Ena ika14 ni June 2018, e solia na matabose ni siti vei ira na iVakadinadina i Jiova ena koroturaga kei Mongolia, o Ulaanbaatar, na sitivikiti e vakavoutaki kina vakalawa na nodra cakacaka vakalotu ena vanua qori.

E dodonu mera vakavoutaka e veiyabaki na isoqosoqo ni lotu kece e Mongolia na nodra sitivikiti ni cakacaka. Me tekivu mai na 1999 era sa dau vakayacora tiko qori na tacida ena veiyabaki. Ia e qai sega ni vakadonuya na matabose ni siti e Ulaanbaatar ena 2015 na kena kerei me vakavoutaki na noda sitivikiti. Ena Janueri 2017, sa bokoca na matabose ni siti na dodonu vakalawa e vauca na noda veiqaravi vakalotu. Era sega tale ga ni via vakamacalataka na kena vakailesilesi se yavu cava era vakatulewataka kina qori. Era mani nanuma na tacida mera kere veivuke ina mataveilewai.

Ena gauna ni veilewai, e saga na loya ni matabose ni siti me vakayagataka na ivakadinadina ni veika e vakatulewa kina na Mataveilewai Cecere e Rusia me vakatabui kina vakalawa na noda cakacaka. E saqata na loya e matataka tiko na isoqosoqo ni vakatulewa qori e vakalewai vakalevu e veiyasa i vuravura, sa rogoci tale tiko ga ena mataveilewai e vuravura ni cala vakalawa. Kena ikuri ni vakatulewa e vakayacori e Rusia e tau ni sa vakatulewa oti tu na matabose ni siti. E sega gona na yavu vinaka mera vakayagataka me nodra ile.

E qai bokoca tale na Mataveilewai na nona vakatulewa na matabose ni siti, e vakamacalataka ni vakatulewa tu ga ena ka e rogoca qai sega ni macala na kena dina. E sega tale ga na ivakadinadina matata ni rawa ni vakavu leqa na noda cakacaka. E vakatulewataka tale ga ni sega ni doka na matabose ni koro na noda dodonu, e okati kina na galala ni noda sokalou se vakabauta.

E kaya o Jason Wise, e dua na loya e matataki ira na iVakadinadina i Jiova: “E sega ni dau vinakati na veivakadonui ni matanitu me qai vakayagataka e dua na nona dodonu me vakatulewa, ia e dredre na galala ni sokalou ke sega ni vakadonui vakalawa. E levu tale na ka e yaga ena kena vakadonui, e rawa ni vakau mai kina na iVolatabu kei na ivola vakaivolatabu, voli na vanua me vakayacori kina na sokalou, se redetaki na vanua me baleta na neimami soqo lelevu. Marautaki dina na vakatulewa qo ni Mataveilewai ni sega ni tokona na matabose ni siti, e raica tale ga ni nodra ile ena vakaleqa na neimami dodonu ni sokalou kei na neimami veimaliwai e Mongolia.”