N̄kokpon ke Turku, emi edide esụkmbehe, edi emi ediwak owo mînyeneke okụk. Ete mi ekedi otopita, ndien ami ye udọeka mi ima inen̄ede ima utopita. Ẹma ẹsiwak ndimia ata ye ami ke ufọkn̄wed man n̄n̄wana en̄wan, mma nsinyụn̄ n̄n̄wana n̄ko. Ini n̄kedide akparawa, mma ndụk idiọk n̄ka kiet emi ekesinamde ntetịm n̄n̄wana en̄wan. Ekem mma ntọn̄ọ ndikwọ ikwọ, n̄konyụn̄ nyom ndidi akwaikwọ.

Mma ndep ban nnyụn̄ nsiak n̄kaikwọ. Ami n̄kedi etubom n̄kaikwọ emi, mma nnyụn̄ ndiọn̄ọ ikwọ n̄kan kpukpru owo. N̄kesifrọ nte idat ke ini n̄kwọde ikwọ. Sia n̄kaikwọ nnyịn eketiede idat idat, mme owo ẹma ẹtọn̄ọ ndima nte nnyịn ikesibrede ikwọ. Ima itọn̄ọ ndibre ikwọ nnọ ata ediwak owo. Ima isinam ikwọ nnyịn inyam, ndien mme owo ẹma ẹnen̄ede ẹma akpatre emi ikọkwọde. Ke n̄kpọ nte 1988, ima ika ikebre ikwọ ke United States man ẹtetịm ẹdiọn̄ọ n̄kaikwọ nnyịn. Ikebre ke New York ye ke Los Angeles, inyụn̄ inam mbubehe ye ikpọ usiakifia emi ẹnamde n̄kpọ ẹban̄a ikwọ mbemiso ifiak inyọn̄ Finland.

Okposụkedi emi esịt ekenemde mi ke ini n̄kwọde ikwọ ye n̄kaikwọ nnyịn, okosụk etie nte enyene se nnanade, ntre uwem ikenen̄ekede inem mi. N̄kamaha ọkpọsọn̄ mbuba ye ndomoidem emi okodude ke otu mme ebreikwọ. N̄konyụn̄ mmaha uwem atahade oro n̄kodude. Mma ndiọn̄ọ ke ndi idiọkowo, nnyụn̄ n̄kere ke ndika hell. Mma n̄kot nsio nsio n̄wed ido ukpono man ndiọn̄ọ se n̄kpanamde. Mma nnyụn̄ nsịn ifịk mbọn̄ akam nte Abasi an̄wam mi kpa ye oro n̄kekerede ke ndikemeke ndinam se enye amade tutu amama.

N̄kesinam utom ke Post Ọfis. Usen kiet, mma ndifiọk ke owo itieutom nnyịn kiet edi Ntiense Jehovah. Ntre mma mfak enye mbụme. Edi nte enye akadade Bible ọbọrọ mi kpukpru mbụme mi ama enen̄ede enem mi tutu nnyịme enye ekpep mi Bible. Ke mma n̄kekpep n̄kpọ ke urua ifan̄, ẹma  ẹdọhọ n̄kaikwọ nnyịn ẹbre ikwọ emi ẹdimende ikanyam ke United States. Mma n̄kere ke mmọdọk obot n̄kwọhọde ikpat ndien.

Mma ndọhọ Ntiense oro ekesikpepde mi Bible ke mma nnanam ikwọ kiet emi nnamke aba, ke nyenen̄ede nnam se Bible ekpepde ndien. Enye iketịn̄ke se n̄kpanamde, edi ọkọdọhọ n̄kokot se Jesus eketịn̄de ke Matthew 6:24. Itien̄wed oro ọdọhọ ete: “Baba owo kiet ikemeke ndidụk ufụn nnọ eteufọk iba.” Idem ama akpa mi ke ini n̄kọfiọkde se ikọ Jesus emi ọwọrọde. Edi se n̄kanamde ke oro ebede ama onyụn̄ akpa owo emi ekesikpepde mi Bible idem. Mma ndọhọ enye ke mmọkpọn̄ n̄kaikwọ mi sia nyomde nditiene Jesus.

Bible eketie nte ukụtiso emi owụtde mi ebiet anade nnam ukpụhọde. (James 1:22-25) Mma n̄kụt ke n̄kodụhe uwem nte eyen owo. Mma nsitan̄ idem nnyụn̄ nyom ata ikpọ n̄kpọ. Mma nsikpe nditen̄, n̄n̄wana en̄wan, n̄n̄wọn̄ sika ye ikọn̄ekpo, nnyụn̄ n̄n̄wọn̄ mmịn mbe ubọk. Ke ini n̄kokụtde ke Abasi imaha kpukpru emi, esịt ama amia mi ufen. Edi mma mben̄e idem ndikabade esịt.—Ephesus 4:22-24.

Nte n̄kesidude uwem okosụk ananam esịt amia mi ufen. Edi Ntiense oro ama enen̄ede an̄wam mi. Enye ama owụt mi se Bible etịn̄de ke Isaiah 1:18. Itie oro ọdọhọ ete: “Mme idiọkn̄kpọ mbufo ẹkpetie nte iduot, ẹyenam mmọ ẹfia nte snow.” Itie Bible emi ye mme itie Bible en̄wen ẹma ẹnam nnen̄ede mfiọk ke Ete nnyịn eke heaven esitua owo mbọm, onyụn̄ oyom ndin̄wam mbon oro ẹkabarede esịt.

Ke mma n̄kenen̄ede mfiọk nnyụn̄ mma Jehovah, ama ọdọn̄ mi ndiyak uwem mi nnọ enye. (Psalm 40:8) Mma nna baptism ke 1992 ke akamba mbono ofụri ererimbot oro Mme Ntiense Jehovah ẹkenịmde St. Petersburg ke Russia.

Mmenyene ediwak ufan ke otu ikọt Jehovah. Imesisop idem ke ini ke ini ibre ata nti ikwọ inyụn̄ ikop inem enọ Abasi emi. (James 1:17) Ata akwa enọ emi Abasi ọnọde mi edi edima an̄wan mi Kristina. Mmesitịn̄ kpukpru n̄kpọ nnọ enye—se inemde mi esịt ye mme mfịna oro nsobode, ye nte enen̄erede etie mi ke idem.

Ekpedi n̄kodụkke esop Jehovah, nsehe nte n̄kpodu uwem nsịm mfịn. Akpa, ekesidi n̄kọmọde ke mfịna ye afanikọn̄ kiet n̄kọkọmọ ke en̄wen, edi idahaemi, mmenen̄ede n̄kop inem uwem.