Ena Tusiti na ika4 ni Epereli 2023, era vakananuma kina na iVakayakavi ni Turaga e vica vata na milioni na iVakadinadina i Jiova kei ira na vulagi. Levu era vosota na ituvaki dredre mera tiko ena soqo bibi qo.

Kena ivakaraitaki, e yaco e Ukraine na draki ca kei na veivaluvaluti, ia era tiko ena iVakananumi e vica vata na udolu. E yaco na tikoyavavala ena vualiku kei Ukraine, era mani vakauta na qase ni ivavakoso vei ira na tacida na katokatoni ni vunau ni iVakananumi ni vo tu e dua na macawa. Ni oti e vica na siga, e yaco tale ga e dua na draki ca levu qai vakaleqa na internet kei na livaliva. Ia era marau na mataveitacini nira se rawa ga ni rogoca na ivunau katoni ni iVakananumi.

O Violetta e dua na goneyalewa yabaki 15 mai Kazakhstan, e tusaqati e vale. E 20 na yabaki nona tusaqati ratou tiko o nona tutu ena vuku ni ka dina. E dau saga me tarova nodratou gole vakavuvale ina soqoni, qai vakarusa nodratou ivola vakaivolatabu. Ia na nona lomani Violetta e uqeti koya me via veivosakitaka na iVolatabu kei koya. E kurabuitaka o Violetta ni vakadonuya o nona tutu me vulica na iVolatabu, qai tiko tale ga ena iVakananumi ni yabaki qo!

Eso tale e vakadredretaka nodra tiko ena iVakananumi na yawa ni vanua. Kena ivakaraitaki e Timor-Leste, eso na tacida era tiko ena siti o Same kei Suai era dau veivakavulici ena talevoni vei ira na le 55 na vuli iVolatabu. Na yawa ni vanua rau tiko kina na siti qori, e taura ni vica vata na aua na vodo motopai me qai yaco ina vanua voleka duadua e caka kina na soqoni. E mani tuvanaki gona me caka ga ena dui siti qori na iVakananumi. Ena siti o Same, e gole kina e dua na qase ni ivavakoso me va na aua me lai solia na ivunau ni iVakananumi, ra qai tiko kina e le 56. E dua tale na qase e gole ina siti o Suai me rauta ni vitu na aua, ra qai tiko ena iVakananumi qori e sivia ni le 50.

E dredre tale ga vei ira na tacida e Hualpén mai Chile mera vaqara na vanua me caka kina na iVakananumi. Era kerea e dua na vakailesilesi ni matanitu me vukei ira. Ni vo e vica na aua me caka na iVakananumi, e veitaratara na vakailesilesi vei ratou na qase qai kaya ni rawa nira vakayagataka e dua nodra valenikana na gone e koronivuli. Era yavala totolo na tacida mera vakarautaka na vanua qori me caka kina na soqo. E sureti tale ga ena iVakananumi na ivakalesilesi qori kei na mea ni siti. E kaya na mea: “Au qoroya na kena tuvanaki vinaka na soqo ra qai veidokai na tiko kina. Era vakaitovo na gone. Keitou na tu vakarau me keitou vukei kemuni ena gauna mai muri.”

Eda marau tale ga nida rogoca ni sa vakalawataki ena Noveba 2022 na nodra cakacaka na tacida e Monaco. A caka na iVakananumi ena dua vale redetaki, oti na soqo e kaya e dua a sureti kina: “E rairai vinaka na vanua qo, ia e totoka sara o ira na tiko kina.”

E veiuqeti dina na nodra vosota na tacida na ituvaki dredre me rawa nira muria na ivakaro i Jisu mera soqoni ra qai ‘vakananuma’ na nona mate!—Luke 22:19.