“Ẹkûn̄wana Udia Eke Edibiarade”

NTE DAVID LUNSTRUM OBỤKDE

Ami ye eyeneka mi Elwood ikada ke n̄kpọ oro okon̄de ke mita usụkkiet, iwetde obufa idiọn̄ọ ke ufọk umịn̄n̄wed Enyọn̄-Ukpeme. Ke se ibede isua 40 ke ukperedem, enye ke osụk odu do, akpakde owo ete: “KOT IKỌ ABASI KPA EDISANA BIBLE KE USEN KE USEN.” Ke urua kiet kiet, ediwak tọsịn owo ẹsikụt idiọn̄ọ emi nte mmọ ẹbede ọwọrọetop Ebọp Brooklyn.

MME n̄kpọ oro ntide mban̄a ini uyen mi ẹsịne usen uyetọfọn̄ ubon. Ke n̄kanika ition usenubọk, Mama ama esidaha ada, eyet ọfọn̄ ọnọ akamba ubon nnyịn, ndien Papa ama esitịm idem ndika utom. Mmọ ẹyeneme kiet ke otu n̄kpọsọn̄ nneme mmọ, Papa afan̄ade nte ke owo ke usụn̄ kiet m̀mê eken okofoforo ke ufan̄ ediwak miliọn isua, ndien Mama okot oto Bible ndisọn̄ọ nte ke owo edi nnennen edibotn̄kpọ Abasi.

Idem ke ini n̄kedide isua itiaba kpọt, mma mfiọk nte ke Mama ama okụt akpanikọ. Kpa ye adan̄a edima emi n̄kamade Papa, mma n̄keme ndikụt nte ke se enye okonịmde ke akpanikọ ikọnọhọ idotenyịn ndomokiet iban̄a ini iso. Mama okokop inemesịt didie ntem ndifiọk nte ke ediwak isua ke ukperedem, iba ke otu nditọ esie ẹma ẹwet idiọn̄ọ oro esịnde udọn̄ ọnọ mme owo ndikot Bible, kpa n̄wed oro enye akamade etieti!

Edi ami ntịn̄ke mbụk mi ke adiana ke adiana. Didie ke n̄kasan̄a ndinyene utọ ifet oro? Oyom mfiak n̄ka edem edem n̄kosịm isua 1906, isua ita mbemiso n̄kamanade.

Uwụtn̄kpọ Edinam Akpanikọ Mama

Ke ini oro Mama ye Papa ẹkedọ ndọ obufa ẹnyụn̄ ẹdụn̄ ke tent ke Arizona. Eyen Ukpepn̄kpọ Bible, nte ẹkesikotde Mme Ntiense Jehovah ini oro, ama oto edi onyụn̄ edinọ Mama udịm udịm n̄wed oro Charles Taze Russell ekewetde, emi ẹkekotde Studies in the Scriptures. Enye ama ada ofụri okoneyo oro ndikot mmọ ndien ikebịghike enye ama edifiọk ete ke emi ekedi akpanikọ oro imọ ikoyomde. Enye ikekemeke ndibet Papa ọnyọn̄ isan̄ uyom utom esie edi.

Papa n̄ko ikokopke uyụhọ ke se mme ufọkabasi ẹkekpepde, ntre kan̄a kemi enye ama onyịme mme akpanikọ Bible ẹmi. Ekem, nte ededi, enye ama odụk afan̄ ido ukpono esie ndien idem anamde uwem ọsọn̄ ye Mama. Edi akananam eka mi iketreke ndise mban̄a mme udọn̄ n̄kpọ eke obụk ọkọrọ ye eke spirit nditọ esie.

Tutu amama ndifreke nte Mama ekesitode ufọkenyọn̄ osụhọde edi kpukpru okoneyo, ke ama akanam utom ọkpọsọn̄ okụre ke usen, man edikot ikpehe kiet ke Bible ọnọ nnyịn m̀mê edibuana ndusụk ọsọn̄urua n̄kpọ eke spirit ye nnyịn. Papa ekedi owo ọkpọsọn̄ utom n̄ko, ndien nte n̄kọkọride n̄kpon, enye ama ekpep mi utom uyet benti. Ih, Papa ama ekpep mi ndinam utom, edi Mama ama ekpep mi se ndidade utom oro nnam, nte Jesus eketemede, ‘udia eke mîdibiarake.’—John 6:27.

Ke akpatre ubon nnyịn ama edinam idụn̄ ke ekpri obio Ellensburg ke stet Washington, n̄kpọ nte kilomita 180 ke edem usiahautịn Seattle. Ke ini nnyịn nditọwọn̄ ikọtọn̄ọde ndidụk mme mbonoesop Nditọ Ukpepn̄kpọ Bible ye Mama, nnyịn ikesisop idem ke mme ufọk owo. Kpukpru irenowo ẹma ẹkpọn̄ otu ukpepn̄kpọ nnyịn ke ini ẹkesọn̄ọde ẹtịn̄ ẹban̄a udọn̄ oro odude ndibuana ke utom ukwọrọikọ eke ufọk ke ufọk. Edi Mama akananam iyokke. Emi ama enyene utịp oro ebịghide kpukpru ini ke idem mi ndibuọt idem ke ndausụn̄ esop Jehovah.

Nte ini akade Papa ye Mama ẹma ẹdinyene  nditọ usụkkiet. Ami n̄kamana ke October 1, 1909, ọyọhọ eyen mmọ ita. Ke ofụri ofụri, nnyịn owo itiokiet ima ikpebe eti uwụtn̄kpọ Mama inyụn̄ ikabade idi ifịk ifịk Mme Ntiense Jehovah.

Uyakidem ye Baptism

Ke ini n̄kodude ke utịt utịt isua uyen mi, mma nnam uyakidem nnọ Jehovah, nnyụn̄ nyarade emi ke baptism mmọn̄ ke 1927. Ẹkenịm baptism ke Seattle ke akani ufọk emi ekedide ufọkabasi Baptist ke mbemiso. Ami mmenem esịt koro ẹma ẹdorode akani enyọn̄ esie efep. Ẹma ẹda nnyịn ẹsụhọde ẹka obube mmọn̄ oro okodude ke ufọk idakisọn̄ ke ebiet emi ẹkenọde nnyịn nnyan mbubịt ọfọn̄idem isịne. Eketie nte n̄kpọ eke ikakade ubụkowo.

Mma mfiak n̄ka Seattle ke ọfiọn̄ ifan̄ ẹbede, ndien isan̄ enyeemi mma ntabi nse ke akpa ini nte utom unọ ikọ ntiense eke enyịnusụn̄ ke enyịnusụn̄ etiede. Owo oro ọkọnọde ndausụn̄ ama eteme mi ete, “Afo dụk n̄kan̄ emi, ndien ami nyedụk n̄kan̄ eken.” Kpa ye oro idem ekenyekde mi, mma nnịm ediwak nsio nsio n̄kpri n̄wed ye ata ediye n̄wan kiet. Mma n̄ka iso ke utom ukwọrọikọ eke enyịnusụn̄ ke enyịnusụn̄ ke ini n̄kafiakde nnyọn̄ Ellensburg, ndien idahaemi, ke se ikperede ndisịm isua 70 ke ukperedem, utọ utom oro osụk edi akwa n̄kpọ idatesịt ọnọ mi.

Utom ke Ibuot Itieutom Ofụri Ererimbot

Ikebịghike ke oro ebede, owo oro akanamde utom ke Bethel Brooklyn, kpa ibuot itieutom ofụri ererimbot Watch Tower Society, ama esịn udọn̄ ọnọ mi ete nnọ idem unyịme unyịme ndinam utom do. Esisịt ini ke ima ikenyene nneme oro, ntọt ama odu ke magazine Enyọn̄-Ukpeme oro akanamde ẹfiọk ẹte ke ẹyom un̄wam ke Bethel. Ntre mma nsịn eben̄e. Tutu amama ndifreke idatesịt oro n̄kenyenede ke ini mbọde leta ndinam utom ke Bethel ke Brooklyn, New York, ke March 10, 1930. Ntem ke utom uyọhọ ini mi ndin̄wana ‘udia eke mîdibiarake’ ọkọtọn̄ọ.

Owo ekeme ndikere ete ke ye ifiọk oro n̄kenyenede nte eyet benti, ke ẹkpekenọ mi utom uyet benti. Utu ke oro, akpa utom mi ekedi ndinam utom ke masịn ukịm n̄wed ke ufọk umịn̄n̄wed. Okposụkedi utom emi ekefekde owo ke ntak ekedide uduot kiet, mma ndara utom oro ke se ibede isua itiokiet. Akamba masịn umịn̄n̄wed rotary emi nnyịn ke ima ima usụn̄ ikesikotde akani  nsụn̄ikan̄ ekọn̄ ama esimịn̄ n̄kpri n̄wed emi ẹkesimende ke n̄kpọ umen mbiomo ẹsụhọde ẹdi isọn̄. Nnyịn ima isinem esịt ndikụt m̀mê nnyịn iyekeme ndikịm n̄kpri n̄wed oro usọp usọp n̄kụre nte nnyịn ibọde mmọ ito nsụn̄ikan̄ ekọn̄ oro.

Ke oro ebede mma nnam utom ke ediwak itieutom, esịnede enyeoro nnyịn ikesinamde mme ukwak ubre usanikwọ. Nnyịn ikesida mme ukwakutom ẹmi ibre mme etop Bible oro ẹkemụmde ẹsịn ke n̄kpọ umụmikọ ke enyịnusụn̄ mme enyeneufọk. Mbonutom unyịmesịt ke itieutom nnyịn ẹma ẹtịm ẹnyụn̄ ẹdiọn̄ ukwak ubre usanikwọ oro ekesidade-da. Ukwak ubre usanikwọ emi ikesibreke etop emi ẹma ẹkemomụm ẹsịn ke usanikwọ kpọt edi ama enyene n̄ko san̄asan̄a ikpehe ndidọn̄ n̄kpri n̄wed ndien iso-ọfọn bred. Mma nnyene ifet ediwụt nte ẹkamade obufa n̄kpọutom emi ke mbono kiet ke Detroit, Michigan, ke 1940.

Nte ededi, nnyịn ima inam se ikande ukwakutom oro enyenede ufọn. Nnyịn n̄ko ima inam akpan ukpụhọde eke spirit. Ke uwụtn̄kpọ, Mme Ntiense Jehovah ẹma ẹsidian n̄kpọ mbana oro enyenede cross emi ayarade anyanya. Edi ekem nnyịn ima idifiọk nte ke ẹkewot Jesus ke nnennen eto, idịghe ke cross. (Utom 5:30, NW) Ntem ẹma ẹtre ndisidian n̄kpọ mbana emi. Ekedi ifet ọnọ mi nditorode pin mfep ke n̄kpọ mbana oro. Ekem ẹma ẹtara gold oro ẹkedade ẹnam ẹnyụn̄ ẹnyam.

Okposụkedi nnyịn ikenyenede ndutịm utom usen ition ye ubak oro ọyọhọde ye utom kpukpru urua, nnyịn ima isịn idem ke utom ukwọrọikọ Christian ke mme utịturua. Usen kiet, ẹma ẹmụm nnyịn owo 16 ẹnyụn̄ ẹsịn ke ufọk-n̄kpọkọbi ke Brooklyn. Ntak-a? Ọfọn, ke ini oro nnyịn ikesida kpukpru ido ukpono nte ẹdide nsunsu ido ukpono. Ntre nnyịn ima ikama mme idiọn̄ọ ẹmi ẹkedọhọde “Ido Ukpono Edi Afia ye N̄kpọ Etabi” ke n̄kan̄ kiet ye “Nam N̄kpọ Abasi ye Christ kpa Edidem” ke n̄kan̄ eken. Ẹma ẹsịn nnyịn ke ufọk-n̄kpọkọbi ke ndikakama mme idiọn̄ọ ẹmi, edi Hayden Covington, lọya Watch Tower Society, ama osio nnyịn ke ubiọn̄. Ke ini oro ẹma ẹkpe ekese ikpe ẹbuanade ifụre utuakibuot ke N̄kponn̄kan Esopikpe United States, ndien ekedi n̄kpọ nduaidem owo ndidu ke Bethel nnyụn̄ mbem iso n̄kop mme ntọt ẹban̄ade edikan nnyịn.

Nte ini akade ẹma ẹnọ mi utom oro n̄kadade ifiọk uyet benti mi nnam n̄kpọ. Ke Isuo Staten, kiet ke otu obio New York City, nnyịn ima inyene ufọkutom usuanetop radio WBBR. Mme tọwa radio ke ufọkutom emi ẹma ẹniọn̄ ẹbe mita 60, ndien mmọ ẹma ẹnyene otu urụk ita ita. Mma ntie ke obukpọk emi ọkọniọn̄de ke centimita 90 onyụn̄ abarade ke centimita 20 ke adan̄aemi nsan̄autom mi ekedịberede mi ọdọk. Ke ntiede okon̄ ọkpọn̄ isọn̄ ke ekpri n̄kpọitie oro, mma nyet benti ke mme urụk ye tọwa oro. Ndusụk owo ẹma ẹbụp mi m̀mê nnyịn ima inen̄ede ibọn̄ akam ke adan̄aemi inamde utom oro!

Utom ndaeyo oro mmendifreke tutu amama ekedi ediyet mme window nnyụn̄ nyet benti ke mme itịm window ufọk umịn̄n̄wed. Nnyịn ikokot utom emi nduọkodudu ndaeyo nnyịn. Nnyịn ima itan̄ n̄kpọ oro ididọkde ida ikọk ndien ke ikamade n̄kpọ umen owo ndọk enyọn̄, nnyịn ima isidọk inyụn̄ isụhọde ufọk emi ekenyenede enyọn̄ itiaita.

Ubon Oro Ọnọde Ibetedem

Ke 1932 ete mi ama akpa, ndien mma n̄kere m̀mê n̄kpakam nnyọn̄ ufọk n̄kan̄wam ke ndise mban̄a Mama. Ntre mbemiso udia uwemeyo usen kiet, mma n̄wet n̄kpọ n̄kenịm ke ibuot  okpokoro emi Brọda Rutherford, etieibuot N̄ka ekesitiede. Ke babru oro mma nsịn eben̄e ndinyene nneme ye enye. Ke okụtde udọn̄ oro n̄kenyenede onyụn̄ ọfiọkde ete ke nditọeka mi iren ye iban ke ẹsụk ẹdu ke ufọk, enye ama obụp ete, “Ndi omoyom ndidu ke Bethel nnam utom Ọbọn̄?”

Mma mbọrọ, “Ih, mmoyom.”

Ntre enye ama ọnọ ekikere ete n̄wet Mama man mfiọk m̀mê enye enyịme ye ubiere mi nditie. Se n̄kanamde edi oro, ndien enye ama ọbọrọ ete ke imenyịme ye ubiere mi. Mma nnen̄ede mma mfọnido ye item Brọda Rutherford.

Ke ufan̄ ediwak isua oro n̄kodude ke Bethel, mma nsinọ leta ẹsọk ubon mi nnyụn̄ nsịn udọn̄ nnọ mmọ ndinam n̄kpọ Jehovah, kpa nte Mama ekesịnde udọn̄ ọnọ mi. Mama ama akpa ke July 1937. Nso ọkpọsọn̄ odudu ke enye ekedi ntem ke ubon nnyịn! Sụk akpan ye adiaha eka mi, Paul ye Esther, ye ekpri eyeneka mi an̄wan Lois mîkakabakede idi Mme Ntiense. Paul, nte ededi, ama ama utom nnyịn onyụn̄ ọnọ isọn̄ emi ikadade ibọp akpa Ufọkmbono Obio Ubọn̄ nnyịn.

Ke 1936 ekpri eyeneka mi an̄wan Eva ama akabade edi asiakusụn̄, m̀mê ọkwọrọikọ uyọhọ ini. Kpa ke isua oro enye ama ọdọ Ralph Thomas, ndien ke 1939 ẹma ẹnọ mmọ ndinam utom emi ẹsan̄ade-san̄a ndin̄wam mme esop Mme Ntiense Jehovah. Ekem mmọ ẹma ẹwọrọ ẹka Mexico, ke ebiet emi mmọ ẹkedude ke isua 25 ẹn̄wam ke utom Obio Ubọn̄.

Ke 1939 nditọeka mi iban Alice ye Frances ẹma ẹdụk utom usiakusụn̄ n̄ko. Nso n̄kpọ idatesịt ke ekedi ntem ndikụt Alice adade ekpere okpokoro ke mbono ke St. Louis ke 1941 ndiwụt nte ẹkamade ukwak ubre usanikwọ oro n̄ketienede n̄n̄wam ke ndisio ndi! Okposụkedi Alice ekenyenede nditre usiakusụn̄ esie ndusụk ini ke ntak mbiomo ubon, ke ofụri ofụri enye esịn isua 40 ke utom ukwọrọikọ uyọhọ ini. Frances ama odụk Ufọkn̄wed Enyọn̄-Ukpeme Ukpep Bible eke Gilead ke 1944 onyụn̄ anam utom ke ndusụk ini nte isụn̄utom ke Puerto Rico.

Joel ye Elwood, n̄kpri-n̄kan nditọiren iba ke ubon, ẹma ẹkabade ẹdi mme asiakusụn̄ ke Montana ke ntọn̄ọ ntọn̄ọ iduọk isua 1940. Joel akaiso ndidi anam-akpanikọ Ntiense ndien idahaemi anam utom nte asan̄autom unamutom. Elwood ama adiana ye ami ke Bethel ke 1944, anamde esịt mi ọyọhọ ye akwa idara. Enye ikesịmke isua ition ke ini n̄kọkpọn̄de ufọk. Nte n̄ketịn̄de ke mbemiso, nnyịn ikanam utom ọtọkiet ndiwet idiọn̄ọ oro ke ufọk umịn̄n̄wed, “Kot Ikọ Abasi kpa Edisana Bible ke Usen ke Usen.” Mmesiwak ndikere m̀mê adan̄a ediwak owo didie ẹmi ẹkụtde idiọn̄ọ oro ke ediwak isua ẹmi ke ẹsịn udọn̄ ẹnọ ndikot Bible mmọ.

 Elwood ama anam utom ke Bethel tutu ke 1956 ke ini enye ọkọdọde Emma Flyte. Ke ediwak isua Elwood ye Emma ẹma ẹnam utom ọtọkiet ke utom ukwọrọikọ uyọhọ ini, ẹnamde utom esisịt ini ke Kenya, Africa, ọkọrọ ye Spain. Elwood ama ọduọ udọn̄ọ kansa onyụn̄ akpa ke Spain ke 1978. Emma ke osụk odu ke Spain ke utom usiakusụn̄ tutu osịm mfịn emi.

Ndọ ye Ubon

Ke September 1953, mma n̄kpọn̄ Bethel ndikọdọ Alice Rivera, asiakusụn̄ ke Esop Brooklyn Center emi n̄kesidụkde mme mbonoesop. Mma nnam Alice ọfiọk nte ke nnyene idotenyịn eke heaven, edi enye ama osụk enyene udọn̄ ke ndidọ mi.—Philippi 3:14.

Ke mma n̄kodu ke Bethel ke isua 23, okoyom nnam ata ukpụhọde nditọn̄ọ utom idịbi udia nte eyet benti man nse mban̄a Alice ye idemmi ke utom usiakusụn̄. Alice ama esinọ un̄wam kpukpru ini, idem ke ini emi enye ekenyenede nditre usiakusụn̄ ke ntak unana nsọn̄idem. Ke 1954 nnyịn ima idori enyịn ndinyene akpa eyen nnyịn. Uman ama ọsọn̄, okposụkedi n̄kpọ mîkanamke eyen nnyịn, John. Iyịp ama ọwọrọ Alice ke idem etieti ke ini usiakidem tutu mme dọkta ẹkere ke enye ididụhe uwem. Ke idaha kiet mmọ ikakam ikopke oti atuakde. Edi enye ama ọbọhọ okoneyo oro ndien nte ini akakade enye ama okop nsọn̄idem ọyọhọ ọyọhọ.

Isua ifan̄ ke ukperedem, ke ini ete Alice akakpade, nnyịn ima iwọrọ ikpọn̄ Isuo Long man ikodu ye eka esie. Sia nnyịn mîkenyeneke moto, n̄kesisasan̄a mîdịghe nsan̄a ke bọs ye usụn̄ idakisọn̄. Ami ke ntre mma n̄keme ndikaiso ke utom usiakusụn̄ nnyụn̄ n̄n̄wam ubon mi. Idatesịt oro nnyenede ke utom uyọhọ ini otịm okpon akan n̄waidem ekededi oro nnamde. Ndin̄wam mme owo—utọ nte Joe Natale, emi ọkọkpọn̄de enyene-uforo utom ubre baseball man akabade edi Ntiense—akam edi kiet ke otu ediwak edidiọn̄ oro nnyenede.

Ke 1967, nte mme idaha ẹketịmde-tịm ẹdiọk ke n̄kan̄ New York, mma mbiere ndida Alice ye John mfiak nnyọn̄ n̄kodụn̄ ke Ellensburg, obio emana mi. Idahaemi mmokop uyụhọ ndikụt ata ediwak nditọ nditọ ye nditọ-nditọ nditọ eka mi ẹbuanade ke utom ukwọrọikọ uyọhọ ini. Ndusụk ẹkam ẹnamde utom ke Bethel. John ye n̄wan esie ye nditọ esie ke ẹnam n̄kpọ Jehovah n̄ko ke edinam akpanikọ.

Ke mfụhọ, mma ntaba edima n̄wan mi, Alice, ke n̄kpa ke 1989. Ndiyọhọ ke utom ukwọrọikọ uyọhọ ini aman̄wam mi ndiyọ nnama emi. Ami ye Alice eyeneka mi an̄wan ke idara utom usiakusụn̄ ọtọkiet idahaemi. Eye didie ntem ndifiak ndụn̄ ke idak ukem ọkọmufọk oro nnyụn̄ n̄kụt idem nnyịn nte iyọhọde ke ata n̄kponn̄kan utom emi!

Ke ini utọ eke 1994, mma n̄ka n̄kese Bethel ke akpa ini ke n̄kpọ nte isua 25. Nso n̄kpọ idatesịt ke ekedi ntem ndikụt ediwak mbon oro n̄kanamde utom kiet ke se iwakde ikan isua 40 ẹmi ẹkebede! Ke ini n̄kakade Bethel ke 1930, owo 250 kpọt ẹkedu ke ubon oro, edi mfịn ubon Bethel ke Brooklyn awak akan owo 3,500!

Udia eke Spirit Omụm Mi Akama

Tụhi-tụhi ke ekese usenubọk mmesinam isan̄ ke mben Akpa Yakima emi ekperede ufọk nnyịn. Mmesikeme ndida do n̄kụt ediye Obot Rainier emi snow ofụkde oro okon̄de akan mita 4,300 ke ikpaenyọn̄. Unam ikọt ẹyeyọhọ. Ndusụk ini mmesikụt okoyo, ndien ini kiet mma n̄kam n̄kụt okoyo edop.

Ndobo ndobo, ini ikpọn̄ ẹmi ẹsinam mi ntie n̄kere mme utịbe utịbe ndutịm Jehovah. Mbọn̄ akam mben̄e ukeme ndika iso nnam n̄kpọ Abasi nnyịn, Jehovah, ke edinam akpanikọ. Ami n̄ko mmesima ndikwọ ikwọ nte nnamde isan̄, akpan akpan ikwọ oro “Making Jehovah’s Heart Glad” (Ndinam Esịt Jehovah Adat), emi mme ikọ esie ẹdọhọde: “Akwa Abasi, nnyịn imọn̄wọn̄ọ ndinam uduak fo; ke ọniọn̄ nnyịn iyanam utom fo ima. Koro adan̄aoro ke nnyịn ifiọk ke iyenyene udeme ke ndinam ima ima esịt fo enem.”

Mmokop idatesịt nte ke mma mmek ndinam utom oro anamde esịt Jehovah adat. Mbọn̄ akam nte ami n̄kpakam n̄ka iso ndinam utom emi tutu mbọ utịp eke heaven oro ẹken̄wọn̄ọde. Udọn̄ mi edi nte mbụk emi akpakam onụk mbon en̄wen n̄ko ndida uwem mmọ nsịn ke ‘ndin̄wana udia eke mîdibiarake.’—John 6:27.

[Mme ndise ke page 23]

Elwood nte ewetde idiọn̄ọ oro “KOT IKỌ ABASI KPA EDISANA BIBLE KE USEN KE USEN”

[Ndise ke page 24]

Ye Grant Suiter ye John Kurzen, iwụtde nte ẹkamade obufa ukwak ubre usanikwọ ke mbono ke 1940

[Ndise ke page 25]

Ke 1944 nnyịn oro ikodude ke akpanikọ ikodu ke utom ukwọrọikọ uyọhọ ini: David, Alice, Joel, Eva, Elwood, ye Frances

[Ndise ke page 25]

Nditọeka mi oro ẹsụhọde ọtọn̄ọde ke ufien: Alice, Eva, Joel, David, ye Frances