Usana toka na qele e dua na lori. Keli na qele qai maroroi ina dua tale na vanua me vakarautaki kina na vanua ni tarataravaki.

Era biuta toka vakamatau na Tabana ni Livaliva na wa ni internet. Ena vakayagataki vakawawa na vanua qori me ofisi kei na valenikana ena gauna ni tarataravaki ni valenivolavola ni tabana e toka voleka ga.

iRairai ni gaunisala ina valenivolavola ni tabana ni tabaki e macawa. Ena yasana imawi donuya na basoga ni sala, e caka kina e dua na were lailai kei na drano, e rawa tale ga nira sarasara kina na toka voleka kei ira na vulagi.

Qaqiraki tiko na vatu me vakayagataki tale me caka kina na gaunisala wavokita na vanua ni tarataravaki.

Caka toka na gaunisala me vakayagataki ena gauna ni tarataravaki kei na gauna ena oti kina. E vakayagataki e dua na mataqali pauta vulavula e wakivata kei na qele me sova ena yavu ni gaunisala me kaukaua kina, me veivuke tale ga ena kena tara. Na itaba ena imatau me vaka e laurai toka e muri, e vakayagataki tiko e dua na misini ni caka gaunisala me vakaukauataka na kena yavu ni bera ni sova yani na pauta vulavula.

Vakarautaka na Komiti ni Tarataravaki e 18 taucoko na vanua e Peritania kei Ailadi, me kumuni kina na kedra itukutuku na via bolecakacaka. E sivia na 15,000 na iVakadinadina i Jiova era gole yani, levu tale ga era tu vakarau mera veivuke.

Tei toka e dua na vunikau, qori e dua vei ira na sivia na 700 na vunikau me tei. E vakarautaki na drano me tarova na luvu ni vanua qori ni oti e dua na draki ca, qai maroroya toka na wai me vakadrodroi tani vakamalua.

Caka toka na kelikeli me vakatautauvatataki kina na vanua ni tarataravaki. Rauta ni 160,000 na kiupiti na levu ni qele e keli, e kau tani tale ga. E tautauvata ni vakatawani e sivia e 10,000 na lori ni usa qele!

Vakarautaka toka ira na dautei senikau na qele me tei kina na kau me bai yavoki ni loganisenikau. Na were lailai qo kei na vanua wavokita e tei kina e 11 na mataqali vunikau kei na 16 na mataqali kau.

Vakayagataki toka qori ena imawi e dua na misini ni kelikeli me vakarautaki kina na yavu. Ena kelia sobu na vanua me davo kina na yavu. Oti ena qai sova kina na simede sa uli oti tu. Me vaka e laurai toka qori e lomadonu ni itaba, ena vakadavori e dua na kaukamea sitila ena simede me ivakadei ni kena yavu. Rauta ni 360 taucoko na qara e keli me yavu ga ni vanua ena tara kina na vale mera vakaitikotiko kina na lewe ni Peceli.

Cakacaka toka ena mataka batabata e dua na kenadau ena vakadavori ni paipo me semata na paipo ni wai ena vakayagataki tiko vakawawa ena ofisi.

Vakayagataki e dua na misini ni kelikeli me kauta tani na nuku kei na benu ena drano volekata na vanua ni tarataravaki. Levu na drano qori e vinakati me vakasavasavataki. E bulu vinaka na bati ni drano me taqomaka na sisi ni qele kei na waluvu. E sivia e 2,500 na ika era tokitaki ena so tale na drano ni bera ni vakasavasavataki.

iRairai ni vanua ni tarataravaki ni taba toka ena isi. Laurai toka eliu na kena biu na yavu ni rua na tabavale ena itikotiko. Ena imatau e ra, e laurai toka qori na dela ni yavu. Ena imawi e ra, e sova tiko na iubi simede ni kena yavu. Laurai toka qo ena lomadonu ni itaba, na misini me kelia vinaka na yavu.

Vakayagataka toka e dua na lewenitimi ni tarataravaki e dua na misini me dregata vata na kau ena matanikatuba ina lalaga ni bera ni boro donuya na Rumu ni Vulagi. E rewa toka i cake na vanua qo, e rawa kina nira sarava na vulagi na veika kece e vauca na tarataravaki kei na toso ni cakacaka.

Sagai toka me vakacobari na rigi lelevu me vukea na veimoiyaki ni misini e dau laveta na iyaya lelevu ni tarataravaki, e kilai me tower crane. E rauta ni 40 na mita na kena balavu, rawa tale ga ni laveta na iyaya e rauta ni 18 na tani na kena bi.

Musu na simede e yavu ni vale ina kena balavu e vinakati. Na kaukamea e laurai toka qori era na vesuki vata kei na kena ilati ena gauna e vakasimedetaki kina.

Cobara tiko na daunilivaliva e rua na ivakatakilakila lelevu ni JW.ORG ena lalaga simede ena matamata ni valenivolavola ni tabana.

iRairai ni basoga ni sala osooso ni tabaki yani e macawa donuya na matamata ina valenivolavola ni tabana. Ena imawi e cake toka kina na ivakatakilakila vou ni JW.ORG. Laurai tale toka ga na drano e maroroya na wai ni uca kei na were sa caka oti ena matamata.

Na raba ni vanua e kovuta na misini e laveta na iyaya lelevu e 65 na mita, qori na vanua ena tara kina na va vei ira na lima na vale era na vakaitikotiko kina na lewe i Peceli. E laurai toka e liu o ira na konitaraki era sova toka na simede ena vanua ni kele motoka. Vakayagataki na kaukamea sitila ena duru ni vale kei na kena lalaga.