A peresitedi tiko ni Watch Tower Society o Brother Joseph F Rutherford ena gauna e tara kina na Vale ni Soqoni ena 1228 Pensacola Street mai Honolulu, Hawaii. Qori ena yabaki 1935. E duatani duadua na tarataravaki qo ni matai ni olo e vuravura me vakatokai me “Vale ni Soqoni.” Sa sivia qo e 80 na yabaki nodra sokaloutaki Jiova kina e levu. Nikua sa soqoni tiko kina e 4 na ivavakoso, ena lima na vosa wili kina na vosa vakaPidjin ni Hawaii. a

E qai vakavoutaki tale na Vale ni Soqoni qori. Ni bera ni tete na matedewa na COVID-19, era veisureti na tacida vei ira na tiko voleka, vakailesilesi vakamatanitu kei ira na dauniveivakavulici mera lai sarasara kina ena ika11 ina ika15 ni Feperueri, 2020. Era vakasarasarataki na vulagi, saravi eso na iyaloyalo ni tukutuku makawa, rogoci tale ga na nodra ivakamacala na tacida me baleta na nodra cakacaka na iVakadinadina i Jiova nikua. Ena ika16 ni Feperueri, sa qai vunau ena vakatabui ni Vale ni Soqoni o Brother David H. Splane e lewe ni iLawalawa Dauvakatulewa ni iVakadinadina i Jiova.

E kaya e dua na tacida yalewa e veivuke ena vakarautaki ni soqo: “Dina ni sega ni inaki ni veivakasarasarataki me keimami vunau vei ira na sureti, ia keimami kila ni qo e dua na ivakadinadina levu vei ira na sega ni kilai keda.”

E vukei ira na tacida na soqo qori mera kila vinaka na kedra ivolatukutuku na iVakadinadina i Jiova e Hawaii, era raica tale ga na vakayacori ni parofisai, e kaya: “Era na vakalagilagia na yaca i Jiova na Kalou ni Isireli na veiyanuyanu e wasawasa.”—Aisea 24:15.