IBUOTIKỌ MAGAZINE EMI
Mmanie Ẹdi Mme Ntiense Jehovah?
“Ebịghi n̄kọdiọn̄ọ Mike. Enye edi Ntiense Jehovah. Edi ufọkabasi mmọ esikpakpa mi idem. Mmesikere m̀mê anie edi Jehovah. Ntak emi Mme Ntiense Jehovah mîsidiaha Christmas ye mme usọrọ ntre? Okûdi idiọk n̄ka ke Mike odụk emi-o?”—Becky, California, U.S.A.
“Ini emi mme mbọhọidụn̄ mi ẹketọn̄ọde ndikpep Bible ye Mme Ntiense Jehovah, mma nsikere m̀mê enyịn̄ oro ọwọwọrọ nso, m̀mê nso ikpanam ufọkabasi ekere utọ enyịn̄ oro!”—Zenon, Ontario, Canada.
“Ami ye n̄wan mi ikakaha ufọkabasi, ntre ke ini Mme Ntiense Jehovah ẹkedide ufọk nnyịn, ikekere ke se mmọ ẹdide nditịn̄ edi oro. Edi ima ikere ke edieke nnyịn mîkwe ufọn ke mme ufọkabasi emi ẹnen̄erede ẹdiọn̄ọ, ke ufọn idụhe ndikpakpa idem ye Mme Ntiense Jehovah.”—Kent, Washington, U.S.A.
“Ke nditịn̄ ofụri akpanikọ, n̄kọdiọn̄ọke mmọ n̄konyụn̄ ndiọn̄ọke se mmọ ẹnịmde.”—Cecilie, Esbjerg, Denmark.
Anaedi emesikụt mmọ ẹsan̄ade ke ufọk ke ufọk ẹkwọrọ ikọ ẹnyụn̄ ẹkwọrọde n̄ko ke ebiet emi mme owo ẹwakde. Etie nte emesinyụn̄ okụt mmọ ẹnọde mme owo n̄wed Ikọ Abasi ẹnyụn̄ ẹkpepde mme owo Bible. Ekeme ndidi owo mmọ kiet akakam ọnọ fi magazine emi. Kpa ye oro, anaedi emesikere m̀mê Mme Ntiense Jehovah ẹdi mmanie. Ukem nte mbon oro itịn̄de iban̄a ke enyọn̄ emi, ekeme ndidi enyene mme n̄kpọ emi akpamade ndidiọn̄ọ mban̄a Mme Ntiense Jehovah.
Edieke edide ntre, anie ke okpobụp? Akpanam didie ọdiọn̄ọ se Mme Ntiense Jehovah ẹnịmde ke akpanikọ, ebiet emi mmọ ẹsidade okụk ẹnam utom mmọ ẹnyụn̄ ẹbọp mme itie emi mmọ ẹsikade ẹkekpono Abasi? Ntak emi mmọ ẹsikwọrọde ikọ ke ufọk ke ufọk ye ke mme ebiet en̄wen?
Cecilie emi iketịn̄de iban̄a ọdọhọ ete: “Mma n̄kot ediwak n̄kpọ mban̄a Mme Ntiense Jehovah ke Intanet. Mma nsikop ẹtịn̄de ntaha ntaha n̄kpọ ẹban̄a mmọ. Emi ama anam nsua mmọ.” Edi nte ini akade, enye ama enyene nneme ye Mme Ntiense Jehovah ndien mmọ ẹma ẹbọrọ kpukpru mbụme esie.
Ndi akpama ndinyene nnennen ibọrọ ke kpukpru se esibụpde aban̄a Mme Ntiense Jehovah? Edieke edide ntre, bụp Mme Ntiense Jehovah nan̄a. (Mme N̄ke 14:15) Nnyịn isio magazine emi. Imenịm ke mme ibuotikọ emi ẹtienede ẹyenam fi enen̄ede ọdiọn̄ọ nnyịn, ọdiọn̄ọ se nnyịn inịmde, ye nte isinamde utom nnyịn.
