Ekeme ndidi emesikop ke mbụk n̄kpọntịbe nte ẹnamde ndiọi n̄kpọ ke enyịn̄ ufọkabasi. Idịghe kpukpru ufọkabasi ẹkpono ata Abasi. (Matthew 7:15) Ke nditịm ntịn̄, ẹbian̄a ata ediwak owo.—Kot 1 John 5:19.

Edi Abasi ọfiọk mbon oro ẹnyenede eti esịt ẹnyụn̄ ẹmade akpanikọ. (John 4:23) Abasi ke okot utọ mbon oro ete ẹdikpep akpanikọ ke Ikọ esie, kpa Bible.—Kot 1 Timothy 2:3-5.

Jehovah Abasi ke atan̄ mme owo emi ẹkesikade nsio nsio ufọkabasi obon ọtọkiet. Enye ke ekpep mmọ akpanikọ, ke onyụn̄ ekpep mmọ ndima kiet eken. (Micah 4:2, 3) Ntem, emekeme ndida nte mmọ ẹmade kiet eken ndiọn̄ọ ke mmọ ẹkpono ata Abasi.—Kot John 13:35.

Mbon emi ẹkponode ata Abasi ẹda kpukpru ukpepn̄kpọ mmọ ẹto Bible ẹnyụn̄ ẹdu uwem nte Bible etemede. (2 Timothy 3:16) Mmọ ẹkpono enyịn̄ Abasi. (Psalm 83:18) Mmọ ẹnyụn̄ ẹkwọrọ ke Obio Ubọn̄ Abasi edi n̄kukụre idotenyịn ubonowo. (Daniel 2:44) Mmọ ẹkpebe Jesus ke ‘ndiyak un̄wana mmọ ayama,’ oro edi, ẹnam nti n̄kpọ ẹnọ mme owo. (Matthew 5:16) Mmọdo, ata mme Christian ẹdi mbon emi ẹsisan̄ade ẹkwọrọ eti mbụk Obio Ubọn̄ Abasi ẹnọ mme owo ke ufọk mmọ.—Kot Matthew 24:14; Utom 5:42; 20:20.