Era na vuka rawa ga na bebe ni vakatakatai nodra masela ena matanisiga. Ia e dua na mataqali bebe na cabbage white butterfly, ke siga rugurugua ena totolo na yavala ni nona masela qai dau vuka e liu vei ira kece na vo ni bebe. Cava e vakavuna qori?

 Vakasamataka mada: Ni bera nira vuka e levu na veimataqali bebe era na vakacilava ena siga na tabadra nira lobika se ra vakatetaba vakababa. Ia na cabbage white butterfly ena cakava qori me vaka na irairai ni matanivola na V. Era kaya kina na dauvakadidike ke vinakata na bebe qori me katakata vinaka, ena laveta cake na tabana me rauta ni 17 na dikiri ena gauna e vakatetaba kina. Qori ena cilava vinaka kina na masela ni yagona na matanisiga me vakatakatai rawa ni bera ni vuka.

 Era dikeva tiko eso na dauvakadidike ena University of Exeter e Igiladi, ke rawa nira vakatotomuria tale ga na ka e dau cakava na cabbage white butterfly me vakavinakataki kina na katakata ni sola. Ena tubu kina na kaukaua ni kena katakata ena 50 na pasede.

 Era raica tale ga na dauvakadidike ni curuma totolo na katakata na vatuvatu ni tabadra na bebe. Nona dau vakatetaba va qori na bebe, era bulia rawa kina na dauvakadidike na sola e mamada qai yaga. Na veika e rawati qori e tukuna kina o Parofesa Richard ffrench-Constant, e dua vei ira na lewe ni timi ni vakadidike, ni “vakatubuqoroqoro na bebe qo ena sala e kumuna kina na katakata.”

 Na cava o nanuma? E bula vakaidewadewa se buli nona dau vakatetaba va qori na bebe me katakata kina?