UKPEPN̄KPỌ 28
Wụt ke Amama Se Jehovah ye Jesus Ẹkenamde Ẹnọ Fi
Esitie fi didie ke idem owo ama ọnọ fi eti n̄kpọ? Imenịm ke esịt esinem fi tutu afo oyom ndiwụt owo oro ke amama se enye ọnọde fi oro. Jehovah ye Jesus ẹma ẹnọ nnyịn ata eti enọ emi owo ndomokiet mîkpekemeke ndinọ nnyịn. Nso ke mmọ ẹkenọ nnyịn? Nso ke ikpanam man iwụt ke imama se mmọ ẹkenọde nnyịn oro?
1. Nso ke ikpanam man iwụt ke imama se Abasi ye Christ ẹkenamde ẹnọ nnyịn?
Bible ọdọhọ ke “owo ekededi eke ọbuọtde idem ye [Jesus]” eyenyene nsinsi uwem. (John 3:16) Didie ke ikpowụt ke imọbuọt idem ye Jesus? Inaha inyụn̄ inenịm Jesus ke akpanikọ kpọt. Ana se isibierede ndinam ye se isinamde owụt ke imọbuọt idem ye Jesus. (James 2:17) Edieke isitịn̄de inyụn̄ isinamde n̄kpọ emi owụtde ke imenen̄ede ibuọt idem ye Jesus, iyenen̄ede ikpere Jesus ye Ete esie, Jehovah.—Kot John 14:21.
2. Ewe akpan edinam ke isida iwụt ke imama se Jehovah ye Jesus ẹkenamde ẹnọ nnyịn?
Ke usen emi ẹkewotde Jesus, Jesus ama etịn̄ n̄kpọ en̄wen emi anade mme mbet esie ẹsinam man ẹwụt ke imama nte enye ekenyịmede ndikpa nnọ mmimọ. Enye ama ọtọn̄ọ ata akpan edinam kiet; Bible okot edinam oro “Udia Mbubreyo Ọbọn̄”—kpa edinam oro ke ẹsinyụn̄ ẹkot Editi N̄kpa Christ. (1 Corinth 11:20) Jesus ọkọtọn̄ọ edinam oro man mme apostle esie ye kpukpru mbon oro ẹdikabarede idi mme ata Christian ẹsida ẹti n̄kpa emi enye akakpade ke ibuot nnyịn. Ke edinam oro, enye ama ọdọhọ ete: “Ẹka iso ẹnam emi nditi mi.” (Luke 22:19) Ke ini afo odụkde Editi N̄kpa Christ, oro owụt ke afo amama nte Jehovah ye Jesus ẹwụtde nnyịn akwa ima.
SỊN IDEM KPEP
Se n̄kpọ en̄wen emi akpanamde man owụt ke amama akwa ima emi Jehovah ye Jesus ẹwụtde nnyịn. Se n̄ko se inamde Editi N̄kpa Christ edi ata akpan edinam.
3. Nte ikpowụtde ke imama se ẹkenamde ẹnọ nnyịn
Da nte mmọn̄ oyom ndimen fi, ndien owo efehe edinyan̄a fi. Ndi ọkpọsọp efre utọ owo oro ye se enye akanamde ọnọ fi oro? Nso ye nso ke akpanam man owụt ke amama se enye akanamde oro?
Jehovah ama eberede usụn̄ uwem enịm ọnọ nnyịn ke ntak mfọnido esie. Kot 1 John 4:8-10, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso inam uwa Jesus edi san̄asan̄a enọ?
-
Esitie fi didie ama eti se Jehovah ye Jesus ẹkenamde ẹnọ fi?
Nso ke ikpanam man iwụt ke imama se Jehovah ye Jesus ẹkenamde ẹnọ nnyịn? Kot 2 Corinth 5:15 ye 1 John 4:11; 5:3. Ama okot itie Bible kiet ama, ẹtuak ẹda kan̄a ẹbọrọ mbụme emi ẹnyụn̄ ẹneme ẹban̄a enye:
-
Itie Bible emi owụt ke nso ke ikpanamde man iwụt ke imama se Abasi ye Eyen esie ẹkenamde ẹnọ nnyịn?
4. Kpebe Jesus
N̄kpọ en̄wen emi ediwụtde ke imama se Jehovah ye Jesus ẹnamde ẹnọ nnyịn edi ndikpebe Jesus. Kot 1 Peter 2:21, ekem ẹbọrọ mbụme emi ẹnyụn̄ ẹneme ẹban̄a enye:
-
Nso idiwụt ke afo ke ekpebe Jesus ketket?
Jesus ama ama Ikọ Abasi; enye ama esikwọrọ eti mbụk onyụn̄ an̄wam mme owo
5. Sitiene ti n̄kpa Christ
Okpoyom ndidiọn̄ọ se ẹkenamde ke akpa Udia Mbubreyo Ọbọn̄, kot Luke 22:14, 19, 20. Ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ye nso ke ẹkenam ke akpa Udia Mbubreyo Ọbọn̄?
-
Nso ke uyo ye wine oro ada aban̄a?—Se ufan̄ikọ 19 ye 20.
Jesus okoyom mme mbet esie ẹsiti n̄kpa esie ini kiet ke isua, ke ukem usenọfiọn̄ emi enye akakpade. Ntre, Mme Ntiense Jehovah ẹsisop idem ini kiet ke isua ẹti n̄kpa Christ nte enye okoyomde esiti. Okpoyom ndidiọn̄ọ n̄kpọ en̄wen mban̄a nte isitide n̄kpa Christ, se VIDIO emi. Ekem ẹbọrọ mbụme emi ẹnyụn̄ ẹneme ẹban̄a enye.
-
Nso ye nso ke ẹsinam ke Editi N̄kpa Christ?
Uyo ye wine emi ẹsidade ẹti n̄kpa Christ ada aban̄a n̄kpọ. Uyo ada aban̄a mfọnmma idemesie emi enye akawade ọnọ nnyịn. Wine ada aban̄a iyịp esie
NDUSỤK OWO ẸSIDỌHỌ ẸTE: “Ama enenịm Jesus ke akpanikọ ọyọbọhọ.”
-
Didie ke akpada John 3:16 ye James 2:17 owụt ke idịghe ndinịm Jesus ke akpanikọ kpọt edinyan̄a owo?
SE IKPEPDE
Ke ini iwụtde ke imọbuọt idem ye Jesus, inyụn̄ itienede iti n̄kpa esie, oro owụt ke imama se enye akanamde ọnọ nnyịn.
Se M̀mê Emeti
-
Nso idiwụt ke imọbuọt idem ye Jesus?
-
Nso ke akpama ndinam man owụt ke amama se Jehovah ye Jesus ẹkenamde ẹnọ fi?
-
Ntak emi enen̄erede ọfọn owo odụk Editi N̄kpa Christ?
KPEP N̄KPỌ EN̄WEN
N̄kpa Christ anam nnyịn inyịme ndinam nso?
Kpep n̄kpọ en̄wen ban̄a mbuọtidem ye nte ikpowụtde ke imenyene mbuọtidem.
“Wụt ke Ọmọbuọt Idem ke Jehovah Ayanam Se Enye Ọn̄wọn̄ọde” (Enyọn̄-Ukpeme, October 2016)
Ke mbụk emi, “Mmodu Uwem Ndien,” oyokụt nte mma kiet ndidiọn̄ọ ke Christ ama akpa ọnọ imọ akan̄wamde enye.
Se ntak emi ibat ibat owo kpọt ẹsitade uyo ẹnyụn̄ ẹn̄wọn̄de wine ke Editi N̄kpa Christ.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
