Mbon oro ẹkekade ndiyep Jericho ẹma ẹka ẹkedu ke ufọk n̄wan kiet emi ekekerede Rahab. Ke ini andikara Jericho okokopde emi, enye ama ọdọn̄ mbonekọn̄ ẹka ufọk Rahab. Rahab ama edịp mbon uyep oro ke ọkọm ufọk esie onyụn̄ anam mbonekọn̄ oro ẹka itie en̄wen ẹkesan̄a ẹyom mmọ. Ekem enye ama ọdọhọ mbon uyep oro ete: ‘Mmọn̄ n̄n̄wam mbufo sia mmọdiọn̄ọ ke Jehovah odu ye mbufo, ke mbufo ẹyedikan obio emi. Mbọk ẹn̄wọn̄ọ ẹnọ mi ke mbufo idisoboke ubon nnyịn.’

Mbon uyep oro ẹma ẹdọhọ Rahab ẹte: ‘Imọn̄wọn̄ọ ke n̄kpọ idinamke owo ndomokiet ke esịtufọk fo. Tebe ididuot urụk ke window ufọk fo, ndien ẹyenyan̄a ubon mbufo.’

Rahab ama ada urụk anam mmọ ẹto window ufọk esie ẹsụhọde ẹnyọn̄ọ. Mmọ ẹma ẹka n̄kan̄ emi eketiede obot obot ẹkedịbe usen ita mbemiso ẹfiakde ẹnyọn̄ ẹbịne Joshua. Ekem nditọ Israel ẹma ẹbe Akpa Jordan ẹnyụn̄ ẹben̄e idem ndida Isọn̄ Un̄wọn̄ọ nnyene. Jericho ekedi akpa obio emi mmọ ẹkekande.  Jehovah ama ọdọhọ mmọ ẹsan̄a ẹkanade obio oro ini kiet ke usen, ke usen itiokiet. Edi ke ọyọhọ usen itiaba, yak mmọ ẹsan̄a ẹkanade enye utịm ikatiaba. Ekem mme oku ẹma ẹfri obukpon̄, mbonekọn̄ ẹnyụn̄ ẹfiori n̄kpo ke ata ọkpọsọn̄ uyo. Ibibene obio oro ama ọduọ! Edi n̄kpọ ikanamke ufọk Rahab emi akadianade ke ibibene oro. Ẹma ẹnyan̄a Rahab ye ubon mmọ sia enye ama ọbuọt idem ye Jehovah.