme Sadducee, emi ẹdọhọde ẹte ediset ke n̄kpa idụhe, ẹdi+ ẹdibụp enye,
28 ẹte: “Andikpep, Moses+ ekewet ọnọ nnyịn ete, ‘Edieke eyenete owo akpade ọkpọn̄ n̄wan, edi owo emi mîbonke eyen, yak eyenete esie+ emen n̄wan oro ọdọ onyụn̄ obon eyen ọnọ eyenete esie.’+
29 Mmọdo nditọete itiaba ẹkedu; ndien akpan ọdọ n̄wan onyụn̄ akpa ibonke eyen.+
30 Udọ anam kpasụk ntre,
31 ọyọhọ ita onyụn̄ ẹmen enye ọdọ. Kpa ntre ke mmọ mbitiaba ẹmen enye ẹdọ: edi ẹkpan̄a, ibonke eyen.+
32 Ke akpatre, n̄wan oro n̄ko akpa.+
33 Mmọdo, ke ediset ke n̄kpa, enye edidi n̄wan anie ke otu mmọ? Koro mmọ mbitiaba ẹma ẹdọ enye.”+
34 Jesus ọbọrọ mmọ ete: “Nditọ editịm n̄kpọ emi ẹdọ ndọ,+ ẹnyụn̄ ẹda mmọ ẹnọ ke ndọ,
35 edi mmọ oro ẹbatde ẹte mmọ ẹdot+ ndinyene editịm n̄kpọ+ oro ẹnyụn̄ ẹdot ndiset ke n̄kpa+ ididọhọ ndọ, owo idinyụn̄ idaha mmọ inọ ke ndọ.
36 Ke akpanikọ, mmọ ikemeke ndikpa+ aba, koro mmọ ẹtie nte mme angel, mmọ ẹnyụn̄ ẹdi nditọ Abasi sia mmọ ẹdide nditọ ediset ke n̄kpa.+
37 Edi Moses ama etịn̄, ke mbụk emi aban̄ade eto n̄kukịm,+ ete ke ẹnanam mme akpan̄kpa ẹset, ke ini enye okotde Jehovah ‘Abasi Abraham ye Abasi Isaac ye Abasi Jacob.’+
38 Enye idịghe Abasi mme akpan̄kpa, edi edi eke mme odu-uwem, koro ke enyịn esie kpukpru mmọ ke ẹdu uwem.”+
39 Ndusụk mme scribe ẹbọrọ ẹte: “Andikpep, afo emetịm etịn̄.”
40 Ndien mmọ idehedei ibụp enye baba mbụme kiet aba.
41 Ekem enye obụp mmọ ete: “Nso inam mmọ ẹdọhọde ke Christ edi eyen David?+
42 Koro David ọdọhọde ke n̄wed mme Psalm ete, ‘Jehovah ọdọhọ Ọbọn̄ mi ete: “Tie mi ke ubọk nnasia
43 tutu nda mme asua fo nnịm nte udoriukot fo.”’+
44 Ntre, David okot enye ‘Ọbọn̄’; didie ndien ke enye edi eyen esie?”
45 Edi, ke adan̄aemi kpukpru owo ẹsụk ẹkpan̄de utọn̄, enye ọdọhọ mme mbet esie ete:+
46 “Ẹkpeme idem ye mme scribe emi ẹmade ndisịne ewụra nsan̄a n̄kanade ẹnyụn̄ ẹmade ekọm ke an̄waurua ye n̄kpọitie iso ke mme synagogue ye ata ikpọ itie ke udia mbubreyo,+
47 ẹnyụn̄ ẹdiade ufọk mme ebeakpa+ ẹsobo ẹnyụn̄ ẹbọn̄de nnyan akam ke n̄wụtidem. Mmọ emi ẹyebọ ubiomikpe eke okponde akan.”+
