Eda wilika ena jw.org ni a kacabote e vica na bomu ena soqo ni veiwasewase a caka e Kerala e Idia, ena ika29 ni Okotova 2023. E ka ni rarawa ni ratou takali kina e rua na tacida yalewa, kei na dua na goneyalewa yabaki 12 ni a mavoa ena vakacaca. E le 55 tale na mataveitacini era mavoa, eso e kama vakaca na yagodra.

Gauna qo e tolu na tacida yalewa kei na rua na tacida tagane ratou curu tiko e valenibula ni ratou mavoa levu. Era vakadeitaka na vakailesilesi ni kacabote e rauta ni tolu na bomu ni sivi toka na ciwa ena vasagavulu na miniti, ni tekivu na masu ena mataka. O koya e siqemi ni vakavuna na vakacaca sa vesu vei ratou na ovisa, qai caka tiko na veivaqaqai.

Eda vakavinavinakataka na nodra yaco totolo yani na tabana ni veivuke, kei ira na cakacaka e valenibula ena nodra qaravi na mavoa.

O ira na tiko ena soqo ena siga ya era vakavinavinakataka na loloma, kei na veitokoni era vakaraitaka na mataveitacini. Gauna e kacabote kina na bomu, e kaya e dua na tacida yalewa: “Au masu vei Jiova. E totolo ga nodra veivuke kei na nodra veitaqomaki o ira na tacida era dauveivuke kei na so tale na tacida. E laurai sara ga na nona loloma o Jiova, kei na nona kauaitaki keimami yadua.”

Era sa veivakayaloqaqataki tiko na mata mai na valenivolavola ni tabana e Idia, na ivakatawa ni tabacakacaka kei ira na qase ni vavakoso. Era vakarautaka tale ga na ka ni veivuke vei ira na vakaleqai. E kaya e dua na qase ni ivavakoso mai na valenivolavola ni tabana a gole tale ga i Kerala: “E levu na tacida era kidacala, era vakila na mosi kei na rarawa. Ia e vakayaloqaqataki au na nodra dei. Niu veitalanoa kei ira au raica sara ga na nodra nuitaki Jiova. Qori e vakaukauataka dina na noqu vakabauta.”

Nida lewe ni mataveitacini e veiyasa i vuravura, meda masulaki ira mada ga na tacida kei na nodra vuvale, wili kina o ira kece era sotava na ituvaki vakaloloma qori. E vakacegui keda na ka e yalataka na iVolatabu ena gauna se bera mai, ya ni na sega tale na itovo kaukaua, rarawa, kei na mate. Eda vakadeitaka nida na nuitaki Jiova tiko ga e veigauna.—Same 56:3.