Ena Noveba 2020, e gauna guiguilecavi dredre vei keda ena noda cakacaka vakaitalatala. Na matedewa na COVID-19 e vakavuna me yalana noda veitosoyaki. Eda sega kina ni vakayagataka na iwalewale ni vunau eda vakayagataka tiko mai. Ia eda vakacavara vinaka noda vunautaka na itukutuku vinaka vei ira eso tale e veiyasa i vuravura. Vica vata na milioni era gumatua mera veisoliyaka Na Vale ni Vakatawa Nb. 2 2020 vei ira na daunibisinisi, vakailesilesi, qasenivuli, itokani, wekadra, kei ira na lewenivanua. E levu e uqeti ira sara ga na cakacaka qo. Era vakila tale ga na marau o ira na vakaitavi kina, era vakayaloqaqataki tale ga.

Qo eso na irogo kei na nodra ivakamacala na tacida ena veiyasa i vuravura:

O Lucinda Furkin e dua na tacida yalewa mai Ositerelia e yabaki tinikawalu. E vola: “Dina niu tauvimate bibi ena vula qo, ia au vakila ni vakayaloqaqataki au o Jiova. E taura tu na ligaqu, qai solia vei au na kaukaua meu vosota.”

E tukuna e dua na tama mai Niusiladi na sala e vukei ratou kina vakavuvale na cakacaka lavotaki qo: “E va na luvei keirau yalewa, dua e yabaki 7, dua e yabaki 9, yabaki 11, dua tale e yabaki 13. Na cakacaka vakavunau lavotaki qo e veiyasa i vuravura e vaka sara ga na itavi e lesi keitou yadua kina na Tamada dauloloma o Jiova. Qori e uqeti keitou me keitou vunau tiko ga e veisiga.”

Rau veiqaravi vakaivakatawa ni tabacakacaka o Kagiso kei Lydia Marumo. Rau vakauta ena iyaya vakalivaliva na ilavelave ni mekesini vei ira na wekadrau era sega ni tiko ena dina, qai levu era vakavinavinakataka. Dua na wekai Kagiso e vuniwai, e kaya na mekesini e yaco yani vua ena kena gauna donu. E kaya ni so vei ira na tauvimate era lomatarotarotaka tu na Kalou kei na iVolatabu, ratou tale ga na luvena ratou dau cakava na ka vakatevoro. Rau mani qiriti koya na veiwatini, tekivutaki sara na vuli iVolatabu ena yakavi ya. Gauna qo ratou sa vuli tiko vakarua e veimacawa.

Evola o Soroya Thompson e dua na tacida yalewa painia mai Ontario: “Na cakacaka vakavunau qo e vukei au meu vakaliuca na ka e bibi duadua, kei na levu ni cakacaka me caka. Qo e ivakaraitaki ni nona loloma o Jiova, e vakadinadinataki tale ga kina ni vinakata o koya meda vakabulai kece. Niu vakasamataka qori e uqeti au meu vunau vakalevu.”

E kaya e dua na tacida yalewa mai British Columbia: “Na gauna dredre qo au vakatulewataka meu painia veivuke meu kua kina ni lomabibi. Keitou vakila kece kina vakavuvale na vakacegu.”

E kaya na valenivolavola ni tabana e Kenada ni cakacaka vakavunau lavotaki qo e vakavolekati ira e levu na vuvale. Era vakila tale ga na gone na kedra yaga ena cakacaka vakaitalatala, oya nira vola ga vakataki ira nodra ivola, vuke ira nodra vuvale ena volai ni waqanivola, vakabiri na sitaba kei na nodra vaqara na yaca ni itikotiko kei na katonimeli.

Rau veiqaravi vakaivakatawa ni tabacakacaka o brother kei sister Tuomisto. E kaya: “Dua na gauna dredre vei keimami eke na vula o Noveba. Era marautaka na tacida vakabibi o ira na painia lavotaki na ituvatuva qo ni vukei ira vakalevu mera lomavakacegu.”

Dua na veiwatini rau vakauta na mekesini vei dua na nodrau itokani. E vakauta lesu o koya nona ivola ni vakavinavinaka, e kaya: “Nikua, [au wilika tiko ena iVolatabu na vola] i Jemesa. E tukuni kina ni mate na vakabauta ke sega ni cakacakataki. O kemuni na iVakadinadina i Jiova oni dau saga moni sotavi ira na tamata moni vakamacalataka qai vakavulici ira ena iVolatabu. Na ka oni cakava e vaqaqacotaka dina na vakabauta.”

E kaya na valenivolavola ni tabana e Kirisi: “E veivakaocai vei ira e levu na matedewa kei na vakatatabu. Ia na cakacaka vakavunau lavotaki qo e veivakayaloqaqataki dina. Levu era kaya ni veivakacegui vakayalo na cakacaka qo!’”

Dina ni tauvimate tu o Sister Suzie Kontargiri qai sega ni tiko ena dina o watina, ia e vakatulewataka ga me painia veivuke ena Noveba. E kaya: “Na cakacaka lavotaki qo au sega sara ga ni vakila na lomabibi. Au na yadra ena veimataka, cakava noqu cakacaka, vasaqa, vakarautaka na ka e vinakata o watiqu, oti tekivu sara noqu cakacaka vakavunau. E dau tarogi au o watiqu: ‘O sega ni cakacaka vakavunau nikua?’ baleta ni sa matau vua me raica niu dau marautaka noqu cakacaka vakavunau kei ira na tacida yalewa.”

E volavola vei ira na vakailesilesi o sister Tamaki Hirota. E kaya: “O Jiova a tekivuna na vunau ni volavola vei ira eso tale. E vola e 66 na ivola vei ira na kawatamata ra qai wilika qori e veiyabaki me rawa nira toro voleka vua. E kila tu o Jiova ni na yaga na iwalewale qo. Qo e dua na gauna guiguilecavi dredre.”

Rau sega ni kila o sister Meharaja Vijaya kei sister Imayanathan Amutha ni rau volavola vata ga ena dua na itikotiko. A viritaka laivi o taukeinivale na imatai ni vola. Oti e yaco tale yani na ikarua ni vola. E nanuma ni na rairai bibi na itukutuku e tiko kina ni sa vakau yani vakarua. E wilika na mekesini, qirita sara na tacida yalewa a vakauta na ikarua ni vola mani tekivutaki sara na vuli iVolatabu.

A taura e dua na vakailesilesi na mekesini, oti e qiri sara ina valenivolavola ni tabana e Sri Lanka. E marama daulotu ia e sega ni se sotavi ira na iVakadinadina i Jiova. Ni vakamacalataka oti na veika vinaka me baleta na mekesini kei na noda website, e taroga: “Rawa vakacava niu dua na iVakadinadina i Jiova?” E tuvanaki sara e dua me sikovi koya.

E dua na tacida e yabaki 13 e vuli tiko ena koronivuli e veivosakitaki kina vakalevu na politiki. Ia e kaya ni vukei koya vakalevu na cakacaka vakavunau ena Noveba: “Au nuidei ni rawa niu tukuna vei ira na qasenivuli na vu ni noqu tawaveitovaki. E vaqaqacotaka vakalevu na noqu vakabauta.”

E vakila tale ga qori o sister Margit Haring, e vola: “Na cakacaka vakavunau qo e uqeti au meu yaloqaqa qai gumatua vakalevu. Dua na ka noqu taqaya ni tukuni nida na vunau vei ira na daunibisinisi kei ira na vakailesilesi. Ia niu tutaka noqu vakabauta ena yalomalumalumu ena vukei au sara vakalevu ena gauna se bera mai.”

E kaya e dua na qase ni ivavakoso: “E tarai au vakalevu nira painia veivuke e levu dina ga nira tauvimate tu. De dua era nanuma ni sega vei ira na kaukaua mera painia, ia era vakatulewataka mera vakaitavi ena cakacaka lavotaki qo. E vaka vu luluvu dina nida raica nodra marau kei na vakavinavinaka era vakaraitaka vei Jiova kei ira na mataveitacini.”

Levu dina na irogo kei na vakasavuirogorogo mai na veiyasa i vuravura, ia ena sega ni tukuni kece yani. E marautaki vakalevu ni rawa nida tukuna vei ira e milioni vakacaca na itukutuku ni Matanitu ni Kalou.—Joni 15:11.