Ini Ewe ke Ekọn̄ Armageddon Edin̄wana?

‘N̄kụt, ndien, sese! akwa otuowo, emi baba owo kiet mîkemeke ndibat, eke ẹtode kpukpru idụt ye esien ye obio ye usem nte ẹtode akwa ukụt ẹwọn̄ọ.’—EDIYARADE 7:9, 14.

EKỌN̄ Armageddon enen̄ede ekpere. Isan̄a didie ifiọk?

Ke akpa ifet, enyene mme owo ke ofụri ererimbot emi ẹdianade kiet ẹnam n̄kpọ Jehovah ẹnyụn̄ ẹda mme edumbet Bible ẹdu uwem. Kpa ye emi mmọ ẹtode nsio nsio idụt ye esien, ẹnyụn̄ ẹsemde nsio nsio usem, Abasi anam mmọ ẹdiana kiet nte ata nditọeka ẹnyụn̄ ẹma kiet eken. Mme Ntiense Jehovah ẹnyene utọ ima emi.—John 13:35.

Satan n̄ko ke atan̄ ikọt esie obon ọtọkiet, ndien ibịghike, enye ọmọn̄ ada mmọ an̄wana ye ikọt Jehovah emi ẹtiede emem emem mi, mînyụn̄ ikemeke ndin̄wana nnyan̄a idem. (Ezekiel 38:8-12; Ediyarade 16:13, 14, 16) Isan̄a didie ifiọk? Bible etịn̄ mme n̄kpọ mme n̄kpọ emi ẹditịbede, emi ẹdinamde ifiọk ke ekọn̄ Armageddon ọmọn̄ ọtọn̄ọ. Ediwak ke otu emi ẹtetịbe.

Enye Emi Afo Okụtde

Mme mbet Jesus ẹma ẹbụp Jesus nte mme owo ẹdisan̄ade ẹfiọk ke “akpatre ini editịm n̄kpọ emi” ekpere. (Matthew 24:3) Jesus ama ọdọhọ ke “idụt ayadaha an̄wana ye idụt” ini oro, “obio ubọn̄ kiet oyonyụn̄ adaha an̄wana ye obio ubọn̄ en̄wen, ndien akan̄ ye unyekisọn̄ ẹyedu ke nsio nsio ebiet.” Ekem ọdọhọ ke “kpukpru n̄kpọ emi [ẹdidi] ntọn̄ọ ubiak uman.” (Matthew 24:7, 8) Apostle Paul n̄ko ama etịn̄ aban̄a ini emi onyụn̄ okot enye ‘mme akpatre usen emi ọsọn̄de ndiyọ.’ (2 Timothy  3:1) Ndi se afo okụtde mfịn esinam ekere m̀mê mme itie N̄wed Abasi emi ẹkam ẹsu emi?

Ntak emi uwem enen̄erede ọsọn̄ ke mme akpatre usen emi? Apostle John ọnọ ntak. Enye ọkọdọhọ ke oyodu ‘ekpri ini’ emi Satan ye mme demon esie ẹdidude ke isọn̄ emi ibak ibak mmọ. John ọkọdọhọ n̄ko ke Satan edisan̄a ye “akwa iyatesịt” ini emi. (Ediyarade 12:7-12) Ndi omokụt nte mme owo ke kpukpru ebiet ẹtiede iyatesịt iyatesịt ye afai afai?

Jesus ama ọdọhọ n̄ko ke ikọt Abasi ẹyenam ata akwa utom ke ndiọkeyo emi, ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matthew 24:14) Mfịn, idụt oro Mme Ntiense Jehovah ẹkwọrọde eti mbụk Obio Ubọn̄ Abasi ebe 235, ndien mmọ ẹnam emi ke se ibede usem 500. Idụhe n̄wed ido ukpono emi ẹkotde ke ofụri ererimbot nte Enyọn̄-Ukpeme ye Awake! mmọ. Mmọ ẹkabade Bible n̄ko ke ata ediwak usem. Ẹda enọ imaesịt ẹnam utom Mme Ntiense Jehovah, owo inyụn̄ ikpehe mmọ okụkọfiọn̄. Ndi ukereke ke ukwọrọikọ Mme Ntiense Jehovah emi osu se Jesus eketịn̄de?

Bible etịn̄ n̄ko se iditịbede mbemiso ekọn̄ Armageddon. Yak ineme n̄kpọ ita emi afo editienede okụt.

Mme N̄kpọ Emi Ẹditịbede ke Mîbịghike

1. Bible ọdọhọ ke ererimbot ẹyedọhọ ke imenyene “emem ye ifụre.” Mmọ ẹdikere ke imọkọkọk ikpọ mfịna ererimbot ima, edi se iditịbede ke oro ebede ediwụt ke mmọ ikemeke ndisịn emem ke isọn̄ emi.—1 Thessalonica 5:1-3.

2. Nsio nsio ukara ererimbot emi ẹyetọn̄ọ en̄wan ye ido ukpono ke ofụri ererimbot. Bible okot mme ukara emi idiọk unam; okot nsunsu ido ukpono akpara emi awatde unam emi ke edem. (Ediyarade 17:3, 15-18) Idiọk unam emi ayanam se Abasi oyomde ke ndisobo kpukpru ido ukpono oro ẹbian̄ade mme owo ẹte ke ikpono Abasi.

Apostle John etịn̄ ke ndamban̄a usụn̄ nte n̄kpọ emi editịbede ete: “Nnụk duop oro afo okokụtde, ye idiọk unam oro, mmọ ẹyesua akpara oro ẹnyụn̄ ẹsobo enye ẹnyụn̄ ẹnịm enye iferi, ẹnyụn̄ ẹta obụkidem esie ẹnyụn̄ ẹfọp enye ke ikan̄ ofụri ofụri. Koro edi Abasi ekesịn emi ke esịt mmọ ete ẹnam ekikere imọ.”—Ediyarade 17:16, 17.

3. Ke ukara ererimbot ẹma ẹkesobo nsunsu ido ukpono ẹma, Satan ayada mmọ ọwọn̄ọde ẹbịne ikọt Jehovah Abasi.—Ediyarade 7:14; Matthew 24:21.

Ufọn Emi Edidiade

Edieke akanam mûnen̄ekede ukpep Bible, edisụk itie fi nte ke se inemede emi iditịbeke. Edi enyene se inamde inịm ke ibịghike, kpukpru emi ẹyetịbe. Ediwak ntịn̄nnịm ikọ Bible emi ẹsude ẹnam inịm ke mmọ emi n̄ko iditreke-tre ndisu. *

Nnyịn imesịn udọn̄ inọ fi ite ada ini odụn̄ọde se inamde Mme Ntiense Jehovah ẹnịm ke “ekọn̄ akwa usen Abasi Ata Ọkpọsọn̄” enen̄ede ekpere ye ntak emi mûkpukopke ndịk ekọn̄ emi. Yak mmọ ẹtịn̄ ẹnọ fi se akpanamde man etiene esịne ke otu mbon oro Jehovah Abasi edinyan̄ade usen oro. (Ediyarade 16:14) Se edikpepde ekeme ndinam ọtọn̄ọ ndinyene idotenyịn ke n̄kpọ ọyọfọn.

[Ikọ Idakisọn̄]

[Se ẹwetde ke ikpọ abisi ke page 8]

Ndi ukereke ke ukwọrọikọ Mme Ntiense Jehovah osu se Bible eketịn̄de?