ALEXANDRA esịne ke bọs emi oyomde ndito idụt kiet ke South America n̄ka idụt en̄wen. Enye okop owo ukara emi esikpemede adan̄a idụt oro ọdọhọde bọs oro okûmen akparawa kiet emi otode China. Enye ọwọrọ ọdọhọ yak ikese se itịbede. Enye okụt eyen China emi odomode nditịn̄ se iwọrọde imọ nnọ owo ukara emi, edi imemke sia enye mîkemeke ndisem usem Spanish ọfọn. Sia Alexandra odude ke esop Mme Ntiense Jehovah emi ẹsemde Chinese, enye an̄wam eyen China oro akabade ikọ esie ọnọ owo ukara oro.

Akparawa oro ọkọdọhọ ke imọ imenyene mme n̄wed emi ẹnọde imọ unen ndidụn̄ ke idụt oro, edi ke inọ ẹbọ imọ okụk ye n̄wedisan̄ imọ. Ke nsonso oro, owo ukara emi ikenịmke se akparawa emi etịn̄de, onyụn̄ ekere ke Alexandra esimen mme owo aka idụt en̄wen man akada mmọ an̄wana okụk. Ke akpatre, enye ama enịm se akparawa emi eketịn̄de, edi ọdọhọ ke ana enye ekpe isop sia enye mîkamake n̄wedisan̄ esie. Akparawa oro ikenyeneke okụk ndomokiet sia inọ ẹma ẹbọ enye kpukpru n̄kpọ. Ntre Alexandra ama ọbuọt enye $20 (n̄kpọ nte ₦6,300.00). Esịt ama enem akparawa oro etieti, enye onyụn̄ ọdọhọ ke iyodori n̄kpọ ke $20 oro inọ enye. Alexandra ama ọdọhọ ke imọ iyomke udori, ke in̄wam enye sia imọdiọn̄ọ ke nnennen n̄kpọ ke inam oro. Enye ama ọnọ akparawa oro mme n̄wed Ikọ Abasi onyụn̄ ọdọhọ enye ekpep Bible ye Mme Ntiense Jehovah.

Esinem nnyịn tutu ndikop nte ẹfọnde ido ntem ye isenowo. Imọfiọk ke mme owo ke kpukpru ufọkabasi ẹkeme ndin̄wam mme owo ntem, idem mbon emi mîsikaha ufọkabasi ẹsikam ẹn̄wam mme owo. Edi ndi afo ekpenyịme ndin̄wam owo ntre? Ọfọn ikere iban̄a mbụme emi sia Jesus ọkọdọhọ ete: “Inemesịt odu ke ndinọnọ akan ke ndibọbọ.” (Utom 20:35) Ntaifiọk n̄ko ẹdọhọ ke ndinọ owo n̄kpọ esifọn ye owo. Yak ise ntak emi edide ntre.

Ndinọ owo n̄kpọ esinam owo okop inemesịt. Apostle Paul ọkọdọhọ ke “Abasi amama owo eke ọnọde ke idatesịt.” Enye eketịn̄ aban̄a mme Christian emi ẹketatde ubọk ẹtịp n̄kpọ man ẹda ẹn̄wam nditọete oro ẹkekụtde ukụt. (2 Corinth 8:4; 9:⁠7) Paul ikọdọhọke ke inemesịt akanam mmọ ẹnọ nditọete mmọ n̄kpọ. Edi ọkọdọhọ ke mmọ ndinọ nditọete oro n̄kpọ akanam esịt enem mmọ.

Ke ndụn̄ọde kiet oro ẹkenamde, ntaifiọk ẹma ẹkụt ke enyene n̄kpọ ke mfre emi esinamde owo okop inemesịt, adian idem ye mbon en̄wen, onyụn̄ enyene mbuọtidem ke idem mbon en̄wen ke ini enye ọnọde owo n̄kpọ. Ndụn̄ọde en̄wen oro ẹkenamde owụt ke “ndinọ owo okụk esinam esịt enem andinọ akan enye ndikpada okụk oro nnam n̄kpọ nnọ idemesie.”

Ndi akanam emekere ke n̄kpọ ọdiọk ye afo tutu ukemeke ndin̄wam owo? Se idude edi ke kpukpru owo ẹkeme ndinọ owo n̄kpọ nnyụn̄ n̄kop inemesịt. Edieke owo ọnọde owo n̄kpọ ke ofụri esịt, ọkpọkọm edi ata ekpri n̄kpọ,  emi ayanam enye okop inemesịt. Ntiense Jehovah kiet ama ewet leta ọnọ mme andiwet magazine emi onyụn̄ esịn okụk ke leta oro. Enye ekewet ete: “Ke ofụri isua emi, n̄kukụre se nsikemede ndinọ edi ekpri okụk emi nsisịnde ke Ufọkmbono Obio Ubọn̄. . . . Edi se Jehovah Abasi ọnọde mi esikan se nsinọde enye. . . . Ẹmenam etieti nte ẹnọde mi ifet nditiene ntịp n̄kpọ nsịn ke utom Abasi sia emi esinem mi tutu.”

Edi idịghe okụk kpọt ke ẹsinọ owo. Enyene ediwak n̄kpọ en̄wen emi ikemede ndinọ owo.

Bible ọdọhọ ete: “Owo ima-mfọnido anam se ifọnde ye ukpọn̄ esiemmọ, edi owo ibak ada afanikọn̄ ọsọk obụkidem esie.” (Mme N̄ke 11:17) Owo mfọnido esida ini, odudu, ye inyene esie an̄wam mme owo, ndien emi esinyene ediwak ufọn ọnọ enye onyụn̄ anam idem ọsọn̄ enye.

Nsio nsio ndụn̄ọde oro ẹkenamde owụt ke mbon oro ẹsin̄wamde mme owo isisọpke ikop ubiak isinyụn̄ ifụhọke ikaha. Idem esisọn̄ mmọ akan mbon emi mîsin̄wamke owo. Ndinọ owo n̄kpọ esin̄wam idem mbon emi ẹdọn̄ọde idiọk udọn̄ọ nte HIV m̀mê udọn̄ọ mfre emi esinamde owo ọdọn̄ọ akpauben̄. Ẹdọhọ n̄ko ke ndinọ owo n̄kpọ esin̄wam mbon oro ẹdomode nditre ukpammịn onyụn̄ anam mmọ ẹkûfụhọ ẹkaha.

Ẹdọhọ ke se isinamde edi ntre edi ke nditua owo mbọm nnyụn̄ mfọn ido ye owo isiyakke owo ọsọp ofụhọ. Ndinọ owo n̄kpọ isinyụn̄ iyakke owo ọsọp etịmede esịt m̀mê ọdọn̄ọ n̄kon̄n̄kon̄ iyịp. Ndin̄wam mme owo ekeme n̄ko ndinam mbon oro ebe m̀mê n̄wan mmọ akpade ẹkûfụhọ ẹkaha.

Kpukpru emi owụt ke ndinọ owo n̄kpọ esifọn ye owo.

Jesus ọkọdọhọ mbet esie ete: “Ẹnọ owo n̄kpọ, ndien ẹyenọ mbufo n̄kpọ. Ẹyedomo ọyọhọ udomo, eke ẹmịn̄de osụhọde, eke ẹnyen̄ede onyụn̄ ọyọhọde ọduọhọ, ẹsịn mbufo ke ọfọn̄. Koro udomo eke mbufo ẹdade ẹdomo ẹnọ owo, ke mmọ ẹdida ẹdomo ẹnọ mbufo ke usiene.” (Luke 6:38) Edieke ọnọde owo n̄kpọ, esịt eyenem owo oro, enye n̄ko ekeme ndiyom ndinọ mbon en̄wen n̄kpọ. Ndinọ owo n̄kpọ esinam mme owo ẹkpere kiet eken ẹnyụn̄ ẹkabade ẹdi ufan.

Ntaifiọk emi ẹkpepde n̄kpọ ẹban̄a nte mme owo ẹsinamde n̄kpọ ye kiet eken ẹdọhọ ke mme owo ẹsiwak ndikpebe mbon emi ẹsin̄wamde owo. Ndikam n̄kokot mban̄a nte owo ekenen̄erede an̄wam owo ekeme ndinam mbon en̄wen ẹtiene ẹfọn ido n̄ko. Ntem, ndụn̄ọde oro ẹkenamde owụt ke ‘owo ndifọn ido ekeme ndinam ata ediwak mbon en̄wen ẹtiene ẹfọn ido, ọkpọkọm ndusụk mmọ idiọn̄ọke owo oro.’ Oro ọwọrọ ke owo kiet ke obio ndifọn ido ekeme ndinam mbon en̄wen ke obio ẹtiene ẹfọn ido. Ndi ukpamaha ndidụn̄ ke utọ obio oro? Ke akpanikọ, ndinọ owo n̄kpọ enyene ediwak ufọn.

 Enyene se iketịbede ke Florida ke U.S.A. emi owụtde ke emi edi akpanikọ. Mme Ntiense Jehovah ẹma ẹka ndin̄wam mbon emi oyobio akabiatde ufọk mmọ. Ke ini mmọ ẹkebetde ẹmen n̄kpọ oro mmọ ẹdidade idiọn̄ ufọk oro edi, mmọ ẹma ẹkụt ke ọkọ ete kiet oro odụn̄de ekpere ama ọduọ, ndien mmọ ẹma ẹka ẹkebọp ọkọ oro ẹnọ enye. Nte ini akakade, ete oro ama ewet leta ọnọ ibuot itieutom Mme Ntiense Jehovah ete: “Esịt enem mi etieti. Iwakke mbon emi ẹyede ido nte ikọt mbufo.” Esịt ama enem enye tutu enye ọnọ okụk ẹsọk Mme Ntiense Jehovah ete ẹtiene ẹda ẹnam utom mmọ emi enye ọkọdọhọde ke inyeneke mbiet.

Ntaifiọk ẹdọhọ ke etie nte ndin̄wam owo esesịne nnyịn ke iyịp. Mmọ ẹdọhọ ke nditọwọn̄ ẹsitọn̄ọ ndinọ owo n̄kpọ mbemiso ẹkam ẹtọn̄ọde nditịn̄ ikọ. Ntak-a? Bible ọdọhọ ke Abasi okobot nnyịn “ke mbiet esie.” Emi ọwọrọ ke nnyịn imenyene mme edu Abasi.​—⁠Genesis 1:⁠27.

Ntatubọk edi kiet ke otu nti edu Jehovah. Enye ọnọ nnyịn uwem onyụn̄ ọnọ nnyịn mme n̄kpọ emi ẹnamde ikop inemesịt. (Utom 14:17; 17:​26-28) Edieke ikpepde Bible, iyọfiọk n̄kpọ iban̄a edima Ete nnyịn emi inyụn̄ ifiọk se enye aduakde ndinam nnọ nnyịn. Bible anam ifiọk n̄ko se Abasi anamde man ikop inemesịt ke ini iso. * (1 John 4:​9, 10) Sia Jehovah Abasi esitatde ubọk ọnọ owo n̄kpọ, okonyụn̄ obotde nnyịn ke mbiet esie, edieke isinọde mme owo n̄kpọ nte enye esinọde, enye ayama nnyịn, iyonyụn̄ ikop inemesịt.​—⁠Mme Hebrew 13:⁠16.

Ndi emeti Alexandra oro iketịn̄de iban̄a ke ntọn̄ọ ibuotikọ emi? Nso iketịbe ke akpatre? Owo en̄wen ke bọs oro ọkọdọhọ ke Alexandra ototop okụk esie ọduọk. Edi ete oro enye akan̄wamde do ama okokụt ufan esie ke ebiet emi bọs oro okosion̄ode mme owo onyụn̄ ọbọ $20 ọkpọn̄ ọnọ Alexandra. Enye ama onyụn̄ ọtọn̄ọ ndikpep Bible nte Alexandra ọkọdọhọde enye anam. Esịt ama enen̄ede enem Alexandra ke ini enye akafiakde okụt ete oro ke ọfiọn̄ ita ama ekebe ke mbono emi Mme Ntiense Jehovah ẹkenịmde ke Peru ke usem Chinese. Ete oro ama afiak ọkọm Alexandra ke se enye akanamde ọnọ imọ onyụn̄ ọdọhọ Alexandra asan̄a ye mbon oro ẹketienede enye ẹdi mbono oro ẹdidia udia ke itie unyamudia imọ.

Ke akpanikọ, ndinọ owo n̄kpọ nnyụn̄ n̄n̄wam mme owo esinam owo enen̄ede okop inemesịt. Se ifọnde ikan edi ke emi ekeme ndinam owo emi afo an̄wamde edi edifiọk Jehovah Abasi emi ọnọde nnyịn kpukpru nti enọ. (James 1:17) Ndi emesinọ owo n̄kpọ man etiene okop inemesịt?