Ena ika7 ni June 2022, e tauca na lewa na Mataveilewai ni Dodonu ni Lewenivanua e Urope (ECHR) ina matanitu o Lithuania ena kisi me baleti Brother Stanislav Teliatnikov. E sega ni via curu ena mataivalu o Brother Stanislav ena vuku ni nona vakabauta. Na lewa e tau qori e yavutaki ena tikina e 9 ni European Convention on Human Rights (galala ni vakatulewa ni vakasama, lewaeloma kei na lotu). Ia e laurai ni beca o Lithuania na veiyalayalati qori, qai vakaroti me sauma vei Stanislav e rauta ni $3,196 na ilavo ni Merika.

Voleka ni o ira kece na matanitu era lewena na matabose e vakatokai na Council of Europe, era sa vakarautaka na cakacaka vei ira na sega ni via curu ena mataivalu. A kerea o Stanislav me qarava na cakacaka qori, me isosomi ni nona sega ni curu ena mataivalu. Ia e sega ni vakarautaki qori e Lithuania. Gauna e tauca kina na lewa na ECHR me baleti Lithuania, wili tale ga kina na lewa me baleti Armenia, Azerbaijan, kei Turkey, e kaya ni dodonu vei ira na matanitu era lewena na Council of Europe mera vakarautaka na cakacaka vei ira na sega ni via curu ena mataivalu. Na cakacaka qori e sega ni dodonu mera totogitaki kina na lewenivanua, me kua tale ga ni okati ena cakacaka ni mataivalu.

Sa muria tiko mai na matanitu o Armenia na lewa qo. E lesia vei ira na cauravou era sega ni via curu ena mataivalu na cakacaka ena yaga vei ira na lewenivanua.

Eda nuitaka ni na muria na matanitu o Lithuania na lewa e tauca qori na ECHR, ya me vakarautaka na cakacaka me isosomi ni sega ni curu ena mataivalu. Qori ena yaga vei ira na tacida, kei ira na lewenivanua. Gauna mada ga qo eda kila ni o Jiova ena tokoni ira, qai dusimaki ira tiko ga na tacida e Lithuania.—Lele i Jeremaia 3:25.