▪ Aber a Jesus baa asaase do no, ɔkyerɛkyerɛɛ nkorɔfo dɛ wɔnye afofor ntsena asomdwee mu. Naaso, ber bi ɔkaa kyerɛɛ n’asomafo no dɛ: “Mma hom nndwen dɛ mebae mobɔsomaa asomdwee wɔ asaase do: mammba mammbɔsoma asomdwee, na mbom nkrantsee a. Na mebae mebɛpaapaa mu ma nyimpa nye n’egya eenya, babaa nye ne na eenya, asew nye ne sew eenya.” (Matt. 10:34, 35) Nna Jesus pɛ dɛ ɔkyerɛ dɛn?

Nna Jesus mmpɛ dɛ ɔdze mpaapaamu ba ebusuafo ntamu. Naaso, nna onyim dɛ ne nkyerɛkyerɛ no bɛma ebusuafo binom hɔn ntamu atsetsew. Dɛm ntsi, no ho hia paa dɛ hɔn a wɔpɛ dɛ wɔbɛyɛ Christ n’esuafo na wonuma hɔn no hu dɛ, ɔtɔ da a hɔn ebusuafo enyi renngye gyinae a woesi no ho. Ɔtɔ da a, hɔn awar mu ahokafo anaa hɔn ebusuafo binom botum asoɛr etsia hɔn, na iyi botum ama aayɛ dzen ama hɔn dɛ wɔdze Christ ne nkyerɛkyerɛ bɛyɛ edwuma.

Bible no tu Christianfo fo dɛ wɔnye “nyimpa nyina ntsena asomdwee mu.” (Rom. 12:18) Naaso, wɔ mbusua ahorow bi mu no, Jesus ne nkyerɛkyerɛ botum ayɛ dɛ “nkrantsee,” na ɔdze mpaapaamu ba. Dza yɛreka ho asɛm yi botum esi aber a ebusua no munyi bi agye Jesus ne nkyerɛkyerɛ ato mu, na ebusuafo nkaa no enyi nngye nkyerɛkyerɛ a ɔtse dɛm ho. Sɛ ɔba dɛm a, ebusuafo a wɔtse dɛm no bɛyɛ nyia orusua nokwar no “n’atamfo.”​—Matt. 10:36.

Christ n’esuafo so, ɔnnyɛ hɔn nyina na hɔn ebusuafo nyina wɔ ɔsom kor mu. Ntsi ɔtɔ da a, ɔsɛ dɛ wosi gyinae dɛ wɔbɛtaa Jehovah na Jesus hɔn ekyir anaadɛ wɔbɛtaa hɔn ebusuafo ekyir. Dɛ nhwɛdo no, hɔn ebusuafo a wɔnnsom Jehovah no botum ahyɛ hɔn dɛ wɔmfa hɔnho nhyɛ nyamesom afahyɛ ahorow mu. Sɛ ɔba dɛm a ɔsɛ dɛ wosi gyinae wɔ nyia ɔsɛ dɛ wotsie no ho. Jesus kaa dɛ: “Nyia ɔdɔ egya anaa na kyɛn me no, ɔnnsɛ me; na nyia ɔdɔ babanyin anaa babaa kyɛn me no, ɔnnsɛ me.” (Matt. 10:37) Nna nnyɛ dza Jesus repɛ akyerɛ nye dɛ, sɛ n’esuafo botum edzi n’ekyir a ɔsɛ dɛ ɔdɔ a wɔwɔ ma hɔn awofo no ano brɛ adze. Mbom, nna orisi do dua ma woeehu ndzɛmba a ɔsɛ dɛ wɔma no ho hia hɔn wɔ asetsena mu. Sɛ Jehovah no som ntsi hɛn ebusuafo a wɔnnyɛ agyedzifo no soɛr tsia hɛn mpo a, yɛbɔkɔ do ara adɔ hɔn. Naaso, ɔsɛ dɛ yɛma ɔdɔ a yɛwɔ ma Nyankopɔn no ho hia hɛn kyɛn biribiara.

Ɔyɛ ampa dɛ, sɛ obi n’ebusuafo soɛr tsia no a, ɔyɛ yaw paa. Naaso, hɔn a wodzi Jesus n’ekyir no ma asɛm a ɔkae yi tsena hɔn adwen mu. Ɔkaa dɛ: ‘Nyia ɔmmfa n’asɛndua na ɔnnka mo do no, ɔnnsɛ me.’ (Matt. 10:38) Kwan bi do no, sɛ hɛn ebusuafo soɛr tsia hɛn a, yebu no dɛ ɔka nsɛndzendzen a ɔsɛ dɛ Christianfo gyina ano no ho. Ber kor no ara so, yɛhwɛ kwan dɛ suban pa a yɛda no edzi no bɛka hɛn ebusuafo a wɔnnsom Jehovah no ma wɔaasesa hɔn adwen na woeebosua Bible no.​—1 Pet. 3:1, 2.