OGENGHIS KHAN e dua na tamataivalu qaqa ni ika12 ni senitiuri. A tauyavutaka na veivanua e qai kilai me matanitu kaukaua o Mongolia. Ia na gauna qo sa dua ga na iwase ni vanua lailai ena tadrua ni vanua o Rusia kei Jaina. E dua tale ga vei ira na vanua e vuravura era veituyaki na kena lewenivanua.

E vanua veico o Mongolia, era tu kina na veiulunivanua kei na veiuciwai. E tiko ena ceva na vanua dravuisiga o Gobi, e kilai levu nira se maroroi vinaka tu ga kina na sui ni manumanu lelevu na dinosaur. E 1,580 na mita na cere kei Mongolia mai waitui. Ni sega ni dau tau na uca me sivia e 250 na siga e veiyabaki, e veiganiti kina nodra vakatokayacataka na lewena me “Vanua ni Lomalagi Karakarawa” (“Land of Blue Sky”)!

E duatani sara na ivakarau ni draki ena vanua qo. Ena vulaikatakata e tubu totolo ina 40 na dikiri na celsius (40°C) na levu ni katakata, ia e rawa ni lutu sobu sara ena vulaililiwa me -40 na dikiri na celsius  (-40°C). E voleka ni dua na ikatolu ni lewenivanua e Mongolia era dau veitokiyaki. Era dau yavala sara vakamataka na turaga kei na marama mera lai loba sucu ni me, bulumakau, kameli kei na tinaniose. Era kania vakalevu e Mongolia na kakana e caka mai na sucu kei na lewenimanumanu, na kena era dau taleitaka vakalevu na mateni.

 

Era dau veikauaitaki na lewe i Mongolia. Na nodra bure e vaka tu na valelaca e vakatokai me gers. Era dau dolava tu ga vei ira na tasivi kina mera vakacegu se kania na vo ni kakana. Ke ra vakavulagi era na vakarautaka na ti katakata vakasucu, qai vakamasima vakalailai.

E levu era lotu Bhuddha e Mongolia nikua. E vica era dau vakatevoro, so tale era Musolomani, kena vo era lotu vaKarisito, ia e levu toka era sega ni dau lotu. Era tu tale ga e Mongolia na iVakadinadina i Jiova, e sivia na 350 na kedra iwiliwili ra qai vakavulici ira tiko e sivia na 770 tale ena iVolatabu.