Ọyọhọ 3

Ka Iso Wụt Esịtekọm

NSO KE BIBLE EKPEP? “Ẹnọ ekọm ke kpukpru n̄kpọ.”—1 Thessalonica 5:18.

NSO IDI MFỊNA? Mbon oro ẹkohorede idem ẹnyụn̄ ẹnanade esịtekọm ẹkan nnyịn ẹkụk, ndien edu mmọ ekeme ndibe nnyịn. (2 Timothy 3:1, 2) Ke adianade do, ekeme ndidọn̄ nnyịn ndinam mme n̄kpọ efen efen kpa ye oro inyenede ekese ndinam idahaemi. Mme mfịna m̀mê udọn̄ edinam se idọn̄de nnyịn ekeme ndikan nnyịn ubọk tutu nnyịn inyeneke aba ini ndiwụt esịtekọm mban̄a se ima ikenyenyene m̀mê ndikọm mme owo ke se mmọ ẹnamde ẹnọ nnyịn.

NSO KE AKPANAM? Da ini kere ban̄a nti n̄kpọ oro afo enyenede idahaemi. Edi akpanikọ nte ke mme mfịna ẹkeme ndikan fi ubọk. Edi kere ban̄a uwụtn̄kpọ Edidem David. Mme idomo ẹma ẹnam esịt ọduọ onyụn̄ etịmede enye ndusụk ini. Kpa ye oro, enye ama ọbọn̄ akam ọnọ Abasi ete: “Mmese ofụri utom fo; mmetie n̄kere se ubọk fo ẹkenamde.” (Psalm 143:3-5) Kpa ye mme idomo emi David okosobode, enye ama aka iso owụt esịtekọm onyụn̄ okop uyụhọ ke uwem.

Kere ban̄a se mbon en̄wen ẹnamde man ẹn̄wam fi, nyụn̄ wụt esịtekọm ke se mmọ ẹnamde oro. Jesus ama enịm akakan uwụtn̄kpọ ke afan̄ emi. Ke uwụtn̄kpọ, ke ini Mary ufan esie ọkọtọhọde ọsọn̄urua aran ọduọk enye ke ibuot ye ke ukot, ndusụk owo ẹma ẹbụp ẹte: “Ntak emi ẹbahade enem-utebe aran emi?” * Mbon oro ẹkesụkde enye uyo do ẹkekere ke akpana ẹnyam aran oro ẹmen okụk oro ẹnọ mme ubuene. Jesus ama ọbọrọ ete: “Ẹkpọn̄ enye. Ntak emi ẹdomode ndifịna enye?” Ekem adian do ete: “Enye akanam se enye ekemede.” (Mark 14:3-8; John 12:3) Utu ke Jesus ndiwụk ntịn̄enyịn ke se Mary mîkanamke, enye ama akam owụt esịtekọm ke se Mary akanamde.

Ndusụk owo ẹsiwụt esịtekọm ẹban̄a mbonubon, mme ufan, ye mme edidiọn̄ eken ke ini mmọ mîdụhe aba m̀mê ke ini ẹtabade mmọ. Afo emekeme ndikpan emi nditịbe edieke etiede ekere ufọn oro ọbọde idahaemi! Ntak mûtiehe ukere m̀mê ndiwewet mme n̄kpọ oro owụtde esịtekọm aban̄a?

Sia edide Abasi esinọ “kpukpru nti enọ,” ọfọn ikọm enye ke ini ibọn̄de akam. (James 1:17) Ndinam emi kpukpru ini ekeme ndin̄wam nnyịn ika iso iwụt esịtekọm inyụn̄ iyụhọ ye se inyenede.—Philippi 4:6, 7.

[Ikọ Idakisọn̄]

[Ndise ke page 6]

Ndi emesiwụt esịtekọm ke se mbon en̄wen ẹnamde ẹnọ fi?