ME 12, 2023
CZECH REPUBLIC
100 na Yabaki na Tabaki ni “Vale ni Vakatawa” ena Vosa vakaCzech
Na yabaki 2023, e sa ika100 ni yabaki na kena tabaki Na Vale ni Vakatawa ena vosa vakaCzech. Ni tekivu na cakacaka ni vakadewa ena 1923, era tiko e Czechoslovakia e le 30 na mataveitacini. Nikua, era sa veiqaravi tiko e sivia na le 16,000 na iVakadinadina i Jiova e Czech Republic.
E sega ni rawarawa na ituvaki era sotava na daunivakadewa ena 100 na yabaki sa oti, ia e levu sara na veika dredre era vakila ni vakarurugi tu o Czechoslovakia ena veiliutaki vakominisi mai na 1948 ina 1989. Ena gauna qori, e vakadewataki qai tabaki lo Na Vale ni Vakatawa. E sega mada ga ni kilai o ira na tacida era lesi mera vakadewataka se tabaka na noda ivola. Ia e vaqaqacotaki na nodra vakabauta na tacida era vakaitavi nira vakadinadinataka na nona vukei ira o Jiova. E vicavata na yabaki na nona veivuke o Sister Jarmila Hálová, ena kena vakadewataki Na Vale ni Vakatawa ina vosa vakaCzech. E kaya: “Au vakadeitaka ni o Jiova e karoni ira vakayaloloma na yalodina vua. E laurai qori ena kena vakarautaki na noda ivola. Au vakavinavinakataka vakalevu niu rawa tale ga ni bau vakaitavi kina. Qori e dua na gauna guiguilecavi dredre vei au, e yaga tale ga vakalevu ena noqu qaravi Jiova.”
Ena gauna qo, era veiqaravi tiko ena tabana ni vakadewa ena vosa vakaCzech kei na kena vosa vagalu e sivia e 20 na tacida. Era veiqaravi tiko ena ofisi ni vakadewa tu yawa ena siti o Havířov kei na tauni o Horní Bludovice.
Eda vakavinavinaka vakalevu vei Jiova ena kakana vakayalo e vakarautaka ni tabaki tiko na Vale ni Vakatawa ena vosa vakaCzech ena 100 na yabaki sa oti!—Vosa Vakaibalebale 10:22.