Ena itekitekivu ni Okosita, 2018 ni se yaco tu na tiko yavavala vakapolitiki e Congo, e veitauvi e dua na mate na Ebola. E sivia na le 1,088 e tauvi ira na mate qori, era mate kina e le 665 ena vualiku kei Kivu kei Ituri. E ka ni rarawa ni tauvi ira talega na tacida. E ripotetaka na valenivolavola ni tabana e Congo (Kinshasa), ni ratou mate e le tini na tacida uabula, kei na rua na gone. A tauva tale ga e dua na tacida tagane, ia sa bula vinaka tale.

Me rawa nira taqomaki na tacida, e vakadonuya na Komiti ni Kodineita me vakarautaka na valenivolavola ni tabana e Congo (Kinshasa) e dua na vidio mera vakavulici kina na ivukevuke yaga me baleta na sava ni liga, ra uqeti tale ga na ivavakoso kece mera muria. Qori e veivuke me kua ni tete vakalevu na mate. Rau vakavinavinakataka e rua na vakailesilesi ni tabana ni bula na ivukevuke qori. Rau mani volavola ina valenivolavola ni tabana mera vakavinavinakataki na tacida ena nodra ivakaraitaki vinaka.—Maciu 5:16.

Era sa qarauna na tacida ena levu na siti me savasava tu ga nodra itikotiko e veimacawa. Me kua ni tete vakalevu na mate qori, e vakarota kina na valenivolavola ni tabana me toso na tikinisiga ni nodra soqo ni veiwasewase e 12 na tabacakacaka. Me rawa nira vakani tiko ga vakayalo na tacida, e tuvanaka sara na valenivolavola ni tabana mera sarava na veivavakoso na katokatoni ni porokaramu ni soqo ni veiwasewase ena nodra dui Vale ni Soqoni.

Meda nanumi ira tiko ga na tacida e Congo ena noda masu. Eda vakayaloqaqataki ena inuinui totoka e vakarautaka tu na iVolatabu ena veigauna se bera mai ni na vakaoti vakadua na tauvimate.—Aisea 33:24.