Ntak Oro Ibọn̄de Akam ke Enyịn̄ Jesus-e?

JESUS ama esiwak ndikpep mme owo n̄kpọ mban̄a akam. Ke eyo esie, mme adaiso ido ukpono mme Jew ẹma ẹsida “ke mme inụk akwa efak” ẹbọn̄ akam. Ntak-a? “Man mme owo ẹkụt.” Ke akpanikọ, mmọ ẹkeyom mme owo ẹkụt nte mmimọ isịnde idem ke ido ukpono. Ediwak mmọ ẹma ẹsibọn̄ nnyan akam, ẹtịn̄de n̄kpọ kiet ẹfiak ẹtịn̄ nte n̄kpọ eke ẹdọhọde “ke nditịn̄ uwak ikọ” edinam ẹkop akam mmọ. (Matthew 6:5-8) Jesus ama owụt ke mme utọ edinam oro inyeneke ufọn, ke ntem an̄wamde mbon esịt akpanikọ ẹfiọk se mmọ mîkpanamke ke ini ẹbọn̄de akam. Edi, enye ama an̄wam mmọ n̄ko ẹfiọk nte ẹkpebọn̄de akam.

Jesus ama ekpep ke akam nnyịn ekpenyene ndiwụt ke ọdọn̄ nnyịn ndikụt ẹnamde enyịn̄ Abasi asana, ke imoyom Obio Ubọn̄ Esie edi, ke imonyụn̄ iyom uduak Esie ada itie. Jesus ama ekpep ke ọfọn n̄ko ndiben̄e Abasi mme n̄kpọ oro nnyịn iyomde. (Matthew 6:9-13; Luke 11:2-4) Jesus ama ada mme uwụtn̄kpọ ekpep nte ke oyom isọn̄ọ iyịre, inyene mbuọtidem, inyụn̄ isụhọde idem man Jehovah okop akam nnyịn. (Luke 11:5-13; 18:1-14) Ndien enye ama ananam se enye ekekpepde owụt.—Matthew 14:23; Mark 1:35.

 Item emi Jesus ọkọnọde mi ama an̄wam mme mbet esie ẹfori uduot akam mmọ. Edi, Jesus ama ebet tutu esịm okoneyo oro ẹkeyomde ndiwot enye man ekpep mme mbet esie ata akpan n̄kpọ aban̄ade akam.

“Obufa N̄kpọ Aban̄ade Akam”

Jesus ama ada ata ekese ini esịn udọn̄ ọnọ mme anam-akpanikọ apostle esie ke okoneyo oro enye okoyomde ndikpa. Oro ekedi ata nnennen ini ndiyarade obufa n̄kpọ. Jesus ọkọdọhọ ete: “Ami ndi usụn̄ ye akpanikọ ye uwem. Baba owo kiet itieneke Ete ibọhọke ebe ke ami.” Ekem, enye ọn̄wọn̄ọ ọnọ mmọ ete: “Se ededi oro mbufo ẹben̄ede ke enyịn̄ mi, ami nyanam, man ẹkpenọ Ete ubọn̄ ebe ke Eyen. Edieke mbufo ẹben̄ede n̄kpọ ekededi ke enyịn̄ mi, nyanam.” Enye ama etịn̄ ke utịt nneme esie ete: “Tutu esịm emi mbufo iben̄eke baba n̄kpọ kiet ke enyịn̄ mi. Ẹben̄e ndien mbufo ẹyebọ, man ẹkpenam idatesịt mbufo ọyọhọ.”—John 14:6, 13, 14; 16:24.

Mme ikọ emi ẹma ẹnen̄ede ẹtụk mmọ. N̄wed ukabade ikọ Bible kiet ọdọhọ ke emi ekedi “obufa n̄kpọ aban̄ade akam.” Ikọ Jesus ikọwọrọke ke enye oyom ẹtọn̄ọ ndibọn̄ akam nnọ imọ utu ke ndibọn̄ nnọ Abasi. Utu ke oro, enye okowụt obufa usụn̄ oro ẹkpebọn̄de akam ẹnọ Jehovah Abasi.

Edi akpanikọ nte ke Jehovah esikop akam mme anam-akpanikọ asan̄autom esie kpukpru ini. (1 Samuel 1:9-19; Psalm 65:2) Nte ededi, ọtọn̄ọde ke ini oro idụt Israel ẹkekabarede ẹdi ikọt ediomi Abasi, akana kpukpru mbon oro ẹkeyomde Abasi okop akam mmimọ ẹdiọn̄ọ nte ke Israel edi edimek idụt Abasi. Ndien nte ini akakade, ọtọn̄ọde ke eyo Solomon, akana mmọ ẹdiọn̄ọ ke temple ekedi ebiet oro Abasi emekde ete ẹda ẹfọp uwa ẹnọ imọ. (Deuteronomy 9:29; 2 Chronicles 6:32, 33) Edi ẹkenyene ndituak ibuot nnọ Abasi ke utọ usụn̄ emi ke esisịt ini. Nte apostle Paul ekewetde, Ibet oro ẹkenọde nditọ Israel ye uwa emi ẹkesiwade ke temple oro ẹkedi “mbukpọn̄ nti n̄kpọ eke ẹdidide, edi mîdịghe ata idem n̄kpọ.” (Mme Hebrew 10:1, 2) Akana ata idem n̄kpọ edida itie mbukpọn̄ n̄kpọ oro. (Colossae 2:17) Ọtọn̄ọde ke 33 E.N., itie ebuana owo ye Jehovah ikọkọn̄ọke aba ke ndinịm Ibet Moses. Utu ke oro, enye ọkọkọn̄ọ ke owo ndisụk ibuot nnọ enye emi Ibet oro akanyande ubọk owụt—Christ Jesus.—John 15:14-16; Galatia 3:24, 25.

Enyịn̄ “Oro Okon̄de Akan Kpukpru Enyịn̄”

Jesus ama etịn̄ akakan ntak emi anamde ẹkeme ndisan̄a n̄kpere Jehovah onyụn̄ ọdọhọ ke  imọ idi ufan emi okopde odudu, emi inamde Abasi okop onyụn̄ eyere akam nnyịn. Nso inam Jesus anam emi ọnọ nnyịn?

Sia kpukpru nnyịn ikamanade ke idiọkn̄kpọ, idụhe utom oro ikpanamde m̀mê uwa oro ikpọfọpde emi ekemede ndiyet nnyịn ọkọp idiọkn̄kpọ oro m̀mê ndinam nnyịn inyene eti itie ebuana ye edisana Abasi nnyịn, kpa Jehovah. (Rome 3:20, 24; Mme Hebrew 1:3, 4) Edi, Jesus ama ọnọ mfọnmma uwem esie man osio isop idiọkn̄kpọ ubonowo. (Rome 5:12, 18, 19) Idahaemi, kpukpru mbon oro ẹyomde ndinyene edisana idaha ye ‘ifụre nditịn̄ ikọ’ ke iso Jehovah, ẹkeme ndinyene emi edieke mmọ ẹbuọtde idem ke uwa ufak Jesus ẹnyụn̄ ẹbọn̄de akam ke enyịn̄ esie.—Ephesus 3:11, 12.

Ke ini ibọn̄de akam ke enyịn̄ Jesus, nnyịn iwụt ke imọbuọt idem ke ikpehe ita oro Jesus adade osu uduak Abasi: (1) Enye edi “Eyenerọn̄ Abasi,” emi uwa esie anamde ẹkeme ndifen idiọkn̄kpọ. (2) Jehovah ama anam enye eset, ndien idahaemi enye edi “akwa oku” oro anamde ibọ ufọn ito uwa ufak. (3) Enye ikpọn̄-ikpọn̄ edi “usụn̄” oro ikemede ndisan̄a n̄kpere Jehovah ke akam.—John 1:29; 14:6; Mme Hebrew 4:14, 15.

Ndibọn̄ akam ke enyịn̄ Jesus ọnọ enye ukpono. Odot inọ Jesus utọ ukpono oro, sia Jehovah aduakde ete “ke enyịn̄ Jesus kpukpru edọn̄ ẹkpetọn̄ọ . . . , kpukpru edeme ẹkpenyụn̄ ẹnyịme an̄wan̄wa ẹte Jesus Christ edi Ọbọn̄, ẹnọ Abasi Ete ubọn̄.” (Philippi 2:10, 11) Ke edide akpan n̄kpọ akan, ndibọn̄ akam ke enyịn̄ Jesus ọnọ Jehovah ubọn̄, kpa enye emi ọkọnọde Eyen esie ete edifak nnyịn.—John 3:16.

Bible ọnọ Jesus nsio nsio udorienyịn̄ ye enyịn̄ man an̄wam nnyịn ifiọk nte idaha esie okponde eketre. Mme udorienyịn̄ ye enyịn̄ emi ẹn̄wam nnyịn ndifiọk ediwak ufọn emi ibọde ito mme n̄kpọ oro Jesus akanamde ke eset, se enye anamde idahaemi, ye se enye edinamde ọnọ nnyịn ke ini iso. (Se ekebe oro, “Akpan Udeme Jesus,” emi odude ke page 14.) Ke akpanikọ, ẹmenọ Jesus “enyịn̄ oro okon̄de akan kpukpru enyịn̄.” * Ẹnọ enye kpukpru odudu ke heaven ye ke isọn̄.—Philippi 2:9; Matthew 28:18.

 Akam Nnyịn Ikpetiehe Eto Eto

Ke akpanikọ, nnyịn ikpenyene ndibọn̄ akam ke enyịn̄ Jesus edieke iyomde Jehovah okop akam nnyịn. (John 14:13, 14) Edi ikpanaha nnyịn idọhọ “ke enyịn̄ Jesus” ediwak ini nte isụk ibọn̄de akam. Ntak-a?

Kere ban̄a uwụtn̄kpọ emi. Ke ini anam-mbubehe ewetde fi leta, enye ekeme ndiwet “ami okwo” ke utịt leta oro. Ndi oro ọwọrọ ke enye enen̄ede ama fi, m̀mê enye onyụn̄ ewet se ẹsiwetde ke utịt leta? Ke akpanikọ, ikpenyene ndikot enyịn̄ Jesus ukpono ukpono ke akam nnyịn, utu ke ndinam nte owo ewet “ami okwo” ke utịt leta mbubehe esie. Okposụkedi ‘mînaha idop akam,’ nnyịn inyene ndibọn̄ akam ke “ofụri esịt,” idịghe ndinam enye etie eto eto.—1 Thessalonica 5:17; Psalm 119:145.

Didie ke nnyịn ikpetre ndidọhọ “ke enyịn̄ Jesus” ntre ntre? Nsinam mûtiehe ukere nti edu Jesus? Kere ban̄a se enye ama akananam ye se enye enyịmede ndinam nnọ fi. Bọn̄ akam kọm nyụn̄ toro Jehovah ke utịbe utịbe usụn̄ oro enye adade Jesus anam uduak esie. Nte afo anamde emi, afo eyenen̄ede ọbuọt idem ke un̄wọn̄ọ Jesus emi: “Edieke mbufo ẹben̄ede Ete n̄kpọ ekededi enye ọyọnọ mbufo ke enyịn̄ mi.”—John 16:23.

[Ikọ Idakisọn̄]

[Se ẹwetde ke ikpọ abisi ke page 13]

Nnyịn inyene ndibọn̄ akam ke “ofụri esịt,” idịghe ndinam enye etie eto eto

[Ekebe/Ndise ke page 14]

AKPAN UDEME JESUS

Man etịm ọfiọk udeme Jesus, kere ban̄a ndusụk udorienyịn̄ esie, se ẹtịn̄de ẹban̄a enye, ye enyịn̄ oro ẹkotde enye.

Adausụn̄.—Matthew 23:10.

Akpan Isụn̄utom Uwem.—Utom 3:15.

Akpatre Adam.—1 Corinth 15:45.

Akwa Oku.—Mme Hebrew 4:14, 15.

Amen.—2 Corinth 1:19, 20; Ediyarade 3:14.

Anam-Akpanikọ Ntiense. —Ediyarade 1:5.

Andikpep.—John 13:13.

Andinyan̄a.—Luke 2:11.

Apostle.—Mme Hebrew 3:1.

Christ/Messiah.—Matthew 16:16; John 1:41.

Ebiereikpe.—Utom 10:42.

Edidem.—Ediyarade 11:15.

Esịne-Ufọt.—1 Timothy 2:5.

Eti Ekpemerọn̄.—John 10:11.

Eyen Abasi.—John 1:34.

Eyen Owo.—Matthew 8:20.

Eyenerọn̄ Abasi.—John 1:29.

Ibuot Esop.—Ephesus 5:23.

Ikọ.—John 1:1.

Immanuel.—Matthew 1:23.

Michael Etubom Mme Angel.—1 Thessalonica 4:16; Jude 9.

Nsinsi Ete.—Isaiah 9:6.

Ọbọn̄.—John 13:13.

Ọbọn̄ Emem.—Isaiah 9:6.

Ọkpọsọn̄ Abasi.—Isaiah 9:6.

Utịbe, Ọnọ-Item.—Isaiah 9:6.