Nona iSolisoli Tawamudu na Dauveibuli

SEGA li ni o drukataka ni veika era vakabauta na saenisi me rawa kina na bula ena dua na vuravura, e se volai makawa tu ena imatai ni wase ni iVolatabu? Na cava mada na veika oqori?

Dua oya, e gadrevi me levu na wai me rawa kina na bula me vaka e tukuni ena Vakatekivu 1:2. E dodonu me veiraurau vinaka na ivakarau ni katakata kei na batabata, me kua kina ni cevata kece na wai e tu e vuravura se buta ra qai cawa tani yani. Me rawa oqori ena gadrevi me veirauti vinaka na yawa ni vanua e toka yani kina na noda vuravura mai na matanisiga. E cavuti gona vakavica ena ivola na Vakatekivu na matasiga kei na kena cakayaco ena noda vuravura.

Me rawa ni bula na tamata ena dua na vuravura, e gadrevi na maliwalala e veicurumaki kina na kasi e veirauti vinaka. Na ka bibi oqo e tukuni tu ena Vakatekivu 1:​6-8. Na tubu ni co kei na kau e vakamacalataki ena Vakatekivu 1:​11, 12, era ivurevure levu duadua ni cagi bulabula na oxygen ena noda maliwalala. Ena gadrevi na vanua mamaca qai bulabula vinaka me rawa nira bula kina na veimataqali manumanu, me vaka e tukuni ena Vakatekivu 1:​9-​12. Me veiraurau na draki, e bibi me donu vinaka na vakalakala ni dua na vuravura me rawa ni dei kina na kena taiki. O koya gona, me baleta na noda vuravura, na idre kaukaua e tiko ena vula e vakavuna me dei toka na kena taiki. Na buli ni vu ni rarama oqo, vaka kina na kena yaga e cavuti ena Vakatekivu 1:​14, 16.

E rawa vakacava vei Mosese, na dauvolaivola makawa me vola na veika oqori ni a bula ena gauna e se sega kina na kila vakasaenisi nikua? A tamata vuku beka ga o Mosese koya e kila kina na veika bibi oqori era lecava o ira na bula tu ena gauna oya? Na kena dina, na Dauveibuli ni lomalagi kei vuravura a uqeti koya me vola na veika oqori. Sa rauta me sega ni kurabuitaki na kena donu vinaka vakasaenisi na veika e volaitukutukutaki tu ena Vakatekivu.

E tukuni ena iVolatabu ni tiko na inaki era buli kina na veika bula era tu e lomalagi kei vuravura. Kaya na Same 115:16: “Na lomalagi io na lomalagi sa nei Jiova: ia sa solia na vuravura ko koya me nodra na luve ni tamata.” E kaya tale na daunisame: “Sa vakataudeitaki vuravura ko koya e na kena yavu, me kakua ni yavala rawa ka sega ni mudu.” (Same 104:5) Kevaka gona e bulia na maliwalala kei na noda vuravura na Dauveibuli, e sega ni vakataratututaki ni tu tale ga vua na kaukaua me na vakavinakataka. Oqo e dodonu me uqeti keda meda vakanamata ina veika totoka e parofisaitaki tu: “Era na taukena na vanua ko ira na yalododonu, ka tiko kina ka sega ni mudu.” (Same 37:29) Na Kalou a ‘sega ni cakava [na vuravura] me lala, a bulia ga mera tawana’ tawamudu na tamata era doka ra qai vakavinavinakataka na veika e bulia.​—Aisea 45:18.

E kaya na iVolatabu ni a lako mai vuravura o Jisu me mai vakavulici keda meda kilai koya na Kalou kei na nona inaki, mera na rawata kina na bula tawamudu na kawatamata era talairawarawa. (Joni 3:​16) Eda vakadeitaka tale ga ni sa voleka na gauna mera na ‘vakawabokotaki kina o ira na vakawabokotaki vuravura’ tiko, ia era na bula ga o ira na dau uqeta na veilomani kei na veivinakati. (Vakatakila 7:​9, 14; 11:18) Sa na totoka dina na bula ena vuravura ena tawamudu kina na noda vulica kei na noda marautaka na vakatubuqoroqoro ni nona ibulibuli na Kalou!​—Dauvunau 3:​11; Roma 8:​21.

[iTaba ni Credit Line ena tabana e 8]

NASA photo